ໄຊຍະບູລີ ປືກສາຫາລືການກະກຽມບຸນຊ້າງ ປະຈໍາປີ 2021 ລໍຖ້າຟັງລາຍລະອຽດທ້າຍເດືອນນີ້! - Laoedaily

ໄຊຍະບູລີ ປືກສາຫາລືການກະກຽມບຸນຊ້າງ ປະຈໍາປີ 2021 ລໍຖ້າຟັງລາຍລະອຽດທ້າຍເດືອນນີ້!

ກອງປະຊຸມ ປຶກສາຫາລື ກ່ຽວກັບການກະກຽມຈັດງານບຸນຊ້າງປະຈໍາປີ 2021 ຈັດຂຶ້ນໃນວັນທີ 15 ທັນວາ 2020 ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ກົມກອງ ແລະ ພະນັກງານວິຊາການຈາກຫ້ອງວ່າການແຂວງ ເຂົ້າຮ່ວມ, ເຊິ່ງກອງປະຊຸມໄດ້ຜ່ານ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການແຕ່ງຕັ້ງຄະນະຮັບຜິດຊອບ ຊີ້ນໍາການກະກຽມ ແລະ ຈັດງານບຸນຊ້າງ ໄຊຍະບູລີ ປະຈໍາປີ 2021.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ປືກສາຫາລືກ່ຽວກັບການກໍານົດຕາຕະລາງ, ວັນ, ເວລາມື້ຈັດງານບຸນ, ກໍານົດບັນດາກິດຈະກໍາຕ່າງໆ ເຊັ່ນ: ການສະແດງຂອງຊ້າງຈໍານວນໜຶ່ງ, ການຂີ່ຊ້າງອ້ອມເມືອງ, ບາສີສູຂວັນຊ້າງ, ການໃສ່ບາດ-ຍາດນໍ້າ ເພື່ອອຸທິດບຸນກຸສົນໄປໃຫ້ຊ້າງ, ວາງສະແດງສິນຄ້າໂອດດັອບຂອງທ້ອງຖິ່ນ, ການສະແດງສິລະປະ-ວັນນະຄະດີ ແລະ ອື່ນໆ, ເຊິ່ງການຈັດງານບຸນຊ້າງປະຈໍາປີ 2021 ນີ້ ແມ່ນຈະໄດ້ເຮັດນ້ອຍຕາມຮີດຄອງປະເພນີ, ທັງນີ້ ກໍເພື່ອປະຕິບັດຕາມມາດຕະການຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ສ່ວນລາຍລະອຽດຄະນະຮັບຜິດຊອງຈັດງານບຸນ ຈະໄດ້ມີການຖະແຫລງຂ່າວໃຫ້ຮູ້ໃນທ້າຍເດືອນນີ້.

ໂອກາດນີ້, ທ່ານ ເພັດພິໄຊ ສູນວິໄລ ກໍໄດ້ຮຽກຮ້ອງ ມາຍັງບັນດາທ່ານທີ່ຖືກແຕ່ງຕັ້ງຮັບຜິດ ຊອບໃນການກະກຽມຈັດງານບຸນຄັ້ງນີ້, ຈົ່ງເພີ່ມທະວີຄວາມເປັນເຈົ້າການເຮັດໜ້າທີ່-ທີ່ໄດ້ມອບໝາຍໃຫ້ສໍາເລັດ, ທັງນີ້ ກໍເພື່ອເຮັດໃຫ້ການຈັດງານບຸນຊ້າງ ໄດ້ຮັບຜົນສໍາເລັດຕາມລະດັບຄາດໝາຍ ແລະ ຮັບປະກັນຄວາມປອດໄພຮອບດ້ານ.

ຂ່າວ-ພາບ: ອຸ່ນເຮືອນ ໂພທິລັກ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ