ເຈົ້າແຂວງລົງພື້ນທີ່ເອງ! ຕິດຕາມກວດກາໂຄງການພັດທະນາ ແລະ ປັບປຸງເທດສະບານເມືອງພູຄູນ ແຂວງຫຼວງພະບາງ - Laoedaily

ເຈົ້າແຂວງລົງພື້ນທີ່ເອງ! ຕິດຕາມກວດກາໂຄງການພັດທະນາ ແລະ ປັບປຸງເທດສະບານເມືອງພູຄູນ ແຂວງຫຼວງພະບາງ

ໃນລະຫວ່າງວັນທີ 10-11 ພະຈິກ 2020 ທີ່ຜ່ານມາ, ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາໂຄງການພັດທະນາ ແລະ ປັບປຸງເທດສະບານເມືອງ ແລະ ບ້ານຢູ່ເມືອງພູຄູນ, ປະກອບມີບ້ານໂພນໄຊ, ບ້ານຜາເກັ່ງນ້ອຍ ແລະ ເຂດຈັດສັນ 5 ຈຸດຄື: ເຂດຈັດສັນຈຸດບ້ານຫຼັກຫ້າ ແລະ ບ້ານບັງກາໂລ ແລະ ເຂດຈັດສັນຫ້ອງວ່າການປົກຄອງເມືອງໃໝ່ ແລະ ບັນດາຫ້ອງການ ລວມທັງສະໂມສອນໃຫຍ່ຫຼັງໃໝ່ຂອງເມືອງ.

ໂອກາດດັ່ງກ່າວ ທ່ານ ວຽງທອງ ຫັດສະຈັນ ເຈົ້າເມືອງໆພູຄູນ ກໍໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງ ໄລຍະ 9 ເດືອນ ຜ່ານມາໃຫ້ຊາບ.

ສໍາລັບໂຄງການປັບປຸງຂະຫຍາຍເທດສະບານເມືອງພູຄູນ ແມ່ນປະຕິບັດຕາມແຈ້ງການຂອງຫ້ອງວ່າການສູນກາງພັກ, ຂໍ້ຕົກລົກຂອງລັດຖະບານ ວ່າດ້ວຍການແຕ່ງຕັ້ງຄະນະກໍາມະການຮັບຜິດຊອບໂຄງການພັດທະນາຕົວເມືອງໃໝ່ເມືອງພູຄູນ ແຂວງຫຼວງພະບາງ ແລະ ໄດ້ເຊັນບົດບັນທຶກຄວາມເຂົ້າໃຈ ກ່ຽວກັບການສໍາຫຼວດ-ອອກແບບໂຄງການປັບປຸງ ແລະ ຂະຫຍາຍເມືອງພູຄູນ ເຊິ່ງເລີ່ມດໍາເນີນການສໍາຫຼວດ-ອອກແບບມາແຕ່ປີ 2015 ໂດຍການສຳຫຼວດ-ອອກແບບຂອງບໍລິສັດຫຼີຊື້ຄຳມ່ວນກໍ່ສ້າງ ແລະ ສ້ອມແປງເຄຫະສະຖານຈຳກັດຜູ້ດຽວ ແລະ ສໍາເລັດເບື້ອງຕົ້ນໃນປີ 2017 ໃນມູນຄ່າການສໍາຫຼວດ-ອອກແບບ ມີມູນຄ່າທັງໝົດ 1.715,3 ຕື້ກີບ.

ພາຍຫຼັງໄດ້ມີການປັບປຸງດັດແກ້ ແລະ ປະເມີນມູນຄ່າຄືນ ແຕ່ລະໜ້າວຽກ ຂອງການສຳຫຼວດ-ອອກແບບຕາມມະຕິຕົກລົງກອງປະຊຸມລັດຖະບານຄັ້ງວັນທີ 21 ກຸມພາ 2018 ໂດຍຜ່ານການກວດກາ ແລະ ຮັບຮອງຈາກຂະແໜງການເຕັກນິກທີ່ກ່ຽວຂ້ອງ ລວມມູນຄ່າ ທັງໝົດ 872,20 ຕື້ກີບ ຫຼຸດລົງ 843,10 ຕື້ກີບ,ໄດ້ມີການປັບປຸງດັດແກ້ບາງໜ້າວຽກເປັນຕົ້ນແມ່ນປັບປຸງທາງດ້ານລາຄາ ແລະ ຫົວໜ່ວຍບໍລິມາດຕ່າງໆ ເຊັ່ນ: ບາງວຽກທີ່ເຫັນວ່າບໍ່ມີຄວາມຈຳເປັນແມ່ນໄດ້ຕັດອອກເລີຍ, ບາງວຽກກໍ່ໄດ້ປັບມູນຄ່າລົງ ແລະ ບາງວຽກກໍປັບບໍລິມາດໜ້າວຽກລົງ, ອາຄານຈາກສອງຊັ້ນມາເປັນຊັ້ນດ່ຽວ, ເສັ້ນທາງບາງເສັ້ນບໍ່ຈຳເປັນກໍຕັດອອກ, ບາງເສັ້ນກໍໄດ້ປັບດ້ານຄວາມກວ້າງເຂົ້າຕື່ມ ພ້ອມທັງປ່ຽນມາດຕະຖານຂອງທາງຈາກໜ້າທາງປູດ້ວຍອັດສະຟານມາເປັນປູດ້ວຍຢ່າງສອງຊັ້ນຈຶ່ງເຮັດໃຫ້ມູນຄ່າຂອງໂຄງການມີການຫຼຸດລົງ.

ເຊິ່ງໃນເດືອນຕຸລາປີ 2018 ຜ່ານມາ ການນໍາຂອງແຂວງພ້ອມດ້ວຍຄະນະ ໄດ້ລົງມາສົມທົບກັບເມືອງ ສໍາຫຼວດທີ່ຕັ້ງ ແລະ ຈັດກອງປະຊຸມປຶກສາຫາລືກຳນົດທີ່ຕັ້ງເທດສະບານເມືອງພູຄູນຄືນໃໝ່,ຕາມທິດຊີ້ນຳຂອງລັດຖະບານ, ໃນນັ້ນໄດ້ຕົກລົງປ່ຽນຈາກເຂດພັດທະນາເຂດລ້ອງສະງື່ມມາເປັນເຂດພັດທະນາສາມແຍກພູຄູນ ແລະ ໃຫ້ຖືເອົາສາມແຍກພູຄູນເປັນຈຸດໃຈກາງຄືເກົ່າ ແຕ່ຄວນປັບປຸງເສັ້ນທາງເລກທີ 13 ເໜືອ ແລະ ທາງເລກ 7 ໃນເຂດເທດສະບານເມືອງ ໃຫ້ມີລະບົບທາງຍ່າງ, ວົງວຽນ, ໄດ້ກໍານົດແຜນຜັງລວມໃນຈຸດ 3 ແຍກ, ໃນນີ້ມີເສັ້ນທາງ 6 ເສັ້ນ, ຍາວ 8.271 ແມັດ, ກໍານົດຈຸດຕັ້ງສໍານັກງານ-ອົງການ ຂອງລັດຢູ່ຕາມເປີ້ນພູຕ່າງໆ ພາຍໃນເທດສະບານເມືອງ ໃຫ້ຄັດເອົາໂຄງການທີ່ມີຄວາມຈໍາເປັນ ເຂົ້າແຜນປີ 2019 ຕາມການແຈ້ງການຂອງຫ້ອງວ່າການລັດຖະບານ ເປັນຕົ້ນແມ່ນເສັ້ນທາງ, ຫ້ອງວ່າການ, ສະໂມສອນ, ໄຟຟ້າ.

ຫຼັງຈາກນັ້ນເມືອງກໍ່ໄດ້ເປີດກອງປະຊຸມປຶກສາຫາລືກັນຊອກບໍລິສັດມາສືບຕໍ່ສຳຫຼວດ-ອອກແບບຜ່ານການປຶກສາຫາລືກັນຈິ່ງໄດ້ຕົກລົງກັນເອົາບໍລິສັດທີ ສຳຫຼວດອອກແບບ ດຳເນີນການກວດກາຄືນບັນດາຈຸດຕ່າງໆ ພ້ອມທັງໄດ້ມອບໃຫ້ບໍລິສັດເກັບກຳຂໍ້ມູນ ແລະ ສຳຫຼວດ-ອອກແບບຄືນໃໝ່ ມີທັງໝົດ 23 ໂຄງການ ເປັນມູນຄ່າທັງໝົດ 120,52 ຕື້ກວ່າກີບ.

ປະກອບມີ ການກໍ່ສ້າງທາງ 9 ເສັ້ນ, ມູນຄ່າ 62,75 ຕື້ກີບ; ປັບເດີນເປັນສະຖານທີຕັ້ງສໍານັກງານອົງການ 8 ຈຸດ, ມູນຄ່າ 21,7ຕື້ກີບ; ມີອາຄານຫ້ອງວ່າການປົກຄອງເມືອງ 1 ຫຼັງ, ມູນຄ່າ 13,29 ຕື້ກີບ; ອານຸສາວະລີປະທານໄກສອນ ພົມວິຫານ ມູນຄ່າ 2,8 ຕື້ກີບ ແລະ ມີບັນດາຫ້ອງການກຸ່ມເສດຖະກິດອີກຈຳນວນ 4 ຫຼັງ(ຫ້ອງການໂຍທາ, ການເງິນ, ແຜນການ ແລະ ຊັບພະຍາກອນ) ມູນຄ່າ 19,2ຕື້ກີບ ພ້ອມກັນນີ້ຍັງໄດ້ສຳຫຼວດ ແລະ ເກັບກຳຂໍ້ມູນຜົນກະທົບທາງດ້ານສັງຄົມ ແລະ ສິ່ງແວດລ້ອມທັງໝົດ ຢູ່ບັນດາຂອບເຂດທີ່ຈະຂະຫຍາຍເທດສະບານເມືອງ ເຊິ່ງມີຜົນກະທົບໃນເບື້ອງຕົ້ນ ທັງໝົດຄິດເປັນມູນຄ່າ 10,9 ຕື້ກວ່າກີບ.

ປີ 2019 ສະພາໄດ້ຕົກລົງອະນຸມັດໃຫ້ຈັດຕັ້ງປະຕິບັດ 2 ໂຄງການມູນຄ່າລວມທັງໝົດ 19,1 ຕື້ກີບ, ເຊິ່ງເປັນທຶນບ້ວງຟື້ນຟູໄພພິບັດຄື: ໂຄງການບຸກເບີກສະຖານທີ ແລະ ກໍ່ສ້າງສະໂມສອນໃຫຍ່ຂອງເມືອງ ມູນຄ່າ 15,5 ຕື້ກີບ ແລະ ໂຄງການບຸກເບີກສະຖານທີ່ຢູ່ອາໄສໃຫ້ປະຊາຊົນທີ່ຖືກຜົນກະທົບຈາກໄພພິບັດ ມູນຄ່າ 3,6 ຕື້ກີບ.

ມາເຖິງປັດຈຸບັນນີ້ ມີໂຄງການບຸກເບີກສະຖານທີ່ ແລະ ກໍ່ສ້າງສະໂມສອນໃຫຍ່ຂອງເມືອງ ມູນຄ່າ 15,5 ຕື້ກີບ, ເປັນໂຄງການແຂວງຄຸ້ມຄອງ ປະຕິບັດ ໄດ້ 91%, ວຽກກໍ່ສ້າງອາຄານສະໂມສອນໄດ້ 37% ແລະ ວຽກຕັດທາງຂຶ້ນສະໂມສອນໄດ້ 15% ລວມທັງໝົດປະຕິບັດໄດ້ 50% ຂອງຈໍານວນໜ້າວຽກທັງໝົດ ແລະ ໂຄງການບຸກເບີກສະຖານທີ່ຢູ່ອາໄສໃຫ້ປະຊາຊົນທີ່ຖືກຜົນກະທົບຈາກໄພພິບັດ ມູນຄ່າ 3,6 ຕື້ກີບ, ເປັນໂຄງການທີ່ເມືອງຄຸ້ມຄອງ,ປະຕິບັດສຳເລັດ 100% ແລ້ວພ້ອມທັງໄດ້ວັດແທກຈັດສັນໃຫ້ປະຊາຊົນສໍາເລັດ.

ໃນໂອກາດດຽວກັນ ທ່ານເຈົ້າແຂວງກໍໄດ້ເນັ້ນໃຫ້ບັນດາພະແນກການ ແລະ ຂະແໜງການກ່ຽວຂ້ອງຂອງ ໂດຍສະເພາະກໍແມ່ນຄະນະຮັບຜິດຊອບຈັດຕັ້ງປະຕິບັດໂຄງການຕ່າງໆຢູ່ພາຍໃນເມືອງ ຈົ່ງສືບຕໍ່ສຸມໃສ່ໜ້າວຽກພັດທະນາເມືອງ ແລະ ການຈັດສັນທີ່ຢູ່ໃຫ້ປະຊາຊົນ ໃຫ້ສໍາເລັດ,ຕ້ອງໄດ້ມີຄວາມພະຍາຍາມສູງຜ່ານຜ່າຄວາມຫຍຸ້ງຍາກ,ມີຄວາມເປັນເອກະພາບກັນໃນການຈັດຕັ້ງປະຕິບັດ,ແບ່ງຄວາມຮັບຜິດຊອບໃຫ້ແຕ່ລະຄະນະພັກ ໃຫ້ສອດຄ່ອງກັບເງື່ອນໄຂຕົວຈິງຂອງເມືອງ, ພ້ອມກັນປັບປຸງບັນດາສໍານັກງານຫ້ອງການຕ່າງໆຂອງເມືອງໃຫ້ມີຄວາມເປັນລະບຽບຈົບງາມ, ພ້ອມກັນສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງ ໃຫ້ປະສົບຜົນສໍາເລັດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ