ການແຂ່ງຂັນບານເຕະທົ່ວປະເທດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ ລະຫວ່າງວັນທີ 6-21 ພະຈິກ 2020 ປະເພດທີມຊາຍ ເຊິ່ງນັບແຕ່ວັນທີ 6 – 16 ພະຈິີກ 2020 ແຂ່ງຂັນສໍາເລັດໄປແລ້ວ 32 ນັດປາກົດວ່າ: ນັດທີ່ມີແຟນບານເຂົ້າຊົມຫຼາຍທີ່ສຸດສະເລ່ຍເກືອບ 4 ພັນຄົນແລ້ວ.
ຕາມການລາຍງານຂອງ ຄະນະກໍາມະການ ປະຈໍາແຕ່ລະສະໜາມໃນການແຂ່ງຂັນບານເຕະຊາຍ ລາຍກາຍວ່າ: ສະໜາມມະຫາວິທະຍາໄລແຫ່ງຊາດ ເປັນສະໜາມທີ່ມີແຟນບານເຂົ້າຊົມຫຼາຍທີ່ສຸດປະມານ 4.500 ກວ່າຄົນໃນນັດທີ່ ແຂວງຫົວພັນ ສະເໝີກັບ ບໍລິຄໍາໄຊ 0-0 ໃນວັນທີ 14 ພະຈິກ 2020, ເຊິ່ງນັດດັ່ງກ່າວຟາມໄຊເບື້ອງຫຼັກແມ່ນເຕັມໝົດ ສ່ວນຫຼາຍແມ່ນແຟນບານຊາວແຂວງຫົວພັນ ແລະ ແຂວງບໍລິຄໍາໄຊ ທີ່ມາສຶກສາຕໍ່ທີ່ມະຫາວິທະຍາໄລແຫ່ງຊາດ ແລະ ອີກຈໍານວນໜຶ່ງແມ່ນເດີນທາງມາແຕ່ແຂວງຂອງຕົວເອງ ເພື່ອມາເຊຍ. ນອກນັ້ນ ຖ້ານັບທັງຄູຝຶກນັກກີລາ ແລະ ຄະນະຈັດການແຂ່ງຂັນແມ່ນບໍ່ຫຼຸດ 5.000 ພັນຄົນ.
ສ່ວນນັດທີ່ມີແຟນບານເຂົ້າຊົມຫຼາຍທີ່ສຸດອັນດັບ 2 ຈໍານວນ 3.820 ຄົນໃນນັດທີ່ ແຂວງຈໍາປາສັກ ບຽດເອົາຊະນະ ເຊກອງ 4-3 ເມື່ອວັນທີ 11 ພະຈິກ 2020 ນັບສະເພາະແຟນບານ, ແຕ່ຖ້ານັບຄະນະນໍາ, ຄູຝຶກ ແລະ ນັກກີລາ ແມ່ນນັບໄດ້ເຖິງ 4.000 ກວ່າຄົນ.
ສ່ວນອັນດັບ 3 ເປັນສະໜາມ ກີລາແຫ່ງຊາດ ຫຼັກ 16 ສະໜາມໃນ ໃນນັດເປີດສະໜາມຢ່າງເປັນທາງການນັດທີ່ ນະຄອນຫຼວງວຽງຈັນ ສະເໝີກັບ ແຂວງຊວງຂວາງ 1-1 ມີແຟນບານເຂົາຊົມເຖິງ 3.518 ຕາມການປະເມີນຂອງຄະນະກໍາມະການປະຈໍາສະໜາມດັ່ງກ່າວ, ສ່ວນໜາມກິລາແຫ່ງຊາດ ຫຼັກ 16 ສະໜາມນອກ ແລະ ສະໜາມກີລາກອງທັບ ແມ່ນຢູ່ໃນລະດັບປະມານ 500-1.000 ກວ່າຄົນໃນນັດທີ່ຫຼາຍທີ່ສຸດທີ່ຜ່ານມາ.
ສໍາລັບ ການແຂ່ງຂັນບານເຕະຊາຍ ໃນບານເຕະທົ່ວປະເທດຄັ້ງນີ້ມີ 18 ທີມເຂົ້າຮ່ວມໂດຍໃຊ້ 4 ສະໜາມປະກອບດ້ວຍ: ສະໜາມກີລາແຫ່ງຊາດ ຫຼັກ 16 ຈໍານວນ 2 ສະໜາມເດີ່ນນອກ ແລະ ເດີ່ນໃຈ, ສະໜາມມະຫາວິທະຍາໄລແຫ່ງຊາດ ແລະ ສະໜາມກີລາກອງທັບ ສະຖິຕິທີ່ມີແຟນບານເຂົ້າຊົມຫຼາຍທີ່ສຸດໃນປັດຈຸບັນແມ່ນະໜາມມະຫາວິທະຍາໄລແຫ່ງຊາດ ມີເຖິງ 4.500 ກວ່າຄົນ, ແຕ່ຄາດຈະຫຼາຍກວ່ານັດໃນນັດຊີງຊະນະເລີດທີ່ຈະຈັດຂຶ້ນທີ ສະໜາມກີລາແຫ່ງຊາດ ຫຼັກ 16 ສະໜາມໃນ ໃນວັນທີ 21 ພະຈິກ 2020 ເວລາ 18:00 ໂມງ.
ສໍາລັບຮອບ 8 ທີມສຸດທ້າຍຂອງບານເຕະຊາຍ ຈະແຂ່ງຂັນໃນ 17 ພະຈິກ 2020 ເວລາ 15:00 ໂມງເທົ່າກັນທັງ 4 ຄູຄື:
-ນະຄອນຫຼວງວຽງຈັນ ທີ 1 ສາຍ ກ ຈະໄປພົບກັບທີ 2 ສາຍ ຄ ແຂວງອັດຕະປື ທີ່ສະໜາມກິລາແຫ່ງຊາດ ຫຼັກ 16 ສະໜາມໃນ.
-ແຂວງຈໍາປາສັກ ທີ 1 ສາຍ ຂ ຈະໄປພົບທີ 2 ຂອງສາຍ ງ ແຂວງຫົວພັນ ທີ່ສະໜາມກີລາແຫ່ງຊາດ ຫຼັກ 16 ສະໜາມນອກ.
-ຫຼວງພະບາງ ທີ 1 ສາຍ ຄ ພົບທີ 2 ສາຍ ກ ແຂວງຊຽງຂວາງ ທີ່ສະໜາມກິລາ ມະຫາວິທະຍາໄລແຫ່ງຊາດ
-ສະຫວັນນະເຂດ ທີ 1 ສາຍ ງ ພົບທີ 2 ສາຍ ຂ ຜົ້ງສາລີ ທີ່ສະໜາມກອງທັບ
ຂອບໃຈຮູບຈາກ: ພະແນກສຶກສາທິການ ແລະ ກິລາແຂວງຫົວພັນ
