ອຸຕຸອອກແຈ້ງເຕືອນ 4 ແຂວງພາກໃຕ້ ກຽມຮັບມືໄພພະຍຸໝຸນເຂດຮ້ອນໂຄນີ - Laoedaily

ອຸຕຸອອກແຈ້ງເຕືອນ 4 ແຂວງພາກໃຕ້ ກຽມຮັບມືໄພພະຍຸໝຸນເຂດຮ້ອນໂຄນີ

4 ແຂວງພາກໃຕ້ ກຽມຮັບມືໄພພະຍຸໝຸນເຂດຮ້ອນໂຄນີ (Goni) ໄລຍະວັນທີ 5 ຫາ 6 ພະຈິກນີ້ ເຊິ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ແລະ ມີລົມພັດແຮງຢູ່ບາງທ້ອງຖິ່ນ.


ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ອອກແຈ້ງເຕືອນໄພພະຍຸໝຸນເຂດຮ້ອນໂຄນີ (Goni) ໄລຍະວັນທີ 5 ຫາ 6 ພະຈິກ 2020 ສະບັບທີ 1 ວ່າ: ພະຍຸໝຸນເຂດຮ້ອນ (Goni) ຫົວທີ 19 ປະຈໍາປີ 2020 ໃນເຂດດ້ານຕາເວັນຕົກຂອງມະຫາສະໝຸດປາຊີຟິກຕອນເໜືອ ຊຶ່ງໃນເວລາ 8 ໂມງ ຂອງວັນທີ 3 ພະຈິກນີ້ ມີຈຸດສູນກາງຢູ່ເສັ້ນຂະໜານທີ່ 14.9 ອົງສາເໜືອ ແລະ ເສັ້ນແວງທີ່ 15.3 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ, ຄາດຄະເນພະຍຸຫົວນີ້ ຈະເຄື່ອນຂຶ້ນຝັ່ງພາກກາງຕອນລຸ່ມຂອງ ສສ ຫວຽດນາມໃນວັນທີ 5 ຫາ 6 ພະຈິກ 2020 ນີ້ ແລະ ສືບຕໍ່ອ່ອນກໍາລັງລົງເປັນພາຍຸດີເປຼ່ຊັນ ເຄື່ອນທີ່ຜ່ານແຂວງ ອັດຕະປື ແລະ ຈຳປາສັກ ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ແລະ ມີລົມພັດແຮງຢູ່ບາງທ້ອງຖິ່ນ.


ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງ ພາກໃຕ້ ເຊັ່ນ: ສາລະວັນ, ເຊກອງ, ຈຳປາສັກ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນ້ຳຖ້ວມຊູ, ນ້ຳຖ້ວມອັ່ງ ແລະ ພ້ອມນີ້ໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງເປັນປະຈໍາ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ