ປິດຕໍານານທີມຊາດຊຸດຊີເກມ 2009! ສັງວອນ ກຽມອໍາລາການເປັນນັກເຕະ ຫັນສູ່ຄູຝືກເຕັມຕົວ - Laoedaily

ປິດຕໍານານທີມຊາດຊຸດຊີເກມ 2009! ສັງວອນ ກຽມອໍາລາການເປັນນັກເຕະ ຫັນສູ່ຄູຝືກເຕັມຕົວ

ກຽມປິດຕໍານານນັກເຕະທີມຊາດລາວ ຊຸດຊີເກມ 2009 ທີ່ສ້າງປະຫວັດສາດເຂົ້າຮອບ 4 ທີມ ໄປອີກຄົນຢ່າງ ສັງວອນ ພິມມະເສນ ກອງໜ້າຊາວແຂວງຈໍາປາສັກ ກຽມປະກາດອໍາລາການເປັນນັກເຕະ ເພື່ອຫັນສູ່ການເປັນຄູຝຶກຢ່າງເຕັມຕົວ ຫຼັງຈາກທີ່ກ່ອນໜ້ານີ້ປະກາດອໍາລາການຮັບໃຊ້ທີມແຂວງຈໍາປາສັກ ຊຸດແຊັມບານເຕະທົ່ວປະເທດຢ່າງເປັນທາງການ.

ສັງວອນ ພິມມະເສນ ກາຍເປັນ 1 ໃນຕໍານານນັກເຕະທີມຊາດລາວ ຊຸດຊີເກມ 2009 ທີ່ສ້າງປະຫວັດສາດເຂົ້າຮອບ 4 ທີມສຸດທ້າຍ ຫຼ້າສຸດຫຼິ້ນໃຫ້ກັບທີມບານເຕະຊາຍ ແຂວງຈໍາປາສັກ ໃນບົດບາດຫົວໜ້າທີມ ພາທີມຄວ້າແຊັມບານເຕະທົ່ວປະເທດ ເພື່ອຂໍ່ານັບຮັບຕ້ອນວັນຊາດທີ 2 ທັນວາຄົບຮອບ 45 ປີທີ່ນະຄອນຫຼວງວຽງຈັນ ລະຫວ່າງວັນທີ 6-21 ພະຈິກ 2020 ລົງສະໜາມ 7 ນັດຍິງໄດ້ 5 ປະຕູຄວ້າລາງວັນດາວຍິງສູງສຸດຮ່ວມກັບ ທິບພະຈັນ ຄໍາໃບອ່ອນ ຮຸ່ນນ້ອງຮ່ວມທີມແຂວງຈໍາປາສັກ.

ຫຼັງຈົບການແຂ່ງຂັນ ສັງວອນ ພ້ອມດ້ວຍ ທ່ານ ຫວາງໃຈ ເມືອງມະນີ ຫົວໜ້າຄູຝືກທີມແຂວງຈໍາປາສັກ ແລະ ອີກ 2 ນັກເຕະເພື່ອນຮ່ວມທີ່ມີປະສົບການຢ່າງ ຄໍາຫຼ້າ ປິ່ນແກ້ວ ແລະ ອຸດົມສິດ ສິງລາດສົມບູນ ຕ່າງກໍປະກາດອໍາລາທີມບານເຕະແຂວງຈໍາປາສັກ ເພື່ອໃຫ້ຮຸ່ນນ້ອງໄດ້ສານຕໍ່ໃນການພາທີມແຂວງເຂົ້າຮ່ວມແຂ່ງຂັນລາຍການຕ່າງໆ ຫຼັງຈາກຮັບໃຊ້ທີມຂອງຕົວເອງມາຢ່າງຍາວນານເຖິງ 20 ປີ. ແນ່ນອນວ່າ ຖ້າຫາກ ສັງວອນ ອໍາລາການເປັນນັກເຕະກໍຈະເປັນອີກ 1 ນັກເຕະຈາກຊຸດທີມຊາດລາວ ຊຸດຊີເກມ 2009 ທີ່ສ້າງປະຫວັດສາດເຂົ້າຮອບ 4 ທີມສຸດທ້າຍທີ່ເຊົາເຕະບານ ແລ້ວຫັນໄປສູ້ການເປັນຄູຝຶກຄືກັບ ກັນລະຍາ ສີສົມຫວັງ, ລໍາເນົາ ສິງໂຕ ແລະ ຄົນອື່ນໆອີກຫຼາຍໆຄົນ.

ສັງວອນ ເປີດເຜີຍຕໍ່ທີມຂ່າວເສດຖະກິດ-ການຄ້າ ຫຼັງກັບຮອດແຂວງຈໍາປາສັກ ຫຼັງຄວ້າແຊັມບານເຕະທົ່ວປະເທດທີ່ນະຄອນຫຼວງວຽງຈັນວ່າ: ເຫດຜົນທີ່ປະກາດອໍາລາທີມແຂວງຈໍາປາສັກ ແມ່ນຢາກຫັນຕົວເອງມາເປັນຄູຝຶກຢ່າງເຕັມຕົວ ເພື່ອຢາກສອນເດັກນ້ອຍ ແລະ ສ້າງເດັກນ້ອຍໃຫ້ມີໂອກາດຢ່າງກວ້າງຂວາງ, ແນ່ນອນ ຂ້ອຍມີແຜນວ່າ ຈະເຊົາບົດບາດການເປັນນັກເຕະບໍ່ວ່າຈະເປັນລາຍການການແຂ່ງຂັນທົ່ວແຂວງຈໍາປາສັກ ຫຼື ລາຍການຕ່າງແຂວງອື່ນໃນໄວໆນີ້ ເພາະຫຼັງຈາກທີ່ໄດ້ປຶກສາກັບຄູຝືກທີມຊາດ ຫຼາຍໆຄົນເພິ່ນກໍໃຫ້ຄໍາເນາະນໍາວ່າ ຖ້າຈະເລືອກການເປັນຄູຝຶກແລ້ວ ກໍຕ້ອງປ່ອຍວາງການເປັນນັກເຕະ. ດັ່ງນັ້ນ ຈິ່ງຕັດສິນໃຈທີ່ຈະອໍາລາການເປັນນັກເຕະ. ຢ່າງໃດກໍຕາມ ຂ້ອຍຍັງມີແຜນທີ່ຈະລົງແຂ່ງຂັນບານເຕະຊີງຂັນວັນຊາດ ທີ່ແຂວງຈໍາປາສັກ ທີ່ປັດຈຸບັນແມ່ນພາທີມ ສະມາຄົມຫວຽດນາມ ເຂົ້າຮອບ 4 ທີມ ເຊິ່ງຈະເລີ່ມແຂ່ງຂັນໃນຕົ້ນເດືອນທັນວາ 2020 ແລະ ອາດຈະແມ່ນລາຍການສົ່ງທ້າຍໃນການເປັນນັກເຕະຂອງຂ້ອຍ.

“ ແນ່ນອນວ່າ ການໄດ້ມາແຂ່ງຂັນທີ່ນະຄອນຫຼວງວຽງຈັນ ໃນລາຍການທົ່ວປະເທດໄດ້ຮຽນຮູ້ ເລື່ອງລະບົບການຫຼິ້ນຂອງທີມຕົວເອງ ແລະ ທີມຈາກຕ່າງແຂວງ ເຊິ່ງມີລະບົບການຫຼິ້ນ, ການວາງແຜນແຕກຕ່າງກັນ. ດັ່ງນັ້ນ ນັກກິລາພວກເຮົາໄດ້ມີຄວາມພະຍາມແກ້ໄຂ ແລະ ແກ້ໄຂໃຫ້ເຂົ້າກັບສະພາບການຕົວຈິງ, ຢາກຝາກໃຫ້ນັກກີລາຮຸ່ນນ້ອງ ທີ່ເຂົ້າຮ່ວມແຂ່ງຂັນໃນລາຍການນີ້ແມ່ນໃຫ້ສືບຕໍ່ຮັກສາມາມູນເຊື້ອ, ຮັກສາຄວາມສາມັກຄີ, ຮັກສາສັກກະຍາພາບຂອງຕົນເອງ ແລະ ສຶບຕໍ່ພັດທະນາຕົນເອງໃຫ້ດີຂື້ນໄປເລື້ອຍງ ເພື່ອຮັບໃຊ້ປະເທດຊາດ ໂດຍສະເພາະກໍຄືຮັບໃຊ້ ແຂວງຈຳປາສັກ ” ສັງວອນ ກ່າວ.

ສໍາລັບ ສັງວອນ ເກີດວັນທີ 26 ພະຈິກ 1989 ທີ່ບ້ານເກີດ ບ້ານວັດຫຼວງ ເມືອງລະມາມ ແຂວງເຊກອງ, ເຊິ່ງປັດຈຸບັນແມ່ນສ້າງຄອບຄົວທີ່ແຂວງຈໍາປາສັກ, ສ່ວນຈຸດເລີ່ມຕົ້ນການເປັນນັກເຕະແມ່ນເລີ່ມແຕ່ຕອນຮຽນຢູ່ປະຖົມແຂວງເຊກອງ ກ່ອນທີ່ຈະຍ້າຍມາຮຽນຢູ່ແຂວງສາລະວັນ ເຄີຍຕິດທີມແຂວງສາລະວັນ ໃນຮຸ່ນອາຍຸ 16 ປີ ເຂົ້າຮ່ວມແຂ່ງຂັນທີ່ນະຄອນຫຼວງ ລາຍການສານຝັນສູ່ເກມສາມາດເຂົ້າສູ່ຮອບ 4 ທີມ ກ່ອນທີ່ ປີ 2005 ເຕະໃຫ້ແຂວງສາລະວັນ ງານກີລາແຫ່ງຊາດ ທີ່ແຂວງສະຫວັນນະເຂດ.

ສ່ວນຜົນງານໃນລາຍການໃຫຍ່ ຕິດທີມຊາດລາວຢູ 19 ປີ ເຂົ້າຮ່ວມລາຍການສີ່ເສົ້າທີ່ປະເທດຫວຽດນາມ ໃນປີ 2008 ແລະ ຕິດທີມຊາດລາວຊຸດໃຫ່ຍ ເຂົ້າຮ່ວມລາຍການຊຸຊຸກິ ຄັບ 2008 ຮອບຄັດເລືອກທີ່ ກຳປູເຈຍ ແລະ ຮອບ 2 ທີ່ປະເທດໄທ, ຕິດທີມຊາດລາວ ຊຸດຊີເກມ 2009 ທີ່ປະເທດລາວ, ປີ 2010 ຫຼິ້ນໃຫ້ກັບສະໂມສອນທະນາຄານ ໄດ້ແຊັມລາວລີກ ກັບ ຊີງຂັນທ່ານນາຍົກລັດຖະມົນຕີ, ຕິດທີມຊາດລາວ ຊຸດຊີເກມ 2011 ແລະ ເຂົ້າຮ່ວມແຂ່ງກີລາແຫ່ງຊາດ ທີ່ຫລວງພະບາງ ຫລີ້ນໃຫ້ແຂວງຫຼວງພະບາງ. ຫຼັງຈາກນັ້ນ ກໍ່ໄດ້ມີສະໂມສອນຢູ່ອິນໂດນເນເຊຍ ເອົາໄປທົດສອບ.

ຂະນະທີ່ ນັບແຕ່ປີ 2013 ແມ່ນຫຼິ້ນໃຫ້ກັບ ສະໂມສອນ ເອັສເຮັສບີ ຈໍາປາສັກ ໄດ້ແຊັມລາວພຣີເມຍລີກ ແລະ ປີ 2014 ໄດ້ອັນດັບ 2, ປີ 2015 ຫຼິ້ນໃຫ້ກັບ ໄອດີຊີ ຈໍາປາສັກ ໄດ້ອັນດັບ 8 ແລະ ປີ 2016 ໄດ້ອັນດັບ 3 ຈົນມາເຖິງປີ 2017 ແມ່ນຫຼິ້ນໃຫ້ກັບທີມຊາດລາວ ຊຸດໃຫຍ່ ເປັນຄັ້ງຊຸດທ້າຍໄປແຂ່ງຂັນລາຍການທີ່ປະເທດມາເລເຊຍ, ກ່ອນທີ່ໃນປີ 2018 – 2020 ແມ່ນລົງແຂ່ງຂັນລາຍການທີ່ແຂວງຈໍາປາສັກ ຈັດຂຶ້ນ ຈົນຫຼ້າສຸດພາທີມແຂວງຈໍາປາສັກ ຄວ້າແຊັມບານເຕະທົ່ວປະເທດ ທີ່ນະຄອນຫຼວງວຽງຈັນ.

ຂ່າວ: ຄໍາສອນ; ຮູບ: ສອນໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ