ງານວາງສະແດງລົດນາໆຊາດ ວຽງຈັນ 2020 ຄັ້ງທີ V (Vientiane international motor Expo) ຈະຊ່ວຍກະຕຸ້ນເສດຖະກິດໃຫ້ມີການຂະຫຍາຍຕົວ, ມີການບໍລິການ ແລະ ມີການຊື້ຂາຍລົດພາຍໃນງານເພີ່ມຂຶ້ນ 40% ທຽບໃສປີຜ່ານມາ.
ກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ຮ່ວມກັບບໍລິສັດ ພີພີ ເອັນເຕີເທນເມັ້ນ ຈໍາກັດຜູ້ດຽວ ຈັດງານວາງສະແດງລົດນາໆຊາດ ວຽງຈັນ 2020 ຄັ້ງທີ V (Vientiane international motor Expo) ຢູ່ທີ່ສູນການຄ້າລາວ-ໄອເຕັກຕຶກເກົ່າ; ໂດຍມີພິທີເປີດຢ່າງເປັນທາງການໃນວັນທີ 9 ພະຈິກ 2020 ໂດຍການເປັນປະທານຂອງທ່ານ ໄຊສົມແພງ ນໍລະສິງ ຫົວໜ້າກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ; ໃຫ້ກຽດເຂົ້າຮ່ວມຂອງທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ; ທ່ານ ພອນຈັນ ເພັງສຸວັນ ອໍານວຍການບໍລິສັດ ພີພີ ເອັນເຕີເທັນເມັ້ນ ຈໍາກັດຜູ້ດຽວ ພ້ອມດ້ວຍບັນດາຫົວໜ້າກົມ, ຮອງກົມ, ເຈົ້າຂອງຄ້າຍລົດ ແລະ ພາກສ່ວນກ່ຽວຂ້ອງເຂົ້າຮ່ວມ. ເຊິ່ງງານນີ້ຈະດຳເນີນໄປເປັນເວລາ 9ວັນ ນັບແຕ່ວັນທີ 7-15ພະຈິກ 2020.
ທ່ານ ພອນຈັນ ເພັງສຸວັນ ໃຫ້ຮູ້ວ່າ: ຈຸດປະສົງຂອງການຈັດງານໃນຄັ້ງນີ້ກໍ່ເພື່ອເພີ່ມການສ້າງໂອກາດ ໃຫ້ແກ່ຜູ້ປະກອບການ ທາງດ້ານທຸລະກິດລົດ ແລະ ໂຄສະນາໃຫ້ຄວາມຮູ້ ກ່ຽວກັບນະວັດຕະກໍາໃໝ່ໆກ່ຽວກັບລົດ; ເພື່ອຍົກລະດັບຂີດຄວາມສາມາດໃນການແຂ່ງຂັນທາງດ້ານການຄ້າ ແລະ ຍົກສູງຄຸນນະພາບໃນການຊົມໃຊ້ພາຫະນະໃນແຕ່ລະລຸ້ນ ພ້ອມນີ້ກໍ່ເພື່ອເພີ່ມທາງເລືອກໃຫ້ແກ່ຜູ້ບໍລິໂພກໄດ້ເລືອກຊື້ລົດທີ່ມີຄຸນນະພາບ ແລະ ລາຄາສົມເຫດສົມຜົນ.
ແນວໃດກໍ່ຕາມ ສໍາລັບຄາດໝາຍຜົນໄດ້ຮບຈາກງານນີ້ແມ່ນ ກະຕຸ້ນເສດຖະກິດໃຫ້ມີການຂະຫຍາຍຕົວ, ມີການບໍລິການ ແລະ ມີການຊື້ຂາຍລົດພາຍໃນງານເພີ່ມຂຶ້ນ 40% ທຽບໃສ່ປີຜ່ານມາ; ຈະມີຜູ້ເຂົ້າມາຊົມງານວາງສະແດງໃນ 9ວັນປະມານ 1 ແສນຄົນ, ຈະມີຜູ້ມາໃຊ້ບໍລິການກວດກາເຊັກລົດກັບບັນດາຄ້າຍລົດຕ່າງໆ 300ຄັນ.
ທ່ານ ພອນຈັນ ເພັງ ສຸວັນ ກ່າວຕື່ມວ່າ: ສໍາລັບງານປີນີ້ ພວກເຮົາມີບັນດາຄ້າຍລົດຫຼາກຫຼາຍຄ້າຍເຂົ້າຮ່ວມເຊັ່ນ: Honda, Toyota, Nissan, Mazda, MG, Suzuki, Ford, Isuzu, JAC, Volkswagen, GAC ພ້ອມກັບບໍລິສັດສິນເຊື່ອ ແລະ ປະກັນໄພ ທີ່ໄວ້ຄອຍໃຫ້ບໍລິການແນະນໍາສໍາລັບທຸກຄົນທີ່ມີແຜນຈະຊື້ລົດໃໝ່. ທີ່ພິເສດໄປກວ່ານັ້ນ ງາໃນປີນີ້ ແມ່ນບໍ່ໄດ້ມີການກໍານົດສິນເຊື່ອແບບຜູກຂາດ ນັ້ນໝາຍຄວາມວ່າທຸກຄົນທີ່ມາທ່ຽວຊົມໃນງານ ຫາດສົນໃຈຢາກຈັບຈອງລົດແຕ່ລະລຸ້ນ ແມ່ນສາມາດເລືອກຂໍ້ສະເໜີຈາກສິນເຊື່ອແຕ່ລະຄ້າຍລົດໄດ້ຕາມໃຈ.
ດ້ານກິດຈະກໍາພາຍໃນງານປະກອບມີ ກິດຈະກໍາແຈກຄູປອງປ່ອນບັດຊີງໂຊກຂອງບັນດາຄ້າຍລົດຕ່າງໆ ເພື່ອຮັບສິດທິພິເສດ ການລຸ້ນຮັບລົດຈັກ ແລະ ເຄື່ອງອຸປະກອນຕົບແຕ່ງລົດມູນຄ່າຫຼາຍກວ່າ 100ລ້ານກີບ. ນອກຈາກນີ້, ພາຍໃນມື້ງານເປີດຢ່າງເປັນທາງການຍັງໄດ້ມີການເປີດໂຕລົດລຸ້ນໃໝ່ TAYRON 380TSI 4WD ຈາກຄ້າຍ Volkswagen ນໍາອີກ.
ໂອກາດດຽວກັນ ທ່ານ ໄຊສົມແພງ ນໍລະສິງ ກ່າວວ່າ: ງານດັ່ງກ່າວນີ້ເກີດຂຶ້ນ ຍ້ອນການຮ່ວມມືຈາກກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ກັບ ບໍລິສັດ ພີພີ ເອັນເຕີເທັນເມັ້ນ ຈໍາກັດຜູ້ດຽວ ໂດຍມີຈຸດປະສົງເພື່ອຊຸກຍູ້ ບັນດາຫົວໜ່ວຍທຸລະກິດ, ບັນດາບໍລິສັດລົດຕ່າງໆ ໄດ້ເຂົ້າມາເຜີຍແຜ່ໃຫ້ຄວາມຮູ້, ຂໍ້ມູນຂ່າວສານດ້ານລົດທີ່ຖຶກຕ້ອງ ໃຫ້ກັບຜູ້ບໍລິໂພກໄດ້ຮັບຮູ້ຫຼາຍຂຶ້ນ ຂະນະດຽວກັນ ກໍ່ເປັນການເປີດໂອກາດໃຫ້ບັນດາຄ້າຍລົດໄດ້ມີການເປີດໂຕລົດລຸ້ນໃໝ່, ໄດ້ມີການວາງສະແດງລົດຈາກຄ້າຍຂອງຕົນອອກສູ່ສາຍຕາມວນຊົນ ເພື່ອສ້າງຍອດຂາຍໃຫ້ໄດ້ດີຂຶ້ນ ອີກທັງເປັນການສະແດງໃຫ້ນັກລົງທຶນໄດ້ເຫັນວ່າອຸດສາຫະກໍາລົກຍົນໃນລາວເຮົາແມ່ນນັບມື້ນັບຂະຫຍາຍຕົວຂຶ້ນເລື້ອຍໆ.
