ໂກແມນ ແຊັກ ຍອມຈ່າຍ 2 ພັນລ້ານໂດລາ ຢຸດຕິຄະດີ 1 MDB - Laoedaily

ໂກແມນ ແຊັກ ຍອມຈ່າຍ 2 ພັນລ້ານໂດລາ ຢຸດຕິຄະດີ 1 MDB

ສຳນັກຂ່າວບລູມເບີກ ລາຍງານວ່າ: ທະນາຄານໂກແມນ ແຊັກ ( Goldman Sachs ) ໄດ້ບັນລຸຂໍ້ຕົກລົງຮ່ວມກັບກະຊວງຍຸຕິທຳສະຫະລັດອາເມຣິກາ ໃນການຈ່າຍເງິນ 2 ພັນລ້ານໂດລາສະຫະລັດ ເພື່ອຢຸດຕິຄະດີ ກອງທຶນເພື່ອການພັດທະນາມາເລເຊຍ ( 1 MDB ) ທີ່ເປັນຄະດີໂດ່ງດັງຂອງລັດຖະບານມາເລເຊຍ ໃນຍຸກ ທ່ານ ນາຈິບ ຣາຊັກ ເປັນນາຍົກລັດຖະມົນຕີ.

ລາຍງານລະບຸວ່າ: ຂໍ້ຕົກລົງດັ່ງກ່າວຈະເຮັດໃຫ້ໂກແມນ ແຊັກ ບໍ່ຖືກດຳເນີນຄະດີອາຍາໃນສະຫະລັດອາເມຣິກາ, ສ່ວນເງິນຈຳນວນ 2 ພັນລ້ານໂດລາທີ່ໃຊ້ເຂົ້າໃນການຢຸດຕິຄະດີນັ້ນມີຄວາມສອດຄ່ອງກັບສະຖານະທຶນສຳຮອງຂອງໂກແມນ ແຊັກ ແລະ ເປັນໄປຕາມທີ່ນັກວິເຄາະຄາດການໄວ້.
ທັງນີ້, ຂໍ້ຕົກລົງດັ່ງກ່າວຄາດວ່າຈະໄດ້ຂໍ້ສະຫຼຸບກ່ອນການເລືອກຕັ້ງປະທານາທິບໍດີສະຫະລັດ ເຊິ່ງຈະຊ່ວຍກຳຈັດ ຄວາມບໍ່ແນ່ນອນຂອງ ໂກແມນ ແຊັກ ເນື່ອງຈາກທະນາຄານຍັກໃຫຍ່ແຫ່ງນີ້ໄດ້ເຈລະຈາກັບກະຊວງຍຸຕິທຳຂອງສະຫະລັດມາເປັນເວລາຫຼາຍປີ ກ່ຽວກັບຂໍ້ກ່າວຫາທີ່ວ່າ ໂກແມນ ແຊັກ ໄດ້ໃຫ້ການຊ່ວຍເຫຼືອເຈົ້າໜ້າທີ່ຂອງມາເລເຊຍ ໃນການສໍ້ໂກງເງິນໃນໂຄງການກອງທຶນ ເພື່ອການພັດທະນາມາເລເຊຍ ໃນວົງເງິນ 6.500 ລ້ານໂດລາສະຫະລັດ.
ລັດຖະບານມາເລເຊຍ ພາຍໃຕ້ການນຳຂອງ ທ່ານ ນາຈິບ ຣາຊັກ ນາຍົກລັດຖະມົນ ຕີມາເລເຊຍໃນເວລານັ້ນ ໄດ້ສ້າງຕັ້ງກອງທຶນ 1 MDB ຂຶ້ນໃນປີ 2009 ໃນວົງເງິນ 6.500 ລ້ານໂດລາສະຫະລັດ ໂດຍມີຈຸດປະສົງເພື່ອນຳເງິນດັ່ງກ່າວໄປກໍ່ສ້າງພື້ນຖານໂຄງລ່າງຂອງມາເລເຊຍ ແຕ່ສຸດທ້າຍກອງທຶນດັ່ງກ່າວລົ້ມລະລາຍ ພ້ອມໄດ້ເປີດເຜີຍຂໍ້ມູນວ່າມີການສໍ້ໂກງດ້ວຍການໂອນເງິນຈາກກອງທຶນດັ່ງກ່າວເຂົ້າບັນຊີທະນາຄານສ່ວນບຸກຄົນ ເຊິ່ງເປັນເຈົ້າໜ້າທີ່ກ່ຽວຂ້ອງຂອງກອງທຶນດັ່ງກ່າວ ລວມເຖິງບັນຊີຂອງ ທ່ານ ນາຈິບ ຣາຊັກ ຈົນຖືກດຳເນີນຄະດີຂໍ້ຫາການສໍ້ໂກງຫຼາຍລາຍການ.
ກະຊວງຍຸຕິທຳຂອງສະຫະລັດ ຄາດການວ່າ: ເຈົ້າໜ້າທີ່ຂອງມາເລເຊຍໄດ້ຍັກຍອກເງິນປະມານ 4.500 ລ້ານໂດລາ ອອກຈາກກອງທຶນ 1 MDB ໃນລະຫວ່າງປີ 2009 – 2014 ຂະນະທີ່ ໂກແມນ ແຊັກ ຖືກກ່າວຫາວ່າໄດ້ໃຫ້ການຊ່ວຍເຫຼືອເຈົ້າໜ້າທີ່ຂອງມາເລເຊຍ ໃນການຍັກຍອກເງິນຈາກກອງທຶນດັ່ງກ່າວ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ