ຄະນະຄຸ້ມຄອງເຂດເສດຖະກິດພິເສດ ນວ ມອບເຄື່ອງກິລາໃຫ້ກອງບັນຊາການ ປກສ ນວ - Laoedaily

ຄະນະຄຸ້ມຄອງເຂດເສດຖະກິດພິເສດ ນວ ມອບເຄື່ອງກິລາໃຫ້ກອງບັນຊາການ ປກສ ນວ

ພິທີມອບ-ຮັບອຸປະກອນເຄື່ອງກິລາໄດ້ມີຂຶ້ນ ທີ່ສະໜາມກີລາບານເຕະຫຍ້າທຽມ ທະນົງອາດ ເມືອງໄຊເສດຖາ ນະຄອນຫຼວງວຽງຈັນ, ໃນຄັ້ງວັນທີ 23 ຕຸລາ 2020 ໂດຍເປັນການກ່າວມອບຂອງທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດ ນະຄອນຫຼວງວຽງຈັນ ລວມມູນຄ່າ 8,500,000 ກີບ ໃນນີ້ມີເຄື່ອງກິລາບານເຕະ 71 ຊຸດ, ບານເຕະ 3 ໜ່ວຍ, ກະຕໍ້ 3 ໜ່ວຍ ແລະ ຕາໜ່າງກະຕໍ້ 2 ດ່າງ ແລະ ກ່າວຮັບແມ່ນ ພັອ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ, ມີທ່ານ ເຟີງຫຼິງ ຜູ້ຕາງໜ້າເຂດພັດທະນາກວມລວມໄຊເຊດຖາ ພ້ອມດ້ວຍບັນດາພະນັກງານຂອງທັງສອງພາກສ່ວນດັ່ງກ່າວເຂົ້າຮ່ວມເປັນສັກຂີພິຍານຢ່າງພ້ອມພຽງ.

ທ່ານ ທະນົງໄຊ ຄຸດໄພທູນ ໄດ້ໃຫ້ຮູ້ວ່າ: ກິດຈະກຳການສ້າງຂະບວນການໃນຄັ້ງນີ້ ເພື່ອເປັນນິດ ໝາຍ ແລະ ເປັນໂອກາດອັນດີໃຫ້ແກ່ບັນດາກົມກອງພາຍໃນ ນະຄອນຫຼວງວຽງຈັນ ໂດຍສະເພາະລະຫວ່າງ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງ ແລະ ກອງບັນຊາການປ້ອງກັນຄວາມສະຫງົບ ນວ, ໄດ້ມີໂອກາດຮັດແໜ້ນຄວາມສາມັກຄີ, ມິດຕະພາບ, ສຸຂະພາບ ແລະ ແລກປ່ຽນປະສົບການຮ່ວມກັນໃຫ້ນັບມື້ນັບແໜ້ນແຟ້ນຍິງຂຶ້ນເລື້ອຍໆ, ທີ່ສຳຄັນກໍເພື່ອເປັນການສ້າງຂະບວນການຄຳນັບຮັບຕ້ອນວັນສຳຄັນຕ່າງໆຂອງຊາດເປັນຕົ້ນແມ່ນ: ວັນຊາດທີ 2 ທັນວາ ຄົບຮອບ 45 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 100 ປີ ແລະ ກອງປະຊຸມໃຫຍ່ ຄັ້ງທີ 7 ຂອງອົງຄະນະພັກ ນວ ທີ່ຈະໄຂຂຶ້ນໃນໄວໆນີ້.

ພ້ອມດຽວກັນນີ້ທັງສອງພາກສ່ວນຍັງໄດສ້າງຂະບວນການເຕະບານມິດຕະພາບຮ່ວມກັນ ໂດຍໃຊ້ເວລາ 60 ນາທີ ມີນັກກິລາເບື້ອງລະ 8 ຄົນ ຮັບ 1 ຄົນ, ສຳລັບຜົນຂອງການແຂ່ງຂັນບານເຕະມິດຕະພາບໃນຄັ້ງນີ້ຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ ໄດ້ຊະນະທີມ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ຢູ່ທີ 7-4

ຂ່າວໂດຍ: ອ້ວນດໍາ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ