ລ້ຽງງົວແບບຟາມທຳມະຊາດ ສາມາດສ້າງລາຍໄດ້ບໍ່ຕໍ່າກວ່າ 60 ລ້ານກີບຕໍ່ປີ - Laoedaily

ລ້ຽງງົວແບບຟາມທຳມະຊາດ ສາມາດສ້າງລາຍໄດ້ບໍ່ຕໍ່າກວ່າ 60 ລ້ານກີບຕໍ່ປີ

ການປູກຝັງ – ລ້ຽງສັດ ແມ່ນວຽກງານໜຶ່ງທີ່ພັກ – ລັດ ໄດ້ໃຫ້ຄວາມສຳຄັນ ແລະ ໄດ້ວາງແນວທາງນະໂຍບາຍ ເພື່ອຫັນເອົາການຜະລິດເປັນສິນຄ້າ, ສ້າງພື້ນຖານໃຫ້ແກ່ການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວດັ່ງຄອບຄົວຂອງ ທ່ານ ໝອກ ແກ້ວຄໍາພັນ ເປັນອີກຄອບຄົວໜຶ່ງທີ່ໄດ້ເອົາໃຈໃສ່ຜັນຂະຫຍາຍນະໂຍບາຍດັ່ງກ່າວ ໂດຍການລ້ຽງສັດເປັນອາຊີບ ເພື່ອຕອບສະໜອງຊີ້ນສັດ ຮອງຮັບໃຫ້ແກ່ຄວາມຕ້ອງການບໍລິໂພກຂອງສັງຄົມ.

Image may contain: 1 person, standing, outdoor and nature

ທ່ານ ໝອກ ແກ້ວຄໍາພັນ ປະຊາຊົນບ້ານເລົ່າຄາ ເມືອງຫີນບູນ ແຂວງຄໍາມ່ວນ ມີສະມາຊິກໃນຄອບຄົວທັງໝົດ 6 ຄົນ ໂດຍ ທ່ານ ໝອກ ໃຫ້ສຳພາດວ່າ: ໃນເມື່ອກ່ອນອາຊີບຂອງຄອບຄົວແມ່ນເຮັດນາ ລາຍຮັບຢູ່ພາຍໃນຄອບຄົວແມ່ນພໍແຕ່ກຸ້ມຢູ່ກຸ້ມກິນ. ຫຼາຍປີຕໍ່ມາຈຶ່ງໄດ້ຫັນມາລອງຄ້າຂາຍໂດຍນໍາໃຊ້ທຶນຕົນເອງສົມທົບກັບເງິນກູ້ຢືມຈາກທະນາຄານມາຕັ້ງປ້ຳນ້ຳມັນ ແຕ່ພໍດໍາເນີນທຸລະກິດມາໄດ້ໄລຍະໜຶ່ງ ຈຶ່ງຄິດຢາກປະກອບອາຊີບທາງດ້ານກະສິກຳປູກຝັງ – ລ້ຽງສັດ ຈຶ່ງໄດ້ເລີ່ມຊື້ດິນໄວ້ເທື່ອລະໜ້ອຍໃນແຕ່ລະປີ; ໃນປີ 2014 ຈຶ່ງໄດ້ບຸກເບີກເນື້ອທີ່ດິນດັ່ງກ່າວ ເຊິ່ງໃນເບື້ອງຕົ້ນຄິດວ່າຈະປູກຢາງພາລາ ແຕ່ພໍໄດ້ໄປປຶກສາກັບໝູ່ທີ່ຮຽນຈົບທາງດ້ານກະສິກຳ ກໍເລີຍແນະນຳໃຫ້ລ້ຽງງົວຂາຍເປັນສິນຄ້າ ເພາະໄດ້ຜົນຕອບແທນທີ່ໄວກວ່າ ບວກກັບການປູກຢາງພາລາແມ່ນມີຄົນປູກຈຳນວນຫຼາຍແລ້ວ ເມື່ອໄດ້ຮັບຄຳແນະນຳຈາກໝູ່ແລ້ວກໍໄດ້ມາປຶກສາກັບຄອບຄົວ ຈຶ່ງໄດ້ຕັດສິນໃຈຫັນມາລ້ຽງງົວແບບທຳມະຊາດ ( ລ້ຽງແບບເປັນຟາມ ) ໂດຍໄດ້ເລີ່ມບຸກເບີກເນື້ອທີ່ ແລະ ໄດ້ຊື້ພໍ່ພັນ – ແມ່ພັນງົວພື້ນເມືອງ. ໃນນັ້ນ, ໄດ້ຊື້ງົວ ຈໍານວນ 67 ໂຕ ມູນຄ່າຊື້ 150 ລ້ານກີບ, ຫຼັງຈາກເລີ່ມລ້ຽງໃນປີທໍາອິດແມ່ນພົບກັບຄວາມຫຍຸ້ງຍາກ ເນື່ອງຈາກບົດຮຽນ ແລະ ປະສົບການຍັງບໍ່ທັນຫຼາຍ ເປັນຕົ້ນແມ່ນການບົວລະບັດຮັກສາ ແລະ ການປິ່ນປົວພະຍາດສັດ ຕະຫຼອດເຖິງລະບົບການເກັບນ້ຳ ແລະ ການຕອບສະໜອງອາຫານບໍ່ພຽງພໍ ເຮັດໃຫ້ມີງົວລົ້ມຕາຍຈຳນວນຫຼາຍໂຕ. ສະນັ້ນ, ຈຶ່ງໄດ້ໄປຂໍຄໍາແນະນໍາທາງດ້ານວິຊາການຈາກຫ້ອງການກະສິກໍາ ແລະ ປ່າໄມ້ ເມືອງຫີນບູນ. ມາຮອດປີ 2015 ຈຶ່ງໄດ້ເລີ່ມກໍ່ສ້າງບ່ອນເກັບນໍ້າ ພ້ອມທັງປູກ ຫຍ້າໄວ້ເປັນອາຫານສັດ ເພື່ອຕອບສະໜອງໃຫ້ພຽງພໍໃນລະດູແລ້ງ ພ້ອມທັງໄດ້ຊື້ງົວເຂົ້າມາເພີ່ມອີກຈຳນວນໜຶ່ງ ແລະ ໄດ້ຂະຫຍາຍເນື້ອທີ່ລ້ຽງອອກໄປຕື່ມ ເຊິ່ງຕົ້ນທຶນໃນການຊື້ພໍ່ – ແມ່ພັນງົວ ລວມທັງຈຳນວນທີ່ຊື້ທັງເກົ່າ ແລະ ໃໝ່ ມູນຄ່າປະມານ 450 ລ້ານ ກວ່າກີບ.

Image may contain: outdoor and nature

ຈາກນັ້ນ, ມາຮອດປີ 2017 ງົວທີ່ລ້ຽງຢູ່ໃນຟາມ ກໍໄດ້ເພີ່ມຈຳນວນຂຶ້ນມາເປັນ 300 ໂຕ ແລະ ໃນປີດຽວກັນກໍໄດ້ຂາຍໃຫ້ກັບບໍລິສັດເຂື່ອນໄຟຟ້າເທີນ – ຫີນບູນ ໃນຈຳນວນ 162 ໂຕ ລວມເປັນເງິນ 778 ລ້ານກີບ ເຊິ່ງເປັນຈຳນວນລາຍຮັບທີ່ສາມາດຕອບສະໜອງກັບກ້ອນເງິນທີ່ໄດ້ລົງທຶນໄປ ແລະ ໃນປີຕໍ່ໆມາກໍໄດ້ຈຳໜ່າຍອອກປະມານ 20 ກວ່າໂຕ ສາມາດສ້າງລາຍຮັບໄດ້ປະມານ 60 ລ້ານກວ່າກີບຕໍ່ປີ ເຊິ່ງປັດຈຸບັນຍັງມີງົວທັງໝົດ 160 ກວ່າໂຕ, ມີເນື້ອທີ່ລ້ຽງ 160 ເຮັກຕາ; ໃນຈຳນວນເນື້ອທີ່ດັ່ງກ່າວແມ່ນໄດ້ໄຖປັບດິນ ແລະ ຫວ່ານຫຍ້າແລ້ວ 30 ເຮັກຕາ ເຊິ່ງຖ້າທຽບໃສ່ກັບຄວາມຕ້ອງການຂອງງົວໃນຈຳນວນດັ່ງກ່າວ ໂດຍສະເພາະໃນລະດູແລ້ງແມ່ນຍັງບໍ່ພຽງພໍ ແລະ ໃນອະນາຄົດຕໍ່ໜ້າ ຖ້າຫາກມີແຫຼ່ງທຶນກູ້ຢືມໃນອັດຕາດອກເບ້ຍທີ່ຕໍ່າ ແມ່ນຈະຂະຫຍາຍເນື້ອທີ່ປູກຫຍ້າເພີ່ມ ພ້ອມທັງຕິດຕັ້ງລະບົບຫົດນໍ້າປູກຫຍ້າທີ່ຖາວອນ ເພື່ອຕອບສະໜອງຫຍ້າໄດ້ຢ່າງພຽງພໍ ແລະ ເພີ່ມຈຳນວນສັດໃຫ້ໄດ້ຫຼາຍຂຶ້ນກວ່າເກົ່າ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ