ອາຊຽນ ໄຂກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນ ຄັ້ງທີ 9 - Laoedaily

ອາຊຽນ ໄຂກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນ ຄັ້ງທີ 9

ຂປລ. ກອງປະຊຸມທາງໄກ ລັດຖະມົນຕີ ຮັບຜິດຊອບວຽກງານວັດທະນະທຳ ແລະ ສິລະປະ ອາຊຽນ ຄັ້ງທີ 9 ພາຍໃຕ້ຫົວຂໍ້ “ຜົນກະທົບຂອງ ໂຄວິດ-19 ແລະ ທິດທາງຕໍ່ໜ້າຢູ່ໃນຂົງເຂດວຽກງານວັດທະນະທຳ ແລະ ສິລະປະ”, ໄດ້ຈັດຂຶ້ນໃນຕອນເຊົ້າຂອງວັນທີ 22 ຕຸລາ 2020 ໂດຍແມ່ນປະເທດກຳປູເຈຍ ເປັນເຈົ້າພາບຈັດກອງປະຊຸມທາງໄກດັ່ງກ່າວ ແລະ ກອງປະຊຸມປິ່ນອ້ອມ, ໂດຍພາຍໃຕ້ການເປັນປະທານຂອງ ທ່ານ ນາງ ເຜີ້ງ ສັກໂກນາ (PHOEURNG Sackona) ລັດຖະມົນຕີ ກະຊວງວັດທະນະທຳ ແລະ ສິລະປະກຳ ແຫ່ງ ຣາຊະອານາຈັກ ກຳປູເຈຍ, ຝ່າຍລາວ ນຳໂດຍ ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ, ມີບັນດາ ທ່ານ ລັດຖະມົນຕີ ຮັບຜິດຊອບວຽກງານວັດທະນະທຳ ແລະ ສິລະປະ ອາຊຽນ, ມີເລຂາທິການໃຫຍ່ອາຊຽນ ພ້ອມດ້ວຍພາກສ່ວນທີ່ກ່ຽວ ເຂົ້າຮ່ວມ.

ທ່ານ ນາງ ເຜີ້ງ ສັກໂກນາ ກ່າວວ່າ: ກອງປະຊຸມຄັ້ງນີ້, ມີຈຸດປະສົງເພື່ອກຳນົດທິດທາງ ແລະ ສ້າງເປັນກິດຈະກຳການເຄື່ອນໄຫວ ຂອງຂະແໜງການໃນຕໍ່ໜ້າ ທ່າມກາງການແພ່ລະບາດ ແລະ ຫລັງການແພ່ລະບາດຂອງພະຍາດໂຄວິດ-19 ແລະ ສືບຕໍ່ຊຸກຍູ້ສົ່ງເສີມ ການຈັດຕັ້ງປະຕິບັດບັນດາບາດກ້າວສຳຄັນທີ່ໄດ້ກຳນົດໄວ້ ຢູ່ໃນແຜນແມ່ບົດປະຊາຄົມວັດທະນະທຳ-ສັງຄົມ ອາຊຽນ 2025, ແຜນຍຸດທະສາດດ້ານວັດທະນະທຳ ແລະ ສິລະປະອາຊຽນ 2016-2025 ແລະ ບັນດາຖະແຫລງການອື່ນໆ ຂອງລັດຖະມົນຕີ ຮັບຜິດຊອບວຽກງານວັດທະນະທຳ ແລະ ສິລະປະ ອາຊຽນ ເພື່ອສືບຕໍ່ເພີ່ມທະວີການຮ່ວມມື ແລະ ສ້າງຄວາມເຂັ້ມແຂງການພົວພັນ ແລະ ຮ່ວມມືກັບບັນດາປະເທດຄູ່ຮ່ວມເຈລະຈາຂອງອາຊຽນ ລວມທັງ ອາຊຽນ+3, ຈີນ, ຍີ່ປຸ່ນ ແລະ ສ.ເກົາຫລີ.


ໂອກາດດຽວກັນນີ້, ທ່ານ ກິແກ້ວ ໄຂຄໍາພິທູນ ໄດ້ມີຄຳເຫັນແລກປ່ຽນ ກ່ຽວກັບທິດທາງແຜນ ການຕໍ່ໜ້າເພື່ອຊຸກຍູ້ ແລະ ຂະຫຍາຍການຮ່ວມມື ໃນຂົງເຂດວຽກງານວັດທະນະທຳ ແລະ ສິລະປະ ເພື່ອຮັບປະກັນຄວາມປອດໄພຈາກພະຍາດໂຄວິດ-19 ເປັນຕົ້ນ ອາຊຽນ ສືບຕໍ່ໃຫ້ການຮ່ວມມືຢ່າງໃກ້ຊິດ ແລະ ທຸກຄົນມີສ່ວນຮ່ວມຢ່າງຕັ້ງໜ້າ ກັບຄະນະສະເພາະກິດ ເພື່ອຮັບປະກັນມາດຕະການປະຕິບັດບັນດາຄຳສັ່ງ ແລະ ຄໍາແນະນໍາຂອງລັດ ໃນແຕ່ລະໄລຍະຢ່າງມີປະສິດທິພາບ ແລະ ປະສິດທິຜົນເພື່ອປ້ອງກັນການລະບາດຂອງພະຍາດໂຄວິດ-19 ແລະ ຈໍາກັດຄວາມສ່ຽງສູງ ຕໍ່ການເພີ່ມຂຶ້ນຂອງກໍລະນີຜູ້ຈະຕິດເຊື້ອໃໝ່, ມີການປະສານງານ ແລະ ການສື່ສານໄປຍັງປະຊາຊົນໃນຂອບເຂດທົ່ວປະ ເທດ ເພື່ອເຜີຍແຜ່ ແລະ ໂຄສະນາໃຫ້ປະຊາຊົນເຂົ້າໃຈແຈ້ງເຖິງໄພອັນຕະລາຍ ແລະ ຄວາມຈໍາເປັນໃນການອອກຄໍາສັ່ງ ກໍ່ຄື ແຈ້ງການເຕືອນຕ່າງໆ ຂອງຄະນະຮັບຜິດຊອບທີ່ສົ່ງຜົນກະທົບຕໍ່ການຈັດຕັ້ງພິທີການ, ການສະເຫລີມສະຫລອງຕ່າງໆ ຕະຫລອດຮອດການຈັດກິດຈະກຳອື່ນໆ ຕາມຮີດຄອງປະເພນີຂອງຊາດໃນຂອບເຂດທົ່ວປະເທດ.

ພ້ອມທັງຮຽກຮ້ອງໃຫ້ປະຊາຊົນໃນສັງຄົມ ໃຫ້ການປະກອບສ່ວນອັນສຳຄັນ ປະຕິບັດທຸກໆຄຳສັ່ງ-ຄໍາແນະນໍາຂອງລັດຖະບານ ທີ່ໄດ້ວາງອອກຢ່າງມີຄວາມຮັບຜິດຊອບ. ລິເລີ່ມຂອບການຮ່ວມມືແບບໃໝ່ ຂອງຂົງເຂດວຽກງານສົ່ງເສີມວັດທະນະທຳ ແລະ ສິລະປະຂອງອາຊຽນ ໃຫ້ຫລາຍຂຶ້ນ, ໂດຍສະເພາະການສົ່ງເສີມກິດຈະກຳຮ່ວມມືທາງໄກ (ກິດຈະກໍາອອນລາຍ) ເວົ້າສະເພາະ ຢູ່ໃນອາຊຽນ ກໍ່ຄື ບັນດາປະເທດຄູ່ຮ່ວມເຈລະຈາຂອງອາຊຽນ. ອາຊຽນ ຈຳເປັນຕ້ອງຮ່ວມມືກັນສືບຕໍ່ຊຸກຍູ້ການແລກປ່ຽນບົດຮຽນປະສົບການທີ່ດີ ແລະ ຂໍ້ມູນຂ່າວສານຢ່າງເປີດກວ້າງ, ເປີດເຜີຍ, ໂປ່ງໃສ ແລະ ທັງທ່ວງທັນຕໍ່ກັບສະພາບການ. ທັງນີ້, ກໍ່ເພື່ອສືບຕໍ່ສຶກສາ ແລະ ແນະນໍາໃຫ້ປະຊາຊົນຮັບຮູ້ເຂົ້າໃຈ ເຖິງການດໍາລົງຊີວິດ ແລະ ປັບຕົວໃຫ້ສອດຄ່ອງກັບເງື່ອນໄຂ “ວິຖີການດໍາລົງຊີວິດແບບໃໝ່” ດ້ວຍຄວາມເອົາໃຈໃສ່.


ທ່ານ ລັດຖະມົນຕີ ກະຊວງ ຖວທ ແຫ່ງ ສປປ ລາວ ຍັງໄດ້ຢໍ້າເຖິງຕໍ່ກັບແຜນການຟື້ນຟູຫລັງການແພ່ລະບາດໃນຕໍ່ໜ້າ ເພື່ອຫລຸດຜ່ອນຜົນກະທົບຈາກໂຄວິດ-19 ທີ່ສົ່ງຜົນຕໍ່ການດໍາລົງຊີວິດປົກກະຕິຂອງປະຊາຊົນ ແລະ ເສດຖະກິດຂອງຊາດ. ດັ່ງນັ້ນ, ຈຶ່ງຄວນເອົາໃຈໃສ່ສົ່ງເສີມການທ່ອງທ່ຽວທາງວັດທະນະທຳ ຢູ່ພາຍໃນປະເທດ ລວມທັງຊຸກຍູ້ໃຫ້ປະຊາຊົນຂອງພວກເຮົາ ທ່ອງທ່ຽວພາຍໃນປະເທດໃຫ້ຫລາຍຂຶ້ນ.
ຂ່າວ: ມະນີທອນ,ພາບ: ເກດສະໜາ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ