ຮູ້ຈັກ! ຊີດີ-ແປັບຊີ 2 ນັກເຕະທີ່ບໍ່ແມ່ນນັກເຕະຈາກລາວລີກ 2 ຍິງປະຕູ ໃນບານເຕະທົ່ວປະເທດ - Laoedaily

ຮູ້ຈັກ! ຊີດີ-ແປັບຊີ 2 ນັກເຕະທີ່ບໍ່ແມ່ນນັກເຕະຈາກລາວລີກ 2 ຍິງປະຕູ ໃນບານເຕະທົ່ວປະເທດ

ກາຍເປັນນັກເຕະທີ່ໜ້າຈັບຕາສໍາລັບ ຊີດີ ລາດທະວົງ ກອງໜ້າດາວເດັ່ນຂອງທີມແຂວງສາລະວັນ ແລະ ແປັບຊີ ບຸດດາຜົນ ກອງໜ້າຂອງທມແຂວງເຊກອງ ກາຍເປັນ 2 ນັກເຕະທີບໍ່ແມ່ນນັກເຕະຈາກລາວລີກ 2 ທີ່ລົງສະໜາມນັດທໍາອິດກໍສາມາດຍິງປະຕູໃຫ້ກັບທີມໃນການແຂ່ງຂັນບານເຕະທົ່ວປະເທດ ຕ້ອນຮັບວັນຊາດທີ 2 ທັນວາ ທີ່ນະຄອນຫຼວງວຽງຈັນ ເມື່ອທ້າຍອາທິດ ທີ່ຜ່ານມາ.

ການແຂ່ງຂັນບານເຕະທົ່ວປະເທດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີທີ່ນະຄອນຫຼວງວຽງຈັນ ລະຫວ່າງວັນທີ 6-21 ພະຈິກ 2020 ເປີດສາກຂຶ້ນຢ່າງເປັນທາງການເມື່ອທ້າຍອາທິດ ທີ່ຜ່ານມາໂດຍມີການແຂ່ງຂັນ 4 ຄູ່ (ນັດທໍາອິດຂອງ ສາຍ ກ ແລະ ສາຍ ຂ ) ປາກົດວ່າ: ຊະນະພຽງ 1 ຄູ່ ແລະ ສະເໝີກັນ ເຖິງ 3 ຄູ່ຄື ສາຍ ກ ແຂວງສາລະວັນ ບຽດຊະນະ ແຂວງໄຊສົມບູນ 1-0, ສາຍ ຂ ຜົ້ງສາລີ ສະເໝີກັບ ເຊກອງ 1-1, ສາຍ ຂ ແຂວງວຽງຈັນ ສະເໝີກັບ ອຸດົມໄຊ 0-0 ແລະ ສາຍ ກ ນະຄອນຫຼວງວຽງຈັນ ສະເໝີກັບ ແຂວງຊຽງຂວາງ 1-1.

ເຊິ່ງທັງ 4 ຄູ່ທໍາອິດມີປະຕູເກີດຂຶ້ນ 5 ປະຕູປາກົດວ່າ: ມີ 2 ນັກເຕະທີ່ແຈ້ງເກີດໃໝ່ ທີ່ບໍ່ໄດ້ແມ່ນນັກເຕະທີ່ເຄີຍມີປະສົບການໃນລາວລີກ 2 ລະດູການ 2020 ຄື: ຊີດີ ລາດທະວົງ ກອງໜ້າດາວເດັ່ນຂອງ ແຂວງສາລະວັນ ທີ່ນັດທໍາອິດສະແດງທັກສະ ແລະ ຄວາມວ່ອງໄວອັນເປັນທີ່ປະທັບໃຈໃຫ້ກັບແຟນບານ ລວມເຖິງສ້າງໂອກາດຍິງໃຫ້ກັບທີມຢ່າງຕໍ່ເນື່ອງ ກ່ອນທີ່ຈະຍິງປະຕູໄຊຈາກຈຸດໂທດຊ່ວຍໃຫ້ ສາລະວັນ ເອົາຊະນະ ໄຊສົມບູນ 1-0, ສ່ວນອີກຄົນເປັນ ແປັບຊີ ບຸດດາຜົນ ທີ່ຍິງຟຣີຄິກເຂົ້າປະຕູໄປຢ່າງສວຍງາມໃນໄລຍະຕໍ່ເວລາບາດເຈັບເຄິ່ງເວລາທີ 2 ຊ່ວຍໃຫ້ ເຊກອງ ຕີສະເໝີ ຜົ້ງສາລີ 1-1.

ຂະນະທີ່ ອີກ 3 ນັກເຕະທີ່ຍິງປະຕູໃນທ້າຍອາທິດທີ່ຜ່ານມາ ແມ່ນນັກເຕະຈາກລາວລີກ 2 ທັງໝົດໄດ້ແກ່ ສີສະຫວາດ ດາລາວົງ ນັກເຕະຈາກ ກອງທັບ ເອັຟຊີ ຍິງໃຫ້ແຂວງຜົ້ງສາລີ ນັດສະເໝີກັບ ເຊກອງ 1-1, ສ່ວນອີກ 2 ຄົນແມ່ນ ອາຄົມ ທໍລະນີ ກອງໜ້າຈາກ ເມືອງຫາດ ຢູໄນເຕັດ ຍິງໃຫ້ກັບ ນະຄອນຫຼວງວຽງຈັນ ແລະ ສີນວນ ຊາມຸນຕີ ຍິງໃຫ້ກັບ ທີມແຂວງຊຽງຂວາງ ນັດທີ່ ນະຄອນຫຼວງ ສະເໝີກັບ ແຂວງຊຽງຂວາງ 1-1.

ຊີດີ ເກີດວັນທີ 29 ຕຸລາ 2003 ທີ່ແຂວງສາລະວັນ ໃຫ້ສໍາພາດກັບທີມຂ່າວເສດຖະກິດ-ການຄ້າ ວ່າ: ຈຸດເລີ່ມຕົ້ນການເປັນນັກເຕະຂອງນ້ອງແມ່ນເລີ່ມ ຫຼິ້ນສະໂມສອນ ໄອດີຊີ ຈໍາປາສັກ 2014, ກ່ອນທີ່ຈະໄດ້ຂຶ້ນມາຫາປະສົບການກັບ ລາວໂຕໂຢຕ້າ ໃນຊຸດບໍ່ເກີນ 15 ປີລະຫວ່າງປີ 2018-2019 ໂດຍຍິງໃຫ້ 13 ປະຕູ ແລະ ສົ່ງບານໃຫ້ໝູ່ຍິງອີກ 7 ປະຕູຈາກການລົງສະໜາມ 7 ນັດ ໃນບານເຕະຊີງຂັນ ສຕລ ຢູ 15 ຄັ້ງທໍາອິດ ແລະ ປັດຈຸບັນແມ່ນຫຼິ້ນໃຫ້ກັບສະໂມສອນ ປິ່ນແກ້ວ ໄອດີຊີ ຊຸດໃຫຍ່ ສາມາດພາທີມເຂົ້າຮອບ 4 ທີມໃນບານເຕະຊີງຂັນວັນຊາດ ທີ່ແຂວງຈໍາປາສັກ ( ປັດຈຸບັນແມ່ນພັກການແຂ່ງຂັນ ).

ຊີດີ ກ່າວອີກວ່າ: ຈົນມາເຖິງປີນີ້ ແມ່ນສາມາດຕິດທີມແຂວງສາລະວັນ ຊຸດໃຫຍ່ເປັນຄັ້ງທໍາອິດ ແລະ ນັດທໍາອິດໃນບານເຕະທີ່ນະຄອນຫຼວງວຽງຈັນ ທີ່ພົບກັບ ແຂວງໄຊສົມບູນ ແມ່ນໃນເກມແມ່ນກົດດັນຫຼາຍ ແຕ່ຫຼັງຈົບການແຂ່ງຂັນກໍສາມາດຄາຍຄວາມກົດດັນໄດ້ສໍາເລັດ. ຢ່າງໃດກໍຕາມ ເປົ້າໝາຍຕໍ່ໄປຄືຕ້ອງເຮັດໃຫ້ດີທີ່ສຸດ ເພາະຍັງມີງານໜັກລໍຖ້າຢູ່.

ຂະນະທີ່ ແປັບຊີ ບຸດດາຜົນ ເກີດເມື່ອວັນ 28 ມີນາ 1994 ທີ່ແຂວງເຊກອງ ກ່າວວ່າ: ຈຸດເລີ່ມຕົ້ນການເປັນນັກເຕະກໍເລີ່ມມາແຕ່ຍັງນ້ອຍ ແລະ ຫຼິ້ນໃຫ້ກັບທີມໂຮງຕອນມັດທະຍົມມັດທະຍົມ ຈົນໃນປີ 2015 ໄດ້ຕິດທີມ ໄອດີຊີ ຈໍາປາສັກ ຊຸດໃຫຍ່ ແລະ ໄດ້ໂອກາດລົງແຂ່ງຂັນ ລາວລີກ ຈໍານວນ 2 ນັດ ກ່ອນກັບໄປຫຼິ້ນຢູ່ພາຍໃນແຂວງ ແລະ ປັດຈຸບັນແມ່ນຫຼິ້ນໃຫ້ກັບ ທີມສະມາຄົມລາວ-ຫວຽດ ເຂົ້າຮ່ວມການແຂ່ງຂັນບານເຕະວັນຊາດທີ 2 ທັນວາທີ່ແຂວງຈໍາປາສັກ.

ແປັບຊີ ກ່າວອີກວ່າ: ປະຕູທໍາອິດທີ່ຍິງໃຫ້ກັບ ແຂວງເຊກອງ ນ້ອງຮູ້ສຶກດີໃຈຫຼາຍທີ່ສຸດ. ນອກນັ້ນ, ຍັງໄດ້ໂອກາດມາຫຼິ້ນໃນງານໃຫຍ່ໆໄດ້ມາພົບທີມແຂວງ ຜົ້ງສາລີ ມີນັກກີລາເກັ່ງໆຫຼາຍຄົນທີ່ມີປະສົບການທັງໃນລາວລີກ ແລະ ອື່ນໆ ແນ່ນອນນ້ອງຈະເຮັດໃຫ້ດີທີ່ສຸດ ເພື່ອພາທີມເຂົ້າຮອບຕໍ່ໄປໃຫ້ໄດ້.

ສໍາລັບ ອາທິດນີ້ລະຫວ່າງ 9-15 ພະຈິີກ 2020 ຈະມີການແຂ່ງຂັນທຸກມື້ ແລະ ຈະຈົບຮອບແບ່ງກຸ່ມ, ສ່ວນວັນທີ 17 ພະຈິກ 2020 ຈະເລີ່ມແຂ່ງຂັນຮອບ 8 ທີມສຸດທ້າຍເປັນຕົ້ນໄປ ( ຈະລາຍງານໃຫ້ຊາບພາຍຫຼັງ ).

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ