ບໍລິສັດ ສະຕາໂທລະຄົມ ສາຂາແຂວງໄຊຍະບູລີ ສຳມະນາວຽກງານເຕັກໂນໂລຊີ, ຂໍ້ມູນຂ່າວສານ - Laoedaily

ບໍລິສັດ ສະຕາໂທລະຄົມ ສາຂາແຂວງໄຊຍະບູລີ ສຳມະນາວຽກງານເຕັກໂນໂລຊີ, ຂໍ້ມູນຂ່າວສານ

ເມື່ອມໍ່ໆມານີ້ ບໍລິສັດ ສະຕາໂທລະຄົມ ສາຂາໄຊຍະບູລີ ໄດ້ຈັດກອງປະຊຸມສຳມະນາກ່ຽວກັບວຽກງານເຕັກໂນໂລຊີ, ຂໍ້ມູນຂ່າວສານ ແລະ ດິຈິຕອນ ຂຶ້ນທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ; ເປັນກຽດເຂົ້າຮ່ວມຂອງ ທ່ານ ອິນສະຫວັນ ພົມປັນຍາ ຫົວໜ້າພະແນກໄປສະນີ ໂທລະຄົມມະນາຄົມ ແລະ ການສື່ສານແຂວງໄຊຍະບູລີ ມີທ່ານ ບຸນມີ ມາລາວົງ ຮອງຜູ້ອຳນວການໃຫຍ່ ບໍລິສັດ ສະຕາໂທລະຄົມ ຈຳກັດ, ບັນດາພະແນກການຂອງແຂວງ ແລະ ທະນາຄານພາຍໃນແຂວງເຂົ້າຮ່ວມ.

ບັນດາຜູ້ເຂົ້າຮ່ວມໄດ້ຮັບຟັງການແນະນຳຂໍ້ມູນ ກ່ຽວກັບວຽກງານເຕັກໂນໂລຊີ, ຂໍ້ມູນຂ່າວສານ ແລະ ດິຈິຕອນເປັນຕົ້ນ ລະບົບຢູອັອບຟິສ, ວິດີໂອຄອນເຟີເຣັນ, ຢູມັນນີ ເຊິ່ງແມ່ນຜະລິດຕະພັນສໍາເລັດຮູບ, ທາງເລືອກດ້ານລະບົບໄອທີ.

ຢູອັອບຟິສ ແມ່ນໝາຍເຖິງລະບົບຫ້ອງການ ແລະ ເອກະສານເອເລັກໂຕຣນິກ ທີ່ນໍາໃຊ້ຜ່ານລະບົບ ຄລາວ ທີ່ນໍາມາໃຊ້ເຂົ້າໃນການຈັດການເອກະສານ, ເກັບຮັກສາເອກະສານ, ການຄົ້ນຫາ – ການສົ່ງຕໍ່ເອກະສານ, ການສົ່ງເຊັນເອກະສານຜ່ານເອເລັກໂຕຣນິກໃຫ້ມີ ຄວາມສະດວກ, ທັນສະໄໝ, ປະຢັດເວລາ ແລະ ຄ່າໃຊ້ຈ່າຍຕ່າງໆທີ່ເໝາະແກ່ບັນດາອົງການຈັດຕັ້ງລັດຖະບານ, ບັນດາກະຊວງ, ບັນດາຫົວໜ່ວຍທຸລະກິດ, ບັນດາທະນາຄານຕ່າງໆ.

ສໍາລັບການປະຊຸມທາງໄກ ຫຼື ວິດີໂອຄອນເຟີເຣັນ ແມ່ນເປັນລະບົບທີ່ນໍາໃຊ້ເພື່ອຈັດກອງປະຊຸມທາງໄກແບບທັນສະໄໝ ສາມາດຈັດກອງປະຊຸມໄດ້ຢ່າງວ່ອງໄວໄດ້ທຸກທີ່ ທຸກເວລາ ທີ່ມີສັນຍານອິນເຕີເນັດ ເຮັດໃຫ້ຫຼຸດຜ່ອນຄ່າໃຊ້ຈ່າຍໃນການກະກຽມກອງປະຊຸມ, ຊ່ວຍປະຢັດການລົງທຶນ ແລະ ການບໍລິຫານ ໂດຍນໍາໃຊ້ໄດ້ຜ່ານໂທລະສັບມືຖື, ເດັດທ໋ອບ, ໂນດບຸກ ແລະ ຄອມພິວເຕີຕັ້ງໂຕະ, ການບໍລິການຕ່າງໆຍັງຮັບປະກັນ ຄວາມລັບ ແລະ ມີຄວາມປອດໄພສູງ.

ສ່ວນຢູມັນນີແມ່ນຜະລິດຕະພັນໜຶ່ງທີ່ຂຶ້ນກັບ ບໍລິສັດ ສະຕາໂທລະຄົມ ຈຳກັດ ເຮັດໜ້າທີ່ບໍລິການດ້ານການເງິນຜ່ານມືຖື ທີ່ອໍານວຍຄວາມສະດວກໃຫ້ແກ່ການດໍາລົງຊີວິດຂອງຜູ້ຊົມໃຊ້ ເປັນຕົ້ນ: ແມ່ນການໂອນເງິນ, ການຖອນເງິນ, ການຊໍາລະຄ່າໂທລະສັບ, ຄ່າອິນເຕີເນັດ, ການຊື້ເຄື່ອງອຸປະໂພກ – ບໍລິໂພກ, ຊື້ຫວຍ, ການເບີກຈ່າຍເງິນເດືອນໃຫ້ພະນັກງານ ແລະ ບໍລິການອື່ນໆ. ຢູມັນນີ ນອກຈາກຈະເຮັດໃຫ້ຜູ້ຊົມໃຊ້ມີຄວາມທັນສະໄໝ, ສະດວກສະບາຍແລ້ວ, ຍັງຫຼຸດຜ່ອນຄວາມສ່ຽງໃນການເດີນທາງ, ຫຼຸດຜ່ອນຄວາມສ່ຽງໃນການຖືກໂຈລະກໍາປຸ້ນຈີ້, ຊີງຊັບ, ເປັນລະບົບທີ່ມີຄວາມປອດໄພສູງ ເພາະຈະມີຂໍ້ ຄວາມແຈ້ງເຕືອນເພື່ອຢືນຢັນທຸກໆການເຄື່ອນໄຫວເຮັດທຸລະກໍາຂອງທ່ານ.

ທ່ານ ອິນສະຫວັນ ພົມປັນຍາ ໄດ້ມີຄໍາເຫັນວ່າ: ການຈັດກອງປະຊຸມສຳມະນາກ່ຽວກັບວຽກງານເຕັກໂນໂລຊີ, ຂໍ້ມູນຂ່າວສານ ແລະ ດິຈິຕອນຄັ້ງນີ້ ກໍເພື່ອເຮັດໃຫ້ພະນັກງານພະແນກການ ແລະ ກົມກອງພາຍໃນແຂວງໄຊຍະບູລີ ໄດ້ມີ ຄວາມຮັບຮູ້ເຂົ້າໃຈເລື່ອງການນໍາໃຊ້ລະບົບເຕັກໂນໂລຊີທີ່ທັນສະໄໝ ເພື່ອຈະໄດ້ນໍາໃຊ້ເຂົ້າໃນການພັດທະນາວຽກງານພັດທະນາກົມກອງ ໃຫ້ມີ ຄວາມກ້າວໜ້າທັນສະໄໝທຽບທັນກັບສາກົນເທື່ອລະກ້າວ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ