ອິອອນ ກະຕຸ້ນລູກຄ້າໃຊ້ບັດສະມາຊິກເພື່ອເປັນສ່ວນຫຼຸດໃນສິນຄ້າ ແລະ ບໍລິການທີ່ຫຼາກຫຼາຍ - Laoedaily

ອິອອນ ກະຕຸ້ນລູກຄ້າໃຊ້ບັດສະມາຊິກເພື່ອເປັນສ່ວນຫຼຸດໃນສິນຄ້າ ແລະ ບໍລິການທີ່ຫຼາກຫຼາຍ

ປັດຈຸບັນ ບໍລິສັດ ອິອອນ ບໍລິການເຊົ່າສິນເຊື່ອ (ລາວ) ຈຳກັດ ( AEON Leasing Service (Lao) Company Limited ) ມີລູກຄ້າທີ່ມີບັດສະມາຊິກອິອອນປະມານ 30.000 ບັດ ເຊິ່ງບັດສະມາຊິກນີ້ນອກຈາກຈະມີໄວ້ຜ່ອນສິນຄ້າຕ່າງໆແລ້ວຍັງສາມາດ ນຳໃຊ້ເພື່ອເປັນສ່ວນຫຼຸດໃນສິນຄ້າ ແລະ ບໍລິການຕ່າງໆອີກຫຼາກຫຼາຍ


ທ່ານນາງ ສຸພັດຕຣາ ຣັກຂຸມແກ້ວ ກຳມະການບໍລິຫານ ສົ່ງເສີມທຸລະກິດ ບໍລິສັດ ອິອອນ ບໍລິການເຊົ່າສິນເຊື່ອ (ລາວ) ຈຳກັດ ກ່າວວ່າ: ທາງພວກເຮົາໄດ້ມີສິດທິພິເສດໃຫ້ກັບລູກຄ້າທີ່ມີບັດສະມາຊິກຂອງເຮົາຢ່າງຕໍ່ເນື່ອງຊຶ່ງໃນປັດຈຸບັນເຮົາມີຮ້ານຄ້າ ແລະ ບໍລິການຕ່າງໆທີ່ເຂົ້າຮ່ວມໂຄງການເພື່ອມອບສ່ວນຫຼຸດໃຫ້ແກ່ຜູ້ທີ່ໃຊ້ບັດສະມາຊິກອິອອນເຊັ່ນ: ຮ້ານອາຫານ, ຮ້ານກາເຟ, ຮ້ານເສີມສວຍ, ຮ້ານຂາຍແກັສ, ຮ້ານຂາຍເຄື່ອງນອນ ປະມານ 100 ຮ້ານຄ້າທີ່ເຂົ້າຮ່ວມ.

ວິທີການໃຊ້ບັດກໍງ່າຍໆພຽງແຕ່ລູກຄ້ານຳບັດມາສະແດງໃຫ້ກັບຮ້ານຄ້າທີ່ເຂົ້າຮ່ວມລາຍການທ່ານກໍຈະໄດ້ສ່ວນຫຼຸດທັນທີ; ພ້ອມກັນນັ້ນ ທ່ານນາງ ສຸພັດຕຣາ ຣັກຂຸມແກ້ວ ໄດ້ກ່າວອີກວ່າພຽງແຕ່ທ່ານຖືບັດຕິດໂຕ ແລະ ກໍບໍ່ລືມທີ່ຈະໃຊ້ກໍຈະໄດ້ຮັບສິດທິພິເສດທຸກການໃຊ້ຈ່າຍ ບັດນີ້ເປັນບັດສ່ວນຫຼຸດຂອງຄົນມີເຄຣດິດ

ນອກຈາກນີ້ທາງ ບໍລິສັດ ອິອອນ ບໍລິການເຊົ່າສິນເຊື່ອ (ລາວ) ຈຳກັດ ໄດ້ວາງແຜນການໃນປີ 2021 ຈະມີການເພີ່ມຮ້ານຄ້າທີ່ເຂົ້າຮ່ວມລາຍການເພື່ອຈະເຮັດໃຫ້ລູກຄ້າສາມາດໄດ້ໃຊ້ສ່ວນຫຼຸດໃນສິນຄ້າ ແລະ ບໍລິການທີ່ຫຼາກຫຼາຍ.

ບໍລິສັດ ອິອອນ ບໍລິການເຊົ່າສິນເຊື່ອ (ລາວ) ຈຳກັດ (Aeon Leasing Service (Lao) Company Limited ) ໄດ້ຮັບອະນຸຍາດຈົດທະບຽນໃນປະເທດລາວ ແລະ ເລີ່ມທຸລະກິດຕັ້ງແຕ່ວັນທີ 18 ຕຸລາ 2013 ລົງທຶນໂດຍ ບໍລິສັດ ອິອອນ ທະນະສິນຊັບ (ປະເທດໄທ) ຈໍາກັດ (ມະຫາຊົນ) ແລະ ກຸ່ມບໍລິສັດໃນເຄືອອິອອນ.

ບໍລິສັດ ອິອອນ ບໍລິການເຊົ່າສິນເຊື່ອ (ລາວ) ຈຳກັດ ດຳເນີນທຸລະກິດ ໂດຍການໃຫ້ບໍລິການ ທາງການເງິນສິນເຊື່ອລາຍຍ່ອຍແກ່ລູກຄ້າ ປະຊາຊົນຜູ້ທີ່ຕ້ອງການໃຊ້ບໍລິການສິິນເຊື່ອໃນການຜ່ອນສິນຄ້າ ຈາກກຸ່ມຮ້ານຄ້າຕົວແທນຫຼາຍປະເພດເຊັ່ນ: ກຸ່ມສິນຄ້າ ເຄື່ອງໃຊ້ໄຟຟ້າ, ຄອມພິວເຕີ, ໂນ້ດບຸກ, ໂທລະສັບມືຖື, ເຄື່ອງໃຊ້ສຳນັກງານ, ເຟີນິເຈີ, ລົດຖີບ, ລົດຈັກ, ລົດໃຫຍ່ ແລະ ຄຳ; ລວມເຖິງບໍລິການສິນເຊື່ອສິນຄ້າປະເພດໃໝ່ທີ່ຈະຂະຫຍາຍເພີ່ມໃນອະນາຄົດ. ປັດຈຸບັນ ມີຮ້ານຄ້າ ແລະ ຄູ່ຮ່ວມທາງທຸລະກິດຫຼາຍກວ່າ 300 ຮ້ານຄ້າ ແລະ ຈຳນວນລູກຄ້າແມ່ນນັບມື້ນັບເພີ່ມຂຶ້ນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ