ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ສໍາເລັດເກືອບ100% - Laoedaily

ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ສໍາເລັດເກືອບ100%

ວັນທີ12 ພະຈິກ 2020 ຜ່ານມາ ທ່ານ ພອນເພັດ ເພັດຕະກຸນ ອໍານວຍການໃຫຍ່ບໍລິສັດຫ້ວຍລໍາພັນ ພາວເວີ້ ຈໍາກັດ ໄດ້ລາຍງານຕໍ່ ທ່ານສອນໄຊສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ ໃນໂອກາດທີ່ໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງເຊກອງໃນວັນທີ12ພະຈິກນີ້ໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ຕັ້ງຢູ່ບ້ານລາວີລໍາພັນ ເມືອງລະມາມ ແຂວງເຊກອງ, ເປັນປະເພດເຂື່ອນດິນໜຽວ , ມີລວງຍາວ 492 ແມັດ, ສູງ 55 ແມັດ, ສັນເຂື່ອນກວ້າງ 5 ແມັດ, ໃນລະດັບສູງ 202 ແມັດ ທຽບໃສ່ລະດັບນໍ້າທະເລ(masl).

ທໍ່ສົ່ງນໍ້າມີຂະໜາດເສັ້ນຜ່າສູນກາງ 3,2×3,2 ແມັດ, ມີຄວາມຍາວທັງໝົດ 187,22 masl , ເຊິ່ງມີກໍາລັງຕິດຕັ້ງ 15 ເມກາວັດ, ມີເຄື່ອງຈັກ 2 ໜ່ວຍ, ໜ່ວຍລະ 7,5 ເມກາວັດ, ຕາມການອອກແບບສາມາດຜະລິດກະແສໄຟຟ້າໄດ້ 68,31 ກິກກາວັດໂມງ/ປີ (ຫຼືຕໍ່າສຸດບໍ່ຫຼຸດ Plan factor 51,98%, ລະບົບສາຍສົ່ງເປັນລະບົບວົງຈອນດຽວ ມີຄວາມຍາວ 10 ກິໂລແມັດ ຕໍ່ເຂົ້າກັບສາຍສົ່ງຫ້ວຍລໍາພັນໃຫຍ່ ກ່ອນທີ່ຈະສົ່ງໄປຫາສະຖານີໜອງບົງ, ເພື່ອສົ່ງຂາຍພາຍໃນ ແລະຕ່າງປະເທດ, ຊຶ່ງມູນຄ່າການກໍ່ສ້າງທັງໝົດ 48.235.294 ໂດລາສະຫາລັດ, ໄລຍະການກໍ່ສ້າງ 36 ເດືອນ.

ໄດ້ເລີ່ມລົງມືກໍ່ສ້າງ ແຕ່ວັນທີ18 ຕຸລາ ປີ2017, ມາຮອດປະຈຸບັນ ຄວາມຄືບໜ້າຂອງໂຄງການກໍ່ສ້າງ ສໍາເລັດ 96,76%, ສໍາລັບຫນ້າວຽກທີ່ພວມດຳເນີນການໃນປະຈຸບັນ ແມ່ນການກັກເກັບນໍ້າເຂົ້າອ່າງ ເລີ່ມແຕ່ວັນທີ 3 ກັນຍາ ມາຮອດວັນທີ 12 ພະຈິກ 2020 ນີ້ ລະດັບນໍ້າແມ່ນຢູ່ທີ່ 197,35 ແມັດ ທຽບໃສ່ລະດັບນໍ້າທະເລ, ບໍລິມາດນໍ້າໃນອ່າງ 71.65 ລ້ານແມັດກ້ອນ(MCM) ທຽບໃສ່ລະດັບນໍ້າເຕັມອ່າງ 198.00 masl ,ຍັງ 0,65 ແມັດ ຈຶ່ງຈະເຕັມອ່າງ( ບໍລິມາດນໍ້າເຕັມອ່າງ 2,25 MCM).

ໂຄງການດັ່ງກ່າວແມ່ນຖືກຈັດເປັນ ບູລີມະສິດຂອງແຂວງເຊກອງ ເພື່ອເປັນການສ້າງພື້ນຖານໂຄງລ່າງທີ່ເອື້ອອໍານວຍ ແລະສົ່ງເສີມໃຫ້ແກ່ການລົງທຶນພາຍໃນ, ນອກຈາກນັ້ນ ຍັງເປັນອີກທ່າແຮງໜຶ່ງທີ່ເປັນປາຍແຫຼມຂອງຊາດ ທີ່ສາມາດສ້າງເສດຖະກິດ-ສັງຄົມ ແລະສ້າງລາຍຮັບໃຫ້ແກ່ ແຂວງເຊກອງໂດຍກົງ, ທີ່ສໍາຄັນໂຄງການນີ້ຍັງເປັນສ່ວນໜຶ່ງທີ່ນອນຢູ່ໃນທິດທາງ #ແຜນການຍຸດທະສາດຂອງພັກ-ລັດຖະບານ ທີ່ຈະຊ່ວຍໃຫ້ປິເທດຊາດຂອງພວກເຮົາເວົ້າລວມ, ເວົ້າສະເພາະກໍຄືຊ່ວຍໃຫ້ແຂວງເຊກອງ #ຫຼຸດພົ້ນອອກຈາກຄວາມທຸກຍາກ ແລະຈະເປັນຈຸດພຶ້ນຖານທີ່ຈະຊ່ວຍໃຫ້ປະຊາຊົນບັນດາເຜົ່າໃນຂົງເຂດນີ້ ສາມາດປະກອບອາຊີບຖາວອນ,ໝັ້ນຄົງ ແລະມີວຽກເຮັດງານທໍາອັນຍາວນານຕື່ມອີກ.


ໂດຍ:ພຸດທະສອນ, ຂ່າວເຊກອງ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ