ສະຫາຍ ສິນລະວົງ ຄຸດໄພທູນ ໄດ້ຮັບເລືອກເປັນເລຂາຄະນະພັກ ນະຄອນຫຼວງວຽງຈັນອີກສະໄໝ - Laoedaily

ສະຫາຍ ສິນລະວົງ ຄຸດໄພທູນ ໄດ້ຮັບເລືອກເປັນເລຂາຄະນະພັກ ນະຄອນຫຼວງວຽງຈັນອີກສະໄໝ

ກອງປະຊຸມໃຫຍ່ຜູ້ແທນອົງຄະນະພັກນະຄອນຫລວງວຽງຈັນ ຄັ້ງທີ VII ປິດລົງດ້ວຍຜົນສຳເລັດອັນງົດງາມໃນຕອນແລງ ວັນທີ 29 ຕຸລາ 2020 ໂດຍການເປັນປະທານຂອງ ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ,ເລຂາຄະນະພັກ, ເຈົ້າຄອງນະຄອນຫລວງວຽງຈັນ. ໃຫ້ກຽດເຂົ້າຮ່ວມມີສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງສປປລາວ

ກອງປະຊຸມໃຫຍ່ໃນຄັ້ງນີ້ໄດ້ລົງປະຊາມະຕິຮັບຮອງເອົາບັນດາເນື້ອໃນສໍາຄັນຄື: ໄດ້ຄົ້ນຄ້ວາຢ່າງເລິກເຊິ່ງ ແລະ ເປັນເອກະສັນຮັບຮອງເອົາລາຍງານການເມືອງຂອງຄະນະບໍລິຫານງານພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2020-2025) ຂອງນະຄອນຫຼວງວຽງຈັນ ພ້ອມນັ້ນ ໄດ້ສະແດງຄວາມເຫັນດີນໍາຮ່າງລາຍງານການເມືອງມີຜົນງານພົ້ນເດັ່ນທີ່ຍາດມາໄດ້ໃນທຸກຂົງເຂດ ໃນ 5 ປີຜ່ານມາຄື: ການພັດທະນາເສດຖະກິດ ເຖິງວ່າຈະປະເຊີນກັບຄວາມຫຍຸ້ງຍາກອັນໜັກໜ່ວງ ແຕ່ເສດຖະກິດ ນວ ຍັງສາມາດປະຄັບປະຄອງຢູ່ໃນສະພາບໝັ້ນທ່ຽງ ສືບຕໍ່ຂະຫຍາຍຕົວດ້ວຍຈັງຫວະເຕີບໂຕສູງ ສະເລ່ຍ ໃນ 5 ປີ 9,15% ມູນຄ່າ GDP ບັນລຸ 224.654 ຕື້ກີບ ສະເລ່ຍລາຍໄດ້ 6.004 ໂດລາຕໍ່ຄົນຕໍ່ປີ ຂຸດຄົ້ນແຫຼ່ງທຶນເພື່ອການພັດທະນາໄດ້ 98 ພັນກວ່າຕື້ກີບ (ລື່ນແຜນການ 17 ກ່ວາ%) ຂຸດຄົ້ນລາຍຮັບງົບປະມານພູດທ້ອງຖິ່ນຮັບຜິດຊອບໄດ້ 6.061,87 ຕື້ກີບ ປະຕິບັດພັນທະລາຍຮັບພູດທ້ອງຖິ່ນໃຫ້ສູນກາງໃນທຸກປີ ການຊຳລະໜີ້ສິນສາທາລະນະທີ່ສ້າງຂື້ນກ່ອນປີ 2015 ບັນລຸຄາດໝາຍວາງໄວ້ ຖານະການເງິນໄດ້ຍົກລະດັບສູງຂື້ນ ບັນດາໂຄງການໃຫຍ່ລະດັບຊາດປະຕິບັດຢູ່ ນວ 18 ຄາດໝາຍຕົ້ນຕໍ 6 ໂຄງການບຸກທະລຸ ແມ່ນໄດ້ຮັບການຈັດຕັ້ງປະຕິບັດໃນພາກຕົວຈິງ.

ພ້ອມນັ້ນກອງປະຊຸມໃຫຍ່ຍັງໄດ້ຮັບຮອງເອົາບົດສໍາຫຼວດການນໍາພາຂອງຄະນະບໍລິຫານງານພັກນະຄອນຫຼວງວຽງຈັນ ສະໄໝທີ VI ທີ່ໄດ້ຕີລາຄາສູງຕໍ່ຄວາມຮັບຜິດຊອບການເມືອງ ແລະ ຄວາມເປັນເຈົ້າການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VI ບັນລຸຜົນສໍາເລັດໃນຫຼາຍດ້ານ ພ້ອມນັ້ນກໍ່ເຫັນໄດ້ຈຸດອ່ອນ ຂໍ້ຄົງຄ້າງຕົ້ນຕໍຈໍານວນໜຶ່ງເພື່ອກໍາຈັດແກ້ໄຂຢ່າງຈິງຈັງ ແລະ ຕັ້ງໜ້າເສີມຂະຫຍາຍ 4 ບົດຮຽນຈາກພຶດຕິກໍາເພື່ອເຊີດຊູບົດບາດການນໍາພາຂອງອົງຄະນະພັກໃຫ້ສູງຂຶ້ນຕື່ມອີກ.


ໃນໂອກາດນີ້ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ເຂົ້າໃນການປ່ອນບັດຄັດເລືອກເອົາຄະນະບໍລິຫານງານພັກນະຄອນຫຼວງວຽງຈັນຊຸດໃໝ່ ເຊິ່ງມີຜູ້ອອກສະໝັກຮັບເລືອກຕັ້ງ ລວມທັງໝົດ 46 ສະຫາຍ ເລືອກໄດ້ 41 ສະຫາຍ ຍິງ 9 ສະຫາຍ ເພື່ອເປັນແກນນໍາໃນການສືບຕໍ່ນໍາພາປະຕິບັດມະຕິກອງປະຊຸມໃຫຍ່ຜູ້ແທນ ອົງຄະນະພັກນະຄອນຫຼວງວຽງຈັນ ຄັ້ງທີ VII ວາງອອກ ໃຫ້ປະກົດຜົນເປັນຈິງ

ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກນະຄອນຫຼວງວຽງຈັນ ສະໄໝທີ VII ໄດ້ເປັນເອກະສັນຢ່າງສົມບູນ ເລືອກຕັ້ງຄະນະປະຈໍາພັກ ເລຂາ-ຮອງເລຂາຄະນະພັກ ແລະ ປະທານ-ຮອງປະ ທານກວດກາພັກຄື: ເລືອກຕັ້ງຄະນະກໍາມະການປະຈໍາພັກ 13 ສະຫາຍ ຍິງ 1 ສະຫາຍ ຄື:
1ສະຫາຍ ສິນລະວົງ ຄຸດໄພທູນ
2 ສະຫາຍ ອານຸພາບ ຕຸນາລົມ
3ສະຫາຍ ອາດສະພັງທອງ ສີພັນດອນ
4ສະຫາຍ ພົນຈັດຕະວາ ສີພອນ ຈັນສົມວົງ
5ສະຫາຍ ນາງ ລຳພອຍ ສີອັກຄະຈັນ
6ສະຫາຍ ຊົງເລົາ ຢົງນູ


7ສະຫາຍ ວິລະສັກ ນາມມຸນຕີ
8ສະຫາຍ ພູວົງ ວົງຄຳຊາວ
9ສະຫາຍ ພູຂົງ ບັນນະວົງ
10ສະຫາຍ ຖະໜອມ ທຳທອງ
11ສະຫາຍ ບຸນໜາ ຜາທຸມມະວົງ
12ສະຫາຍ ເດດສົງຄາມ ທຳມະວົງ
13ສະຫາຍ ພັອ ສຸກພະຈັນ ບຸດດາຄຳ

ກອງປະຊຸມໄດ້ຄັດເລືອກເອົາສະຫາຍປອ ສິນລະວົງ ຄຸດໄພທູນ ເປັນເລຂາຄະນະພັກ ນວ, ສະຫາຍ ປອ ອານຸພາບ ຕຸນາລົມ ແລະ ສະຫາຍ ປອ ອາດສະພັງທອງ ສີພັນດອນ ເປັນຮອງເລຂາຄະນະພັກ. ພ້ອມນັ້ນໄດ້ເລືອກເອົາ ສະຫາຍ ວິລະສັກ ນາມມຸນຕີ ເປັນປະທານກວດກາພັກ ສະຫາຍ ນາງ ຄຳໄພ ລັດສະໝີ ສະຫາຍ ກອງດີ ທຳມະວົງ ສະຫາຍ ບຸນສີ ກອງບຸດ ແລະ ສະຫາຍ ຈັນສະຫວ່າງ ຫິມມະພັນ ເປັນ ຮອງປະທານກວດກາພັກ.
ນອກຈາກນັ້ນໄດ້ປ່ອນບັດເລືອກຕັ້ງເອົາຜູ້ແທນສົມບູນ ແລະ ສໍາຮອງ ເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກ ເຊິ່ງມີຜູ້ແທນສົມບູນ 33 ສະຫາຍ ຍິງ 7 ສະຫາຍ ຜູ້ແທນສໍາຮອງ 3 ສະຫາຍ ຍິງ 2 ສະຫາຍ.

ຂໍ້ມູນ-ພາບ: ໜັງສືພິມວຽງຈັນໃໝ່

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ