ເສດຖະກິດຝຣັ່ງ ຈະຫົດຕົວ 9% ໃນປີ 2020 - Laoedaily

ເສດຖະກິດຝຣັ່ງ ຈະຫົດຕົວ 9% ໃນປີ 2020

ສຳນັກຂ່າວຕ່າງປະເທດລາຍງານວ່າ ທະນາຄານກາງຝຣັ່ງ ( Banque de France ) ຄາດການວ່າ: ເສດຖະກິດຂອງຝຣັ່ງ ຈະຫົດຕົວສູງເຖິງ 9% ໃນປີ 2020 ແລະ ຄາດວ່າຈະຄ່ອຍຟື້ນຕົວຢ່າງຊ້າໆ, ກ່ອນຈະກັບມາເຂົ້າສູ່ສະພາບປົກກະຕິ ຄືກັບກ່ອນເກີດການລະບາດຂອງພະຍາດໂຄວິດ – 19 ໃນກາງປີ 2022.

ທະນາຄານກາງຝຣັ່ງ ໄດ້ຄາດຄະເນຕົວເລກດັ່ງກ່າວແມ່ນອີງໃສ່ສະຖານະການການແຜ່ລະບາດຂອງພະຍາດໂຄວິດ – 19 ທີ່ຍັງບໍ່ມີທ່າທີຈະຜ່ອນຄາຍລົງ ລວມທັງການສັກວັກແຊັງປ້ອງກັນໂຄວິດ – 19 ຈະບໍ່ສາມາດສຳເລັດໃນທ້າຍປີ 2021.

ນອກຈາກນັ້ນ, ທະນາຄານກາງຝຣັ່ງ ຍັງຄາດວ່າ: ລວມຍອດຜະລິດຕະພັນພາຍໃນ ( GDP ) ຂອງຝຣັ່ງ ໃນປີ 2020 ຈະຫົດຕົວ 9% ແລະ ຈະກັບມາຂະຫຍາຍຕົວໃນລະດັບ 5% ໃນປີ 2021. ຝຣັ່ງ ໄດ້ຮັບຜົນກະທົບຢ່າງໜັກຈາກການແຜ່ລະບາດພະຍາດໂຄວິດ – 19 ໃນຮອບ 2 ເຮັດໃຫ້ລັດຖະບານຕ້ອງໃຊ້ມາດຕະການຈຳກັດໃນການໄປ – ມາ ແລະ ປິດກິດຈະການຮ້ານຄ້າ, ສິ່ງດັ່ງກ່າວສົ່ງຜົນກະທົບເຖິງກິດຈະກຳດ້ານເສດຖະກິດ ເຊິ່ງໃນເດືອນພະຈິກຜ່ານມາເສດຖະກິດຂອງຝຣັ່ງ ຫົດຕົວເຖິງ 11% ເມື່ອທຽບໃສ່ໄລຍະດຽວກັນຂອງປີຜ່ານມາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ