ຄວາມຮູ້ກະສິກໍາໃນມື້ນີ້ ຜູ້ຂຽນຂໍພາທ່ານຜູ້ອ່ານປ່ຽນເລື່ອງຈາກການປູກຝັງ ມາເຂົ້າສູ່ການລ້ຽງສັດລອງເບິ່ງ ໂດຍມື້ນີ້ຜູ້ຂຽນຈະສະເໜີໃຫ້ຮູ້ກ່ຽວກັບເຕັກນິກການລ້ຽງໄກ່ລາດ ເຊິ່ງແນ່ນອນວ່າຢູ່ໃນປະເທດເຮົາ ໂດຍສະເພາະໃນເຂດຊຸມຊົນທີ່ຢູ່ເຂດນອກເມືອງ ຫຼື ໃຊ້ຊີວິດໃກ້ຊິດຕິດແທດກັບທໍາມະຊາດ ຈະຕ້ອງມີການລ້ຽງສັດປີກຊະນິດນີ້ຢູ່ແລ້ວ ແຕ່ກໍຍັງເປັນການລ້ຽງແບບປະຖົມປະຖານ ຫຼື ລ້ຽງຕາມທໍາມະຊາດ.
ດັ່ງນັ້ນ, ຄວາມຮູ້ກະສິກໍາມື້ນີ້ຜູ້ຂຽນໄດ້ຮຽບຮຽງເອົາວິທີການລ້ຽງແບບມີເຕັກນິກວິຊາການເຂົ້າມາຊ່ວຍ ເພື່ອເຮັດໃຫ້ການລ້ຽງໄກ່ຂອງເຮົາມີປະສິດທິພາບຂຶ້ນ ໂດຍຫຼັກການສໍາຄັນຂອງການລ້ຽງໄກ່ລາດໃຫ້ໄດ້ຮັບຜົນດີ ແມ່ນຕ້ອງມີການຢອດຢາ ແລະ ສັກຢາປ້ອງກັນພະຍາດເປັນຕົ້ນ ອະຫິ ວາ ແລະ ພະຍາດອື່ນໆ.
ສິ່ງທີ່ຕ້ອງກະກຽມໃນການລ້ຽງໄກ່ລາດ ມີຄື:
- ແນວພັນພື້ນບ້ານ ( ໄກ່ລາດ )
-
ຮາງອາຫານ
-
ຮາງນໍ້າ ຫຼື ຕຸກໃສ່ນໍ້າ
-
ສຸ່ມໄກ່
-
ຮໍາ; ເຂົ້າເປືອກ, ເຂົ້າປຽນ ແລະ ສິ່ງເສດເຫຼືອຈາກອາຫານອື່ນໆ.
ວິທີການລ້ຽງ: ມີດ້ວຍກັນຫຼາຍວິທີ ແລ້ວແຕ່ຄວາມເໝາະສົມ ແລະ ຈຸດປະສົງຂອງຜູ້ທີ່ຈະລ້ຽງ ເຊັ່ນ:
- ການເລືອກພັນໄກ່ທີ່ ໃຫຍ່ແລ້ວມາລ້ຽງຕໍ່, ໃນນັ້ນພັນໄກ່ລາດທີ່ນໍາມາລ້ຽງຄວນເລືອກແນວພັນທີ່ມີພູມຕ້ານທານສູງ, ແຂງແຮງ, ໂຕໃຫຍ່, ຊີ້ນຫຼາຍ, ລ້ຽງລູກດີ ແລະ ໃຫ້ໄຂ່ຫຼາຍ ເຊິ່ງສິ່ງເຫຼົ່ານີ້ກໍຕ້ອງອາໄສຜູ້ຮູ້ ແລະ ຜູ້ມີປະສົບການໃນການເລືອກເຂົ້າມາຊ່ວຍ
-
ຊື້ລູກໄກ່ອາຍຸ 1ມື້ມາລ້ຽງ
-
ຟັກລູກໄກ່ເອົາເອງ
-
ຊື້ໄກ່ລຸ້ນອາຍຸ 2 – 3 ເດືອນມາລ້ຽງ
-
ຊື້ໄກ່ບ່າວສາວມາລ້ຽງ
ວິທີການໃຫ້ອາຫານ:
- ການໃຫ້ອາຫານໄກ່ແມ່ນຕ້ອງໃຫ້ມື້ລະ 2 ຄັ້ງ ເຊົ້າ – ແລງ ໂດຍນໍາເອົາຮໍາ ຫຼື ເຂົ້າປຽນມາໃສ່ຮາງອາຫານ ແລະ ແຍກເອົານໍ້າໃສ່ອີກຮາງທີ່ກຽມໄວ້ ເຊິ່ງນໍ້າຄວນປ່ຽນຖ່າຍທຸກໆມື້ ແລະ ອະນາໄມຄອກ ຫຼື ລົກໄກ່ໃຫ້ສະອາດຢູ່ສະເໝີ ເພື່ອບໍ່ໃຫ້ໄກ່ຕິດເຊື້ອພະຍາດໄດ້ງ່າຍ.
ຄອກໄກ່ ແລະ ວິທີການບົວລະບັດຮັກສາຄອກໄກ່:
ການເຮັດຄອກໄກ່ ຫຼື ລົກໄກ່ ຕ້ອງເປັນສະຖານທີ່ທີ່ເໝາະສົມກັບຈໍານວນໄກ່ທີ່ຕົນເອງລ້ຽງ ຕ້ອງມີລົມລ່ວງ, ມີຄອນສໍາລັບໃຫ້ໄກ່ນອນ ແລະ ມີບ່ອນສໍາລັບເຮັດຮັງໃຫ້ໄກ່ໄຂ່ໃສ່; ສ່ວນການບົວລະບັດຮັກສາ ຄວາມສະອາດຄອກໄກ່ເປັນປະຈໍາ ຢ່າງໜ້ອຍ 1 – 2 ເທື່ອຕໍ່ອາທິດ.
ຂອບໃຈຮູບ: Bank Sathitphong Douangchak
ທີ່ມາ: ລາວ 44 ຂໍ້ມູນຂ່າວສານເພື່ອການພັດທະນາ