ທຸລະກິດກະສິກໍາຍັງສາມາດຂະຫຍາຍຕົວໄດ້ດີໃນໄລຍະການລະບາດຂອງພະຍາດໂຄວິດ - 19 - Laoedaily

ທຸລະກິດກະສິກໍາຍັງສາມາດຂະຫຍາຍຕົວໄດ້ດີໃນໄລຍະການລະບາດຂອງພະຍາດໂຄວິດ – 19

ການລະບາດຂອງພະຍາດໂຄວິດ – 19 ອາດຈະກະທົບຕໍ່ທຸລະກິດຂະແໜງການດ້ານບໍລິການ ແຕ່ສໍາລັບທຸລະກິດກະສິກໍາເຫັນວ່າຍັງມີທ່າແຮງ ແລະ ໂອກາດສູງ ໂດຍສະເພາະແມ່ນການສົ່ງເສີມການຜະລິດພາຍໃນເພື່ອບໍລິໂພກ ແລະ ສົ່ງອອກໄປຕ່າງປະເທດ.

ທ່ານ ນາງ ອິນແປງ ຊາມົນຕີ ປະທານ ບໍລິສັດ ສາລະວັນ ພັດທະນາຂາອອກ – ຂາເຂົ້າຈໍາກັດ, ບໍລິສັດປາກຊ່ອງພັດທະນາຂາອອກ – ຂາເຂົ້າ ຈໍາກັດຜູ້ດຽວ ທັງສອງບໍລິສັດຫຼັກໆແມ່ນສົ່ງເສີມ ແລະ ເກັບຊື້ສິນຄ້າກະສິກໍາ ກ່າວວ່າ : ໃນວັນທີ 1 ພະຈິກທີ່ຈະມາເຖິງ ບໍລິສັດພວກເຮົາຈະເລີ່ມເປີດເກັບຊື້ມັນຕົ້ນນໍາປະຊາຊົນ ເຊິ່ງປີນີ້ຄວາມຕ້ອງການມັນຕົ້ນແຫ້ງ 3 ແສນໂຕນ ແລະ ມັນຕົ້ນດິບ 1,6 ແສນໂຕນ ຖ້າທຽບໃສ່ປີຜ່ານມາທີ່ເກັບຊື້ມັນຕົ້ນແຫ້ງ 2 ແສນໂຕນ ແລະ ມັນຕົ້ນດິບ 1,5 ແສນໂຕນ ເຫັນວ່າເພີ່ມຂຶ້ນ, ການເກັບຊື້ຈະແບ່ງເປັນ 2 ປະເພດ ຄື: ມັນຕົ້ນອີນຊີ ແລະ ມັນຕົ້ນທົ່ວໄປ; ສ່ວນລາຄາບໍລິສັດໄດ້ປະກັນຕໍ່າສຸດມັນແຫ້ງ 700 ກີບຕໍ່ກິໂລ, ມັນຕົ້ນສົດ 560 ກີບຕໍ່ກີໂລ. ທັງນີ້, ລາຄາເກັບຊື້ຕົວຈິງກໍຂຶ້ນກັບທ້ອງຕະຫຼາດ.

ທ່ານກ່າວອີກວ່າ: ພະຍາດໂຄວິດມີທັງດ້ານດີ ແລະ ບໍ່ດີ, ສໍາລັບທຸລະກິດກະສິກໍາຂອງລາວມີທ່າກ້າວກະໂດດ ເຊິ່ງມີທ່າອ່ຽງຂະຫຍາຍຕົວໂດຍສະເພາະການຂົນສົ່ງສິນຄ້າໄປຕ່າງປະເທດ ເຊິ່ງລັດຖະບານ ສປປ ລາວ ກໍມີນະໂຍບາຍສູງໃນການຂົນສົ່ງສິນຄ້າຖ້າຫາກດໍາເນີນຖືກຕ້ອງຕາມລະບຽບກົດໝາຍເຫັນວ່າມີໂອກາດສູງໃນການຂະຫຍາຍຕົວ.

ນອກຈາກສົ່ງເສີມປະຊາຊົນປູກ ແລະ ເກັບຊື້ມັນຕົ້ນແລ້ວການຜະລິດພືດຜັກອີນຊີກໍເຫັນວ່າຂະຫຍາຍຕົວດີ ໂດຍສະເພາະຍອດສົ່ງສິນຄ້າຂຶ້ນມາຂາຍຢູ່ນະຄອນຫຼວງວຽງຈັນ ໃນເມື່ອກ່ອນສົ່ງພືດຜັກຂຶ້ນມາ ອາທິດລະ 1 – 2 ໂຕນ. ມາຮອດປັດຈຸບັນ 11 ໂຕນ ເຊິ່ງແຍກເປັນວັນພຸດ 3 ໂຕນ ແລະ ວັນເສົາ 8 ໂຕນ ທີ່ສົ່ງຂຶ້ນມາຂາຍຢູ່ເດີ່ນໄອເຕັກ ເຊິ່ງເປັນຈຸດດີໜຶ່ງທີ່ພາກລັດ ມີນະໂຍບາຍສົ່ງເສີມນໍາໃຊ້ສິນຄ້າທີ່ມີພາຍໃນຫຼຸດຜ່ອນການນໍາເຂົ້າ ໂດຍສະເພາະພືດຜັກຕ່າງໆ.

ຢ່າງໃດກໍຕາມ, ສໍາລັບການເປີດລານເພື່ອເກັບຊື້ມັນຕົ້ນຂອງຕົນເອງ ກໍຮຽກຮ້ອງໃຫ້ຊາວສວນເພີ່ມທະວີເອົາໃຈໃສ່ໃນການເກັບກູ້ຜົນຜະລິດຂອງຕົນ ແລະ ຂົນສົ່ງມາລານມັນໃຫ້ທັນເວລາ ເຊິ່ງທາງບໍລິສັດເອງກໍຈະປະສານໄປຍັງຊາວສວນຜູ້ທີ່ປູກຕົວຈິງ ເພື່ອວາງແຜນການເກັບຊື້ ໂດຍສະເພາະແຈ້ງໃຫ້ຊາວສວນຮັບຮູ້ວ່າໃນແຕ່ລະວັນເຮົາຈະເກັບຊື້ມັນຈາກປະຊາຊົນບ້ານໃດ ເພື່ອໃຫ້ເຂົາເຈົ້າກະກຽມເກັບກູ້ ເພື່ອຈະໄດ້ຊື້ມັນທີ່ມີຄຸນນະພາບ ( ເກັບຊື້ມັນອາຍຸ 8 – 9 ເດືອນ ) ສ່ວນແຜນຂະຫຍາຍເນື້ອທີ່ປູກ ບໍລິສັດພວກເຮົາບໍ່ສົ່ງເສີມໃຫ້ປະຊາຊົນເທື່ອ ເຊິ່ງປີຜ່ານມາພວກເຮົາສົ່ງເສີມປະຊາຊົນປູກ 20 ພັນເຮັກຕາ ສ່ວນປີນີ້ໃຫ້ເນື້ອທີ່ຜະລິດ 15 ພັນເຮັກຕາ ແຕ່ໃຫ້ໄດ້ຜົນຜະລິດເພີ່ມຂຶ້ນ ເຊິ່ງບໍລິສັດກໍໄດ້ຮັບການສະໜັບສະໜູນຈາກໂຄງການກຣີນ ໃນການຜະລິດທ່ອນພັນມັນຕົ້ນທີ່ມີຄຸນນະພາບ, ຜະລິດຈາກເນື້ອເຍື່ອ ເຊິ່ງບໍ່ມີເຊື້ອພະຍາດປົນເປື້ອນ, ບໍ່ມີພະຍາດໃບດ່າງ, ທົນທານຕໍ່ອາກາດແຫ້ງແລ້ງ. ສ່ວນເນື້ອທີ່ເຫຼືອຈາກປູກມັນຕົ້ນເຮົາຈະສົ່ງເສີມປະຊາຊົນປູກກ້ວຍ ໂດຍໄລຍະນີ້ກ້ວຍນໍ້າຢູ່ບັນດາແຂວງພາກໃຕ້ສົ່ງອອກວັນລະ 300 – 500 ໂຕນ ເຊິ່ງໄລຍະນີ້ການເກັບຊື້ມີຢູ່ແຂວງສະຫວັນນະເຂດ, ສາລະວັນ ແລະ ຈໍາປາສັກ.

ໃນນາມທີ່ເປັນບໍລິສັດເກັບຊື້ສິນຄ້າສົ່ງອອກໄປຕ່າງປະເທດ ຕໍ່ຜົນກະທົບຂອງການແຂງຄ່າເງິນ ເຫັນວ່າບໍລິສັດພວກເຮົາດໍາເນີນການໄປຕາມລະບຽບກົດໝາຍ ໂດຍສະເພາະການຂາຍສິນຄ້າໄປຕ່າງປະເທດ, ຜູ້ຮັບຊື້ໂອນເປັນເງິນຕາຜ່ານທະນາຄານ ບໍລິສັດກໍຖອນອອກມາເປັນເງິນກີບຕາມລະບຽບກົດໝາຍ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ