ໝາກຖົ່ວເບີທີ່ນັກທຸລະກິດສົ່ງເສີມປະຊາຊົນປູກ ຍັງບໍ່ສາມາດສົ່ງອອກໄປ ສປ ຈີນ ໄດ້ - Laoedaily

ໝາກຖົ່ວເບີທີ່ນັກທຸລະກິດສົ່ງເສີມປະຊາຊົນປູກ ຍັງບໍ່ສາມາດສົ່ງອອກໄປ ສປ ຈີນ ໄດ້

ຕາມການໃຫ້ສໍາພາດຂອງ ທ່ານ ສົມໄຈ ບຸນໄຊທິບ ຕາງໜ້ານັກທຸລະກິດຈີນໃຫ້ຮູ້ກ່ຽວກັບການສົ່ງໝາກຖົ່ວເບີອອກໄປ ສປ ຈີນ ວ່າ: ປັດຈຸບັນທາງບໍລິສັດບໍ່ສາມາດສົ່ງໝາກຖົ່ວເບີໄປ ສປ ຈີນ ຍ້ອນວ່າເຈົ້າໜ້າທີ່ຝ່າຍຈີນ ບໍ່ອະນຸຍາດໃຫ້ນຳເຂົ້າ ແລະ ທາງບໍລິສັດກໍບໍ່ຮູ້ສາເຫດເຊັ່ນກັນ, ສ່ວນເຈົ້າໜ້າທີ່ຝ່າຍລາວແມ່ນໄດ້ອະນຸມັດຖືກຕ້ອງຕາມລະບຽບແລ້ວ. ດັ່ງນັ້ນ, ຈຶ່ງເຮັດໃຫ້ໝາກຖົ່ວຄ້າງໃນລົດຂົນສົ່ງເປັນເວລາຫຼາຍວັນ ເຮັດໃຫ້ໝາກຖົ່ວເສຍຄຸນນະພາບ ແລະ ເນົ່າເປື່ອຍຕາມເວລາ, ພ້ອມທັງໄດ້ຄິດໄລ່ເງິນ 1.000 ຢວນຕໍ່ມື້ ໃຫ້ເຈົ້າຂອງລົດຂົນສົ່ງທີ່ເສຍເວລາຕື່ມອີກ.

ມາຮອດວັນທີ 13 ທັນວາ 2020 ທາງບໍລິສັດຈຶ່ງໄດ້ຕັດສິນໃຈນໍາເອົາໝາກຖົ່ວໄປຖອກຖິ້ມຢູ່ສະໜາມຂີ້ເຫຍື້ອ, ສ່ວນທີ່ຍັງດີ ແລະ ກິນໄດ້ແມ່ນໄດ້ແຈກຢາຍໃຫ້ປະຊາຊົນໄປບໍລິໂພກ ເຊິ່ງລວມມີໝາກຖົ່ວທັງໝົດ ຈຳນວນ 80 ກວ່າໂຕນ ມູນຄ່າເສຍຫາຍທັງໝົດ 8 ແສນກວ່າຢວນ ຄິດເປັນເງິນກີບ 1 ຕື້ 2 ຮ້ອຍລ້ານກວ່າກີບ.

ທ່ານຍັງໃຫ້ຮູ້ຕື່ມວ່າ: ຜ່ານມາທາງບໍລິສັດໄດ້ສົ່ງເສີມປະຊາຊົນປູກໝາກຖົ່ວເບີ ຢູ່ເມືອງຕົ້ນເຜິ້ງ ແຂວງບໍ່ແກ້ວ ມາເປັນເວລາ 5 ປີແລ້ວ, ໃນແຕ່ລະປີການສົ່ງອອກແມ່ນບໍ່ມີບັນຫາ, ແຕ່ຕົກມາປີ 2020 ນີ້ ໄດ້ພົບ ຄວາມຫຍຸ້ງຍາກ, ເນື່ອງຈາກວ່າທາງ ສປ ຈີນ ບໍ່ອະນຸຍາດໃຫ້ນຳເຂົ້າ ແລະ ທາງບໍລິສັດກໍຍັງບໍ່ທັນຮູ້ສາເຫດເຊັ່ນກັນ.

ປັດຈຸບັນປະຊາຊົນພວມເລັ່ງເກັບກູ້ຜົນລະປູກ ເຊິ່ງ    ໄດ້ເລີ່ມມາແຕ່ເດືອນພະຈິກ 2020 ແລະ ຈະເກັບກູ້ໄປຮອດທ້າຍເດືອນພຶດສະພາ 2021 ຈຶ່ງຈະສຳເລັດ, ຖ້າເກັບກູ້ສໍາເລັດຈະໄດ້ 700 – 800 ຖ້ຽວລົດຄອນເທັນເນີ ໃນຈໍານວນ 22 ພັນກວ່າໂຕນ, ໃນໂອກາດດັ່ງກ່າວທາງບໍລິສັດກໍໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງໃຫ້ການຊ່ວຍເຫຼືອ ແລະ ຊ່ວຍແກ້ໄຂເພື່ອເຮັດໃຫ້ໝາກຖົ່ວເບີສາມາດສົ່ງອອກໄປ ສປ ຈີນໄດ້.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ