ວາງສີລາລືກສ້າງສວນວິທະຍາສາດ ແລະ ພຶກສາສາດ ຄາດເປີດບໍລິການຕົ້ນປີໜ້າ - Laoedaily

ວາງສີລາລືກສ້າງສວນວິທະຍາສາດ ແລະ ພຶກສາສາດ ຄາດເປີດບໍລິການຕົ້ນປີໜ້າ

ພິທີວາງສີລາລືກການສ້າງສວນວິທະຍາສາດ ແລະ ພຶກສາສາດ ເຊິ່ງເປັນການຮ່ວມມືລະ ຫວ່າງ ກະຊວງວິທະຍາສາດ ແລະ ເຕັກໂນໂລຊີ ແລະ ບໍລິສັດ ແອັດແລນຕິກ ອິນເຕີເນເຊິນແນວ ຈໍາກັດ ຜູ້ດຽວ ທີ່ບ້ານຫ້ວຍໂຄ້ງ ເມືອງແກ້ວອຸດົມ ແຂວງວຽງຈັນ ມີຂຶ້ນໃນວັນທີ 9 ຕຸລາຜ່ານມາ ໂດຍໃຫ້ກຽດເຂົ້າຮ່ວມຂອງ ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ຄໍາພັນ ສິດທິດຳພາ ເຈົ້າແຂວງວຽງຈັນ, ທ່ານ ພູວົງ ສຸ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊິນແນວ ຈໍາກັດ ພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ແກ້ວໄພວັນ ດວງສະຫວັນ ຫົວໜ້າຫ້ອງການວິທະຍາສາດແຫ່ງຊາດ, ກະຊວງວິທະຍາສາດ ແລະ ເຕັກໂນໂລຊີ ໄດ້ລາຍງານກ່ຽວກັບສະພາບຄວາມເປັນມາຈຸດປະສົງ ແລະ ເປົ້າໝາຍຂອງໂຄງການກໍ່ສ້າງສວນວິທະຍາສາດ ແລະ ພຶກສາສາດ ວ່າ: ໄລຍະຜ່ານມາ, ກະຊວງວິທະຍາສາດ ແລະ ເຕັກໂນໂລຊີ ໄດ້ຮ່ວມກັບ ບໍລິສັດ ແອັດແລນຕິກ ອິນເຕີເນເຊິນແນວ ຈໍາກັດ ຜູ້ດຽວ ໄດ້ເຊັນບົດບັນທຶກການກໍ່ສ້າງສວນດັ່ງກ່າວ ໃນເດືອນຕຸລາ 2019 ແລະ ຕໍ່ມາວັນທີ 7 ສິງຫາ 2020 ໄດ້ເຊັນສັນຍາຜັນຂະຫຍາຍໜ້າວຽກລະອຽດ ແລະ ເລີ່ມລົງມືຈັດຕັ້ງປະຕິບັດຕາມໜ້າວຽກ.

ການສ້າງສວນວິທະຍາສາດ ແລະ ພຶກສາສາດໃນເນື້ອທີ່ທັງໝົດ 30 ເຮັກຕາ ໄລຍະການພັດທະນາ 3 ປີ ປະກອບມີສູນສຶກສາຂະໜາດໃຫຍ່ດ້ານດາລາສາດ ( ຫໍຊົມດາວ, ທ້ອງຟ້າຈໍາລອງ ), ສວນພຶກສາ ແລະ ສູນສຶກສາດ້ານພຶກສາສາດ ( ຕົ້ນໄມ້, ພັນພືດ, ພືດເປັນຢາທີ່ປະກອບພັນພືດໃນ ສປປ ລາວ ຈາກພາກພື້ນ ແລະ ສາກົນ ), ສູນສຶກສາຮຽນ  ຮູ້ – ຖ່າຍທອດດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ, ແຫຼ່ງທ່ອງທ່ຽວທໍາມະຊາດຕິດພັນກັບວັດທະນະທໍາ ແລະ ກິດຈະກຳອື່ນໆ ອັນຈະເປັນຜົນປະໂຫຍດທາງດ້ານການສຶກສາ – ຮຽນຮູ້ດ້ານວິທະຍາສາດ ແລະ ການປະກອບສ່ວນໃຫ້ການພັດທະນາເສດຖະກິດ – ສັງຄົມ.

ທ່ານ ພູວົງ ສຸ້ຍຍະວົງ ໄດ້ລາຍງານໃຫ້ຮູ້ຕື່ມອີກວ່າ: ປັດຈຸບັນສວນວິທະຍາສາດ ແລະ ພຶກສາສາດ ໄດ້ເລີ່ມພັດທະນາມາແລ້ວ 6 ເດືອນ ໂດຍໄດ້ສ້າງພື້ນຖານໂຄງລ່າງຖະໜົນຫົນທາງ ແລະ ສ້າງສິ່ງອໍານວຍຄວາມສະດວກໄດ້ສ່ວນໃດສ່ວນໜຶ່ງສໍາເລັດປະມານ 30%. ນອກນີ້, ຍັງຈະໄດ້ດໍາເນີນການກໍ່ສ້າງສູນຫໍຊົມດາວ – ທ້ອງຟ້າຈໍາລອງເປັນໄລຍະທີ 1 ເຊິ່ງໄດ້ວາງສີລາລືກໃນມື້ນີ້ຄາດວ່າຈະໃຫ້ສໍາເລັດ ພ້ອມເປີດນໍາໃຊ້ທົດລອງໃນເດືອນເມສາ 2021; ໄລຍະທີ 2 ສືບຕໍ່ກໍ່ສ້າງຫ້ອງປະຊຸມ, ທີ່ພັກສໍາລັບສໍາມະນາກອນທີ່ເຂົ້າມາປະຊຸມ ແລະ ໄລຍະທີ 3 ຈະປູກຕົ້ນໄມ້ປະດັບປະດາພັດທະນາສວນໄປເລື້ອຍໆ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ