ເປັນທາງການແລ້ວ! ກຳນົດເປີດທາງດ່ວນນະຄອນຫຼວງວຽງຈັນ - ວັງວຽງ 20 ທັນວານີ້ - Laoedaily

ເປັນທາງການແລ້ວ! ກຳນົດເປີດທາງດ່ວນນະຄອນຫຼວງວຽງຈັນ – ວັງວຽງ 20 ທັນວານີ້

ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການເລກທີ 1349/ຫສນຍ ລົງວັນທີ 11 ທັນວາ 2020 ເລື່ອງ ທິດຊີ້ນໍາກ່ຽວກັບພິທີເປີດການນໍາໃຊ້ທາງດ່ວນໄລຍະນະຄອນຫຼວງວຽງຈັນ ຫາ ວັງວຽງ.

ອີງຕາມດໍາລັດສະບັບເລກທີ 93/ນຍ ລົງວັນທີ 3 ມີນາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງວ່າການສໍານັກງານນາຍົກລັດຖະມົນຕີ, ອີງຕາມເອກະສານສະເໜີຂອງກະຊວງແຜນການ ແລະ ການລົງທຶນ ສະບັບເລກທີ 2084/ກຜທ ລົງວັນທີ 09 ທັນວາ 2020 ແລະ ອີງຕາມການຕົກລົງ ແລະ ເຫັນດີຂອງ ທ່ານນາຍົກລັດຖະມົນຕີ ຄັ້ງວັນທີ 10 ທັນວາ 2020. ຫ້ອງວ່າການສໍານັກງານນາຍົກລັດຖະມົນຕີ ແຈ້ງການຂໍ້ຕົກລົງ ແລະ ເຫັນດີຂອງທ່ານນາຍົກລັດຖະມົນຕີ ຄື:

Image may contain: sky, tree, cloud, plant, road, outdoor and nature

1.ເຫັນດີອະນຸມັດໃຫ້ຈັດພິທີເປີດການນຳໃຊ້ທາງດ່ວນໄລຍະນະຄອນຫຼວງວຽງຈັນ ຫາ ວັງວຽງ ຢ່າງເປັນທາງການ ໃນວັນທີ 20 ທັນວາ 2020 ໂດຍບໍ່ເສຍຄ່າທໍານຽມຜ່ານທາງເປັນເວລາ 3 ວັນ ໃນລະຫວ່າງວັນທີ 21 – 23 ທັນວາ 2020 ເພື່ອເປັນການຊົມເຊີຍວັນຊາດທີ 2 ທັນວາ ຄົບຮອບ 45 ປີ ຕາມການສະເໜີຂອງກະຊວງແຜນການ ແລະ ການລົງທຶນ.

2.ມອບໃຫ້ກະຊວງແຜນການ ແລະ ການລົງທຶນ ເປັນໃຈກາງປະສານສົມທົບກັບ ກະຊວງໂຍທາທິການ ແລະ ຂົນສົ່ງ, ກະຊວງການ ຕ່າງປະເທດ, ນະຄອນຫຼວງວຽງຈັນ, ແຂວງວຽງຈັນ ແລະ ພາກສ່ວນກ່ຽວຂ້ອງ ເພື່ອກະກຽມຄວາມພ້ອມຮອບດ້ານໃນການເປີດການນໍາໃຊ້ທາງດ່ວນດັ່ງກ່າວ ”. ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້.

Image may contain: sky, plant, tree, bridge, cloud, grass, outdoor and nature

ໂຄງການກໍ່ສ້າງທາງດ່ວນນະຄອນຫຼວງວຽງຈັນ – ເມືອງວັງວຽງ ແຂວງ ວຽງຈັນ ມີຈຸດເລີ່ມຕົ້ນຢູ່ແຕ່ສາມແຍກສີເກີດ ແລະ ຈຸດສຸດທ້າຍຢູ່ເມືອງວັງວຽງ ມີຄວາມຍາວທັງໝົດ 109,10 ກິໂລແມັດ, ຕັດຜ່ານ 4 ເມືອງ ຄື: ເມືອງນາຊາຍທອງ, ເມືອງໂພນໂຮງ, ເມືອງຫີນເຫີບ ແລະ ເມືອງວັງວຽງ.

ການອອກແບບປະກອບມີ: ຄວາມກວ້າງທັງໝົດ 23 ແມັດ, ອອກແບບຕາມມາດຕະຖານເຕັກນິກທາງດ່ວນຂອງ ສປ ຈີນ ( JTG Bo1-2014 ) ແລະ ມາດຕະຖານເຕັກນິກຂອງທາງອາຊຽນ ເປັນພື້ນຖານ, ມີອຸມົງ 1 ແຫ່ງ ເບື້ອງຊ້າຍຍາວ 875 ແມັດ ແລະ ເບື້ອງຂວາຍາວ 845 ແມັດ, ຂົວ 45 ແຫ່ງ ຍາວທັງໝົດ 2.408 ແມັດ, ຄວາມໄວອອກແບບ 100 ກິໂລແມັດຕໍ່ຊົ່ວໂມງ ( 80 ກິໂລແມັດຕໍ່ຊົ່ວໂມງ ).

Image may contain: sky, tree, plant, cloud, bridge, outdoor and nature

ຕອນທາງປະກອບມີ: ຈຸດເຊື່ອມຕໍ່ທັງໝົດຈໍານວນ 7 ແຫ່ງ, ຈຸດເກັບເງິນມີ 8 ແຫ່ງ ( ນະຄອນຫຼວງວຽງຈັນ, ບ້ານນາຊອນ, ບ້ານບົວ, ບ້ານສະກ້າ, ບ້ານໂພນໂຮງ, ບ້ານຫີນເຫີບ, ບ້ານທ່າເຮືອ ແລະ ເມືອງວັງວຽງ ). ຈຸດບໍລິການ ມີ 3 ຈຸດ ( ນະຄອນຫຼວງວຽງຈັນ, ເມືອງໂພນໂຮງ ແລະ ເມືອງວັງວຽງ ), ຈຸດພັກລົດ ມີ 2 ຈຸດ ( ບ້ານນາຂ່າ ເມືອງໂພນໂຮງ ແລະ ບ້ານທ່າເຮືອ ອ່າງນ້ຳງື່ມ, ເມືອງຫີນເຫີບ ), ສູນຄວບຄຸມມີ 2 ບ່ອນ ( 1 ບ່ອນສູນຄວບຄຸມເສັ້ນທາງ ແລະ 1 ບ່ອນ ສູນຄວບຄຸມອຸມົງ ) ແລະ ສູນສ້ອມແປງມີ 2 ບ່ອນ ( ນະຄອນຫຼວງວຽງຈັນ ແລະ ເມືອງວັງວຽງ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ