ປີ 2021 ບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ຕັ້ງເປົ້ານຳເຂົ້ານ້ຳມັນ 150 ລ້ານລິດ - Laoedaily

ປີ 2021 ບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ຕັ້ງເປົ້ານຳເຂົ້ານ້ຳມັນ 150 ລ້ານລິດ

ນັບແຕ່ປີ 2015 ເປັນຕົ້ນມາບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ໄດ້ດໍາເນີນທຸລະກິດນໍາເຂົ້າ ແລະ ຈໍາໜ່າຍນໍ້າມັນເຊື້ອໄຟໃຫ້ຫຼາຍໂຄງການໃຫຍ່ໆຂອງຊາດ ອັນໄດ້ປະກອບສ່ວນສໍາຄັນໃນການສ້າງສາ ແລະ ພັດທະນາປະເທດຊາດ. ປີ 2021 ຄາດວ່າຈະໃຫ້ສາມາດນໍາເຂົ້ານໍ້າມັນໄດ້ 150 ລ້ານລິດ.

ທ່ານ ເລື່ອມ ຍົງວົງສິດທິ ຮອງຜູ້ອຳນວຍການ ບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ກ່າວວ່າ: ບໍລິສັດເອັນທີພີການຄ້ານ້ຳມັນເຊື້ອໄຟ ມະຫາຊົນ ສ້າງຕັ້ງຂຶ້ນໃນວັນທີ 20 ທັນວາ 2015 ທຶນຈົດທະບຽນ 162 ຕື້ກີບ, ໃນນັ້ນທຶນຄົງທີ່ 80 ກວ່າຕື້ກີບ ແລະ ທຶນໝູນວຽນ 60 ກວ່າຕື້ກີບ. ປັດຈຸບັນເນື້ອທີ່ສາງນ້ຳມັນຕັ້ງຢູ່ບ້ານດົງຫຼວງ ເມືອງນາຊາຍທອງ ນະຄອນຫຼວງວຽງຈັນ ສາມາດບັນຈຸນ້ຳມັນໄດ້ 5 ລ້ານລິດ.

ບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ຍັງມີສາຂາຢູ່ແຂວງຫຼວງນ້ຳທາ, ແຂວງຄຳມ່ວນ ແລະ ສະຫວັນນະເຂດ; ປັດຈຸບັນມີພະນັກງານ 60 ກວ່າຄົນ, ມີພາຫະນະຂົນສົ່ງນໍ້າມັນທັງໝົດ 25 ຄັນ.

Image may contain: 1 person, sitting

ທ່ານກ່າວຕື່ມວ່າ: ບໍລິສັດ ເອັນທີພີການຄ້ານ້ຳມັນເຊື້ອໄຟ ມະຫາຊົນ ສາມາດນໍາເຂົ້ານໍ້າມັນຄອງສ່ວນແບ່ງຕະຫຼາດພາຍໃນປະເທດໄດ້ 7 – 8%; ສໍາລັບຕົວເລກການນໍາເຂົ້ານໍ້າມັນໃນປີຜ່ານມາ 50 ລ້ານລິດ, ສ່ວນການນໍາເຂົ້ານໍ້າມັນໃນປີ 2020 ສະເລ່ຍປະມານ 40 ລ້ານລິດ, ສໍາລັບແຜນປີ 2021 ຄາດວ່າຈະໃຫ້ສາມາດນໍາເຂົ້ານໍ້າມັນໄດ້ 150 ລ້ານລິດ.

ທ່ານກ່າວວ່າ: ການເປີດນໍາໃຊ້ໂຮງກັ່ນນໍ້າມັນຂອງລາວແຫ່ງທໍາອິດຈະສົ່ງຜົນດີຕໍ່ຕະຫຼາດນ້ຳມັນຢູ່ປະເທດເຮົາ ໂດຍພວກເຮົາມີຄວາມຫວັງວ່າຈະຫຼຸດການນໍາເຂົ້ານໍ້າມັນສໍາເລັດຮູບ, ຫຼຸດ ຄວາມສ່ຽງດ້ານອັດຕາແລກປ່ຽນ, ຫຼຸດປັດໄຈການອ່ອນຄ່າຂອງເງິນກີບ ແລະ ປະຢັດເວລາໃນການນໍາເຂົ້າ ແຕ່ກໍຕ້ອງເບິ່ງຄຸນນະພາບ, ລາຄາທີ່ເໝາະສົມ.

Image may contain: sky and outdoor

ສໍາລັບໂຮງກັ່ນນໍ້າມັນແຫ່ງທໍາອິດຂອງລາວ ພາຍໃຕ້ຊື່ ບໍລິສັດ ປີໂຕຣເຄມີລາວ ໄດ້ຈັດພິທີເປີດການຜະລິດໄລຍະທີ 1 ຂຶ້ນໃນວັນທີ 30 ພະຈິກ 2020 ທີ່ເຂດກວມລວມໄຊເສດຖາ ເຊິ່ງໄລຍະທີ 1 ນີ້ ຈະມີກຳລັງການຜະລິດ 1 ລ້ານໂຕນຕໍ່ປີ ຫຼັງຈາກເລີ່ມຜະລິດຢ່າງເປັນປົກກະຕິແລ້ວ ແຕ່ລະປີກໍຈະສາມາດຜະລິດນໍ້າມັນແອັດຊັງ, ນໍ້າມັນກາຊວນ, ນໍ້າມັນຍົນ, ແກ໊ສແຫຼວ ( LPG ), ທາດມາດ ແລະ ຜະລິດຕະພັນອື່ນໆຕາມມາດຕະຖານສາກົນ Euro V ເພື່ອສະໜອງຜະລິດຕະພັນນໍ້າມັນທີ່ປອດໄພ ແລະ ໝັ້ນຄົງໃຫ້ແກ່ ສປປ ລາວ. ພ້ອມຈະສືບຕໍ່ຂະຫຍາຍສາຍການຜະລິດ, ຂະຫຍາຍກໍາລັງການຜະລິດ ແລ້ວຄ່ອຍໆບັນລຸຕາມແຜນພັດທະນາໂຄງການໃນໄລຍະທີ 2, ທີ 3, ແລ້ວພັດທະນາໂຄງການໃຫ້ສາມາດບັນລຸການກັ່ນນໍ້າມັນໄດ້ 3 ລ້ານໂຕນຕໍ່ປີ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ