ເຜີຍແຜ່ກິດຈະກຳໂຄງການເວທີຂອງນັກວິທະຍາສາດ,ເຕັກໂນໂລຊີ ແລະ ນະວັດຕະກຳໜຸ່ມນ້ອຍ - Laoedaily

ເຜີຍແຜ່ກິດຈະກຳໂຄງການເວທີຂອງນັກວິທະຍາສາດ,ເຕັກໂນໂລຊີ ແລະ ນະວັດຕະກຳໜຸ່ມນ້ອຍ

ກະຊວງວິທະຍາສາດ ແລະ ເຕັກໂນໂລຊີ ( ກວຕ ) ຮ່ວມກັບ ຄະນະວິສະວະກໍາສາດ ມະຫາວິທະຍາໄລແຫ່ງຊາດ ຈັດກິດຈະກໍາເຜີຍແຜ່ກິດຈະກໍາໂຄງການເວທີຂອງນັກວິທະຍາສາດ ແລະ ເຕັກໂນໂລຊີ ໃນຫົວຂໍ້ “ ການນຳໃຊ້ວິທະຍາສາດ, ເຕັກໂນໂລຊີ ແລະ ນະວັດຕະກໍາເຂົ້າໃນວຽກງານກະສິກໍາ.

ພິທີການດັ່ງກ່າວຈັດຂຶ້ນໃນວັນທີ 25 ພະຈິກ 2020 ທີ່ຄະນະວິສະວະກໍາສາດເປັນປະທານໂດຍ ທ່ານ ຄໍາເພັດ ວົງດາລາ ຫົວໜ້າກົມແຜນການ ແລະ ຮ່ວມມື ກວຕ ແລະ ທ່ານ ປອ. ສົມພອນ ກັນທະວົງ ຮອງຄະນະບໍດີ ຄະນະວິສະວະກໍາສາດ, ມະຫາວິທະຍາໄລແຫ່ງຊາດ ພ້ອມດ້ວຍບັນດາແຂກຈາກຂະແໜງການທີ່ກ່ຽວຂ້ອງ ແລະ ບັນດາອາຈານພ້ອມດ້ວຍນັກສຶກ ຈໍານວນ 200 ກວ່າຄົນ.

ປະເທດລາວມີທ່າແຮງທາງດ້ານທີ່ດິນ, ມີສະພາບດິນຟ້າອາກາດທີ່ເອື້ອອໍານວຍ ແຕ່ວ່າຜົນຜະລິດທາງກະສິກໍາຍັງມີຂໍ້ຈໍາກັດ ບໍ່ສາມາດຕອບສະໜອງຕະຫຼາດພາຍໃນ, ການສົ່ງອອກຍັງບໍ່ທັນກວ້າງ. ຄຽງຄູກັນນັ້ນ, ນ້ອງນັກສຶກສາກໍມີຄວາມຮູ້, ຄວາມສາມາດ ແລະ ມີພອນສະຫວັນສູງທາງດ້ານວິທະຍາສາດ ແລະ ເຕັກໂນໂລຊີ ແຕ່ຍັງຂາດກາລະໂອກາດໃນການສະແດງອອກໃນພາກຕົວຈິງ ໂຄງການແຂ່ງຂັນໃນຫົວຂໍ້ປີທີ 1 “ ການນຳໃຊ້ວິທະຍາສາດ, ເຕັກໂນໂລຊີ ແລະ ນະວັດຕະກໍາ ເຂົ້າໃນວຽກງານກະສິກໍາ ເພື່ອເພີ່ມປະສິດທິພາບ ແລະ ສ້າງມູນຄ່າເພີ່ມຂອງການຜະລິດ ” ຈຶ່ງກາຍເປັນເວທີໃຫ້ນັກຄົ້ນຄວ້າໜຸ່ມນ້ອຍ ນໍາສະເໜີຫົວຄິດປະດິດສ້າງໃນການນໍາໃຊ້ເຕັກໂນໂລຊີ, ນະວັດຕະກຳ ເຂົ້າໃນຂະບວນການສ້າງຜະລິດຕະພັນສິນຄ້າເຂົ້າສູ່ຕະຫຼາດ ເຊິ່ງບັນດານ້ອງນັກສຶກສາທີ່ຖືກຄັດເລືອກຈາກເວທີແຂ່ງຂັນຄັ້ງນີ້ຈະໄດ້ເຂົ້າຮ່ວມສຳມະນາ ແລະ ທັດສະນະສຶກສາ ຮ່ວມກັບນັກຄົ້ນຄວ້າໜຸ່ມນ້ອຍຈາກບັນດາປະເທດສະມາຊິກຂອງຂອບການຮ່ວມມືແມ່ນໍ້າຂອງ – ແມ່ນໍ້າລ້ານຊ້າງອີກດ້ວຍ.

ແຄັບເຊິ້ນ: ນຳໃຊ້ເຕັກໂນໂລຊີ ແລະ ນະວັດຕະກໍາ ເຂົ້າໃນວຽກງານກະສິກໍາສ້າງມູນຄ່າເພີ່ມຂອງການຜະລິດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ