ສົມລາຄາເຕັງແຊັມ ຈໍາປາສັກ ຊະນະ ວຽງຈັນ ຄວ້າແຊ້ມກຸ່ມເຂົ້າຮອບ 8 ທີມບານເຕະທົ່ວປະເທດ - Laoedaily

ສົມລາຄາເຕັງແຊັມ ຈໍາປາສັກ ຊະນະ ວຽງຈັນ ຄວ້າແຊ້ມກຸ່ມເຂົ້າຮອບ 8 ທີມບານເຕະທົ່ວປະເທດ

ທີມບານເຕະຊາຍ ແຂວງຈໍາປາສັກ ສ້າງຜົນງານໂດດເດັ່ນເຊັ່ນເຄີຍເອົາຊະນະ ແຂວງວຽງຈັນ 3-1 ໃນການແຂ່ງຂັນບານເຕະທົ່ວປະເທດ ຕ້ອນຮັບວັນຊາດທີ 2 ທັນວາ ຄົບຮອບ 45 ປີທີ່ນະຄອນຫຼວງວຽງຈັນ ປະຈໍາວັນທີ 13 ພະຈິກ 2020 ທີ່ສະໜາມກີລາແຫ່ງຊາດ ຫຼັກ 16 ສະໜາມນອກ.

ນັດນີ້ແຂວງຈໍາປາສັກ ສ້າງເກມບຸກໄດ້ຢ່າງໂດດເດັ່ນ ແລະ ໄດ້ໂອກາດຍິງຢ່າງຕໍ່ເນື່ອງ ເຊິ່ງໃນເຄິ່ງເວລາທໍາອິດສະເໝີກັບ 0-0, ສ່ວນເຄິ່ງເວລາທີ 2 ຈໍາປາສັກ ປົດລ໊ອກຍິງປະຕູຂຶ້ນນໍາໄດ້ສໍາເລັດ ຈາກການຍິງຂອງ ທິບພະຈັນ ນາທີໆ 47 ກ່ອນທີ່ ວຽງຈັນ ຈະມາຕີສະເໝີຈາກການຍິງຂອງ ພອນປະເສີດ ນາທີໆ 70.

ແຕ່ໄລຍະເວລາທີເຫຼືອ ແຂວງວຽງຈັນ ຕ້ານເກມບຸກຂອງ ຈໍາປາສັກ ບໍ່ໄດ້ເສຍອີກ 2 ປະຕູຈາກການຍິງຂອງ ກ້ວຍເຈັງ ແລະ ພູວຽງ ເຮັດໃຫ້ ຈໍາປາສັກ ເອົາຊະນະໄປ 3-1 ເກັບເພີ່ມເປັນ 9 ຄະແນນຜ່ານເຂົ້າຮອບ 8 ທີມໃນຖານະແຊັມກຸ່ມ ຂ ເປັນທີ່ແນ່ນອນແລ້ວ, ສ່ວນ ເຊກອງ (ກໍາລັງແຂ່ງຂັນນັດສຸດທ້າຍໃນຮອບແບ່ງກຸ່ມ) ກັບ ຜົ້ງສາລີ ມີ 4 ຄະແນນເທົ່າກັນ ແລະ ອຸດົມໄຊ ຍັງ 2 ນັດ ທີ່ຍັງມີລຸ້ນອັນດັບ 2 ເພື່ອເຂົ້າຮອບ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ