ຮູ້ຈັກ! ສາວພອນປະເສີດ ທັງງາມທັງເກັ່ງຈາກເວທີນາງສາວລາວ ສູ່ການນັກບານສົ່ງດາວເດັ່ນ(ຄລິບ) - Laoedaily

ຮູ້ຈັກ! ສາວພອນປະເສີດ ທັງງາມທັງເກັ່ງຈາກເວທີນາງສາວລາວ ສູ່ການນັກບານສົ່ງດາວເດັ່ນ(ຄລິບ)

ກາຍເປັນດາວປະຈໍາການແຂ່ງຂັນບານສົ່ງຫາດຊາຍ ທົ່ວປະເທດ ຊີງຂັນປະທານສະຫະພັນບານສົ່ງແຫ່ງຊາດລາວ ທີ່ຫາກໍສໍາເລັດໄປເມື່ອທ້າຍອາທິດ ທີ່ຜ່ານມາ ໄປເລີຍສໍາລັບ ນາງ ພອນປະເສີດ ເມືອງວົງ ສາວງາມຊາວນະຄອນຫຼວງວຽງຈັນ ທີ່ເຄີຍເຂົ້າປະກວດນາງສາວລາວປະຈໍາປີ 2019 ໄດ້ສ້າງຜົນງານໂດເດັ່ນໃນການແຂ່ງຂັນບານສົ່ງຫາດຊາຍ ທົ່ວປະເທດຄັ້ງທໍາອິດໃນຊີວິດ.

ການແຂ່ງຂັນບານສົ່ງຫາດຊາຍ ປະເພດທີມຊາຍປີນີ້ມີເຖິງ 16 ທີມເຂົ້າຮ່ວມຊີງໄຊ ແລະ ທີມຍິງມີເຖິງ 14 ທີມ ເຊິ່ງຈະໃຊ້ໄລຍະເວລາໃນການແຂ່ງຂັນ 4 ມື້ລະຫວ່າງວັນທີ 10-13 ທັນວາ 2020 ທີ່ສະໜາມເດີ່ນບານສົ່ງຫາດຊາຍ ທີ່ສະໜາມກີລາກອງທັບ ( ຫຼັກ 5 ).

ປາກົດວ່າ: ພອນປະເສີດ ເມືອງວົງ ປະກົດກາຍໃນການແຂ່ງຂັນບານສົ່ງກາດຊາຍ ທົ່ວປະເທດ ຄັ້ງທໍາອິດຄູ່ກັບ ນາງ ອ່ອນສີ ພົມມາ ສ້າງຜົນງານຢ່າງໂດດເດັ່ນ ພາສະໂມສອນ VBC ເພື່ອນຮັກບານສົ່ງ 1 ເອົາ ຊະນະ SPP 3 ໄປດ້ວຍຄະແນນ 2-0 ເຊັດ ເຊິ່ງເປັນໄຊຊະນະນັດທໍາອິດໃນລາຍການລະດັບທົ່ວປະເທດຂອງ ພອນປະເສີດ ກ່ອນທີ່ນັດທີ 2 ຈະເສຍ ແລະ ນັດທີ 3 ຈະຊະນະ ຜ່ານເຂົ້າສູ່ຮອບ 8 ທີມສຸດທ້າຍ ກ່ອນຕົກຮອບໄປ, ສ່ວນແຊ້ມເປັນຂອງ ແຂວງຈໍາປາສັກ ໃນບານສົ່ງຍິງທົ່ວປະເທດປະຈໍາປີ 2020.

ນາງ ພອນປະເສີດ ໃຫ້ສໍາພາດກັບທີມຂ່າວເສດຖະກິດ-ການຄ້າ ວ່າ: ຈຸດເລີ່ມຕົ້ນຂອງການເປັນນັກກີລາບານສົ່ງແມ່ນນ້ອງເລີ່ມຫຼິ້ນຕັ້ງແຕ່ຮຽນຢູ່ຊັ້ນມັດທະຍົມປີທີ 5 ທາງຄູອາຫານເຫັນນ້ອງມີແວວໃນການເປັນນັກກີລາ ແລະ ຫຼັງຈາກໄດ້ເລີ່ມຫຼິ້ນນ້ອງກໍຮູ້ສຶກມັກ ຈິ່ງໄດ້ເລີ່ມຫຼິ້ນນັບຕັ້ງແຕ່ນັ້ນມາ ຈົນມາເຖິງປີ 2020 ນ້ອງໄດ້ລົງແຂ່ງຂັນບານສົ່ງຫາດຊາຍ ລະດັບທົ່ວປະເທດເປັນຄັ້ງທໍາອິດ ແນ່ນອນໃນແມັດທໍາອິດກໍຮູ້ສຶກຕື່ນເຕັ້ນ ແລະ ສຸດທ້າຍນ້ອງກໍສາມາດເອົາຊະນະໄດ້ ສໍາລັບເສັ້ນທາງການເປັນນັກກີລາບານສົ່ງ ນອກກໍມີຄວາມຫວັງຢາກຕິດທີມຊາດ ໃນອະນາຄົດ.

ພອນປະເສີດ ກ່າວອີກວ່າ: ກ່ອນທີ່ນ້ອງຈະເຂົ້າສູ່ການປະກວດນາງສາວລາວ ໃນປີ 2019 ແມ່ນມີຮຸ່ນເອື້ອຍໃນທີມບານສົ່ງ ມາຊວນໄປປະກວດ ແລະ ນ້ອງກໍໄດ້ຮຽນຮູ້ຈາກເວທີດັ່ງກ່າວການເປັນແມ່ນຍິງລາວຫຼາຍຂຶ້ນ ລວມເຖິງການຮູ້ສັງຄົມພາຍນອກຫຼາຍຂຶ້ນ, ສ່ວນປັດຈຸບັນ ນ້ອງແມ່ນຮຽນຢູ່ ສະຖາບັນດົງຄຳຊ້າງ ປີທີ 1 ສາຂາພາສີ ຈົບມາກໍມີຄວາມຫວັງຢາກເຮັດວຽກທາງດ້ານນີ້.(ລາຍລະອຽດເບິ່ງຄລິບລຸ່ມນີ້ເພີ່ມຕື່ມ)

ສໍາລັບ ສາວ ພອນປະເສີດ ເກີດທີ່ບ້ານສີຖານເໜືອ ແລະ ປັດຈຸບັນໄດ້ຍ້າຍມາຢູ່ບ້ານໜອງປີງ ເຊິ່ງຕອນນີ້ແມ່ນອາຍຸ 18 ປີນໍ້າໜັກ 48 ກິໂລກຣາມ ແລະ ສູງ 170 ຊັງຕີແມັດ ຮຽນຢູ່ສະຖາບັນດົງຄຳຊ້າງ ປີທີ 1 ສາຂາພາສີ ເຄີຍເຂົ້າປະກວດນາງສາວລາວ ປະຈໍາປີ 2019 ຕົວແທນຂອງນະຄອນຫຼວງວຽງຈັນ ສາມາດເຂົ້າເຖິງຮອບ 40 ຄົນສຸດທ້າຍ ທັງທີ່ເປັນສາວນ້ອຍອະນາຄົດໄກ. ນອກຈາກ ຈະເປັນສາວທີ່ໜ້າງົດງາມລະດັບເວທີນາງສາວລາວແລ້ວ ຍັງເປັນນັກກີລາບານສົ່ງທີ່ໂດດເດັ່ນ ແລະ ມີອະນາຄົດໄກ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ