ຄວາມຄິດດີ ປະຍຸກເຄື່ອງຈັກສານ ເພີ່ມມູນຄ່າໃຫ້ແກ່ຜະລິດຕະພັນ - Laoedaily

ຄວາມຄິດດີ ປະຍຸກເຄື່ອງຈັກສານ ເພີ່ມມູນຄ່າໃຫ້ແກ່ຜະລິດຕະພັນ

ການນຳເອົາສິນຄ້າຫັດຖະກຳຈັກສານມາປະຍຸກ ຫຼື ປະສົມປະສານໃຫ້ມີລັກສະນະມາດຕະຖານສາກົນ ສາມາດສ້າງມູນຄ່າເພີ່ມໃຫ້ຜະລິດຕະພັນໄດ້, ເປັນທີ່ສົນໃຈຂອງລູກຄ້າ.

ຄໍລຳຊື້ໄດ້ – ຂາຍໝານວັນນີ້ ຈະນຳສະເໜີຮ້ານຫັດຖະກຳ 3 ນາງ ເປັນອີກຮ້ານໜຶ່ງທີ່ມີຄວາມໂດດເດັ່ນໃນການປະດິດເຄື່ອງຫັດຖະກຳຈັກສານແບບທຳມະດາ ໃຫ້ມີຄວາມງົດງາມໄດ້.

ທ່ານ ນາງ ລິດຕ້າ ຈັນທະວອນ ຜູ້ກໍ່ຕັ້ງຮ້ານຫັດຖະກຳ 3 ນາງ ໃຫ້ສຳພາດວ່າ: ກ່ອນຈະມາເລີ່ມເຮັດຮ້ານຫັດຖະກຳນີ້ ຕົນເອງໄດ້ໄປຮຽນຢູ່ ສປ ຈີນ ແລະ ໄດ້ໄປເຫັນກະເປົາສານດ້ວຍຫວາຍທີ່ຄົນນິຍົມໃຊ້ກັນ ບວກກັບ ຄວາມມັກໃຊ້ຂອງຕົນເອງ ເມື່ອຮຽນຈົບມາຈາກຈີນ ກໍເລີຍລອງມາເຮັດ ແລະ ຄິດອອກແບບເບິ່ງ ໂດຍມີເອື້ອຍ ແລະ ນ້າສາວ ມາຮ່ວມເປັນຮຸ້ນສ່ວນນຳກັນ.

ในภาพอาจจะมี 1 คน, กำลังยืน และอาหาร

ການເຮັດຜະລິດຕະພັນຫັດຖະກຳນີ້ ແມ່ນລົງມືເຮັດແບບຈິງຈັງໃນໄລຍະເດືອນກຸມພາ 2020 ເຊິ່ງເປັນໄລຍະທີ່ເລີ່ມມີການລະບາດຂອງພະຍາດໂຄວິດ – 19 ແລະ ມີແນວຄິດເພື່ອຊຸກຍູ້ສົ່ງເສີມທຸລະກິດຢູ່ພາຍໃນຂອງຄົນລາວເຮົາເອງ ເພາະວ່າບໍ່ສາມາດສົ່ງອອກສິນຄ້າໄດ້, ການປະດິດສິນຄ້າແບບນີ້ແມ່ນເພື່ອຍົກສູງມູນຄ່າຂອງຜະລິດຕະພັນ ພ້ອມທັງດ້ານຄຸນນະພາບກໍຢາກໃຫ້ສາມາດໃຊ້ດີ, ທົນທານໃຫ້ສົມກັບລາຄາ ແລະ ການຜະລິດຂອງພວກເຮົາແມ່ນມີການປະຍຸກໃຫ້ມີລັກສະນະມາດຕະຖານສາກົນຄ້າຍຄືກະເປົາຍີ່ຫໍ້ທີ່ມີຊື່ສຽງ ເຮັດແນວໃດເພື່ອໃຫ້ມັນງາມຂຶ້ນ ແລະ ຍັງຄົງ ຄວາມເປັນເອກະລັກລາວ ເຊິ່ງການອອກແບບຈາກຕົນເອງທີ່ເປັນຄົນມັກໃຊ້ສິນຄ້າມີຍີ່ຫໍ້ແລ້ວຫັນເອົາມາປະດິບ ແລະ ພາຍຫຼັງຜະລິດມາ ເຫັນວ່າຕະຫຼາດກໍຄືຄົນລາວ ເລີ່ມຫັນມາໃຊ້ກະເປົາແບບເຮັດດ້ວຍມື ( Hand Made ) ຫຼາຍຂຶ້ນ ແລະ ຕໍ່ໄປກໍຈະເອົາຜ້າລາວປະສົມໃສ່.

ไม่มีคำอธิบายรูปภาพ

ທ່ານ ນາງ ລິດຕ້າ ຈັນທະວອນ ໃຫ້ຮູ້ຕື່ມອີກວ່າ: ຂັ້ນຕອນການເຮັດແມ່ນໃຫ້ຊາວບ້ານເປັນຜູ້ຜະລິດ ແຕ່ດ້ານການອອກແບບຕ່າງໆແມ່ນພວກເຮົາ ໂດຍພວກເຮົາຈະມີຄ່າແຮງງານໃຫ້ຊາວບ້ານ ແລະ ຖືເປັນການສົ່ງເສີມຊາວບ້ານໄປໃນຕົວເລີຍ, ປັດຈຸບັນຮ້ານພວກເຮົາຜະລິດໄດ້ຫຼາຍຢ່າງ ແຕ່ຜະລິດຕະພັນຫຼັກໆຂອງທາງຮ້ານແມ່ນຈະມີກະເປົາ ແລະ ກະຕ່າ ໂດຍຕະຫຼາດຈຳໜ່າຍແມ່ນທາງອອນລາຍ ຜ່ານເພຈ໌ເຟສບຸ໊ກ: Heart made Craftbang ແລະ ປາກຕໍ່ປາກ ຄືຜູ້ນີ້ໃຊ້ໄປແລ້ວກໍບອກຕໍ່ ໂດຍລາຄາຂາຍຈະມີເລີ່ມຈາກ 1 ແສນກີບ ຂຶ້ນຕາມຍີ່ຫໍ້ ແລະ ວັດຖຸດິບທີ່ນຳມາໃຊ້. ພ້ອມດຽວກັນຄິດວ່າໃນອະນາຄົດດ້ວຍກະແສລາວຊ່ວຍລາວ ຈະເຮັດໃຫ້ຜະລິດຕະພັນທີ່ເຮັດດ້ວຍມືຂອງພວກເຮົາ ຈະມີຄວາມຕ້ອງການເພີ່ມຂຶ້ນ ແຕ່ພວກເຮົາກໍຕ້ອງໄດ້ເຮັດອັນໃໝ່ໆໃຫ້ລູກຄ້າສົນໃຈ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ