ເຂດເສດຖະກິດພິເສດເສິນເຈິ້ນ ແບບຢ່າງຄວາມສຳເລັດຂອງການປະຕິຮູບ - Laoedaily

ເຂດເສດຖະກິດພິເສດເສິນເຈິ້ນ ແບບຢ່າງຄວາມສຳເລັດຂອງການປະຕິຮູບ

ສຳນັກຂ່າວຕ່າງປະເທດລາຍງານວ່າ: ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ ໄດ້ກ່າວສູນທອນພົດໃນພິທີສະເຫຼີມສະຫຼອງການສ້າງຕັ້ງເຂດເສດຖະກິດພິເສດ “ ເສິນເຈິ້ນ ” ຄົບຮອບ 40 ປີ ວ່າ: ການສ້າງຕັ້ງເຂດເສດຖະກິດພິເສດເສິນເຈິ້ນ ເປັນການເລີ່ມຕົ້ນທີ່ຍິ່ງໃຫຍ່ໃນການປະຕິຮູບ ແລະ ການເປີດກວ້າງເສດຖະກິດຕາມທິດສັງຄົມນິຍົມທີ່ເປັນສີສັນພິເສດຂອງຈີນ.

ທ່ານ ສີ ຈິ້ນຜິງ ກ່າວວ່າ: ເສດຖະກິດ – ສັງຄົມຂອງເມືອງເສິນເຈິ້ນ ມີການຂະຫຍາຍຕົວຢ່າງກ້າວກະໂດດ ນັບແຕ່ສ້າງຕັ້ງເຂດເສດຖະກິດພິເສດແຫ່ງນີ້ຕະຫຼອດ 40 ປີຜ່ານມາ ເມື່ອພິຈາລະນາແລ້ວການປ່ຽນແປງດັ່ງກ່າວ ມີ 5 ປະການຫຼັກໆ ປະກອບດ້ວຍຈາກເປັນເມືອງນ້ອຍໆທີ່ໃກ້ຊາຍແດນກາຍເປັນນະຄອນທີ່ກວ້າງໃຫຍ່ລະດັບໂລກ ແລະ ມີອິດທິພົນຕໍ່ໂລກ, ຈາກການປະຕິຮູບເສດຖະກິດກ້າວສູ່ການປະຕິຮູບໃນທຸກໆດ້ານ, ຈາກເດີມມຸ່ງພັດທະນາການຄ້າກັບຕ່າງປະເທດກ້າວກະໂດດສູ່ການເປີດກວ້າງໃນລະດັບສູງທຸກດ້ານ, ຈາກຄວາມກ້າວໜ້າໃນການພັດທະນາເສດຖະກິດກ້າວສູ່ສັງຄົມນິຍົມຢ່າງເປັນຮູບປະທຳ ທັງດ້ານການເມືອງ – ວັດທະນະທຳ ແລະ ຈາກການສ້າງຄວາມເຊື່ອໝັ້ນວ່າຄວາມຕ້ອງການພື້ນຖານຂອງປະຊາຊົນຈະໄດ້ຮັບການຕອບສະໜອງກ້າວກະໂດດສູ່ການສ້າງສັງຄົມໃຫ້ຈະເລີນຮຸ່ງເຮືອງໃນທຸກດ້ານ.

ປະທານປະເທດຈີນ ຍັງໄດ້ຮຽກຮ້ອງໃຫ້ການນຳເມືອງເສິນເຈິ້ນ ຈົ່ງສ້າງເມືອງແຫ່ງນີ້ໃຫ້ກາຍເປັນຜູ້ນຳດ້ານນະວັດຕະກຳເຕັກໂນໂລຊີ ແລະ ອຸດສາຫະກຳລະດັບໂລກ, ພ້ອມທັງເດີນໜ້າພັດທະນາໃຫ້ມີຄຸນນະພາບສູງຂຶ້ນກວ່າເກົ່າ, ມີປະສິດທິພາບສູງຂຶ້ນ, ມີຄວາມເປັນທຳໃນສັງຄົມ, ມີຄວາມໝັ້ນຄົງ ແລະ ຍືນຍົງ.

ທ່ານ ສີ ຈິ້ນຜິງ ຍັງຮຽກຮ້ອງໃຫ້ເມືອງເສິນເຈິ້ນ ຈົ່ງພະຍາຍາມແກ້ໄຂບັນຫາຕ່າງໆ ເຊັ່ນ: ການຈ້າງງານ, ການສຶກສາ, ສາທາລະນະສຸກ, ລະບົບປະກັນສັງຄົມ, ທີ່ຢູ່ອາໄສ, ເບິ່ງແຍງຜູ້ສູງອາຍຸ, ຄວາມປອດໄພທາງອາຫານ, ລະບົບນິເວດ, ສິ່ງແວດລ້ອມ ແລະ ຄວາມປອດໄພສາທາລະນະ ພ້ອມທັງຮຽກຮ້ອງໃຫ້ເສິນເຈິ້ນ ເດີນໜ້າສ້າງເຂດອ່າວກວາງຕຸ້ງ – ຮົງກົງ – ມາເກົ໊າ ບວກກັບກົດລະບຽບ ແລະ ກົນໄກທາງເສດຖະກິດຂອງ 3 ຂົງເຂດນີ້ເຂົ້າກັນ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ