ຮອງເຈົ້າແຂວງສະຫວັນນະເຂດ ລົງມອບເຄື່ອງບໍລິໂພກ ໃຫ້ປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມຢູ່ເມືອງເຊໂປນ - Laoedaily

ຮອງເຈົ້າແຂວງສະຫວັນນະເຂດ ລົງມອບເຄື່ອງບໍລິໂພກ ໃຫ້ປະຊາຊົນທີ່ໄດ້ຮັບຜົນກະທົບຈາກນ້ຳຖ້ວມຢູ່ເມືອງເຊໂປນ

ດ້ວຍຄວາມເປັນຫ່ວງເປັນໃຍ ຕໍ່ສະພາບການດຳລົງຊີວິດຂອງປະຊາຊົນບັນດາເຜົ່າ ທີ່ໄດ້ຮັບຜົນກະທົບຈາກອຸທົກກະໄພຢູ່ເຂດເມືອງເຊໂປນ ;ດັ່ງນັ້ນໃນຕອນບ່າຍວັນທີ 9 ຕຸລາ 2020 , ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ພ້ອມຫົວໜ້າ-ຮອງຫົວໜ້າພະແນກການອ້ອມຂ້າງແຂວງຈຶ່ງໄດ້ລົງຢ້ຽມຢາມ ແລະມອບເຄື່ອງຊ່ວຍເຫຼືອໃຫ້ກັບອຳນາດການປົກຄອງ ແລະ ປະຊາຊົນຜູ້ທີ່ໄດ້ຮັບຜັນກະທົບຈາກນໍ້າຖ້ວມໃນຄັ້ງ.


ໃນນາມຄະນະກໍາມະການຕ້ານໄພພິບັດຂັ້ນແຂວງ ທ່ານຮອງເຈົ້າແຂວງສະຫວັນະເຂດ ກໍ່ໄດ້ນຳເອົາເຂົ້າສານຈຳນວນ 3 ໂຕນ, ໝີ່ 20 ແກັດ ແລະ ປາກະປ໋ອງ 20 ແກັດ ມູນຄ່າ 40 ລ້ານກີບ ໄປມອບໃຫ້ອຳນາດການປົກຄອງເມືອງເຊໂປນ ເພື່ອນຳໄປແຈກຢາຍແກ້ໄຂສຸກເສີນ ໃຫ້ປະຊາຊົນຕາມບ້ານຕ່າງໆ ທີ່ໄດ້ຮັບຜົນກະທົບຈາກອຸທົກກະໄພນ້ຳຖ້ວມໃນຄັ້ງນີ້, ໂດຍທ່ານ ວົງສະຫວັນ ວຽງມະນີ ເຈົ້າເມືອງເຊໂປນພ້ອມຄະນະ ເປັນຜູ້ຮັບ; ໃນນັ້ນກໍມີຫົວໜ້າພະແນກອຸດສະຫະກຳ ແລະ ການຄ້າ ມອບໝີ່ 24ແກັດ, ປາກະປ໋ອງ 2ແກັດໃຫຍ່, ເສື້ອກັນຝົນ 30 ຜືນ ລວມມູນຄ່າ 2 ລ້ານ6ແສນກ່ວາກີບ; ພະແນກພະລັງງານ ແລະ ບໍ່ແຮ່ ມອບໝີ່ ແລະ ນ້ຳດື່ມ ມູນຄ່າ 2 ລ້ານກີບ; ພະແນກກະສິກຳ ແລະ ປ່າໄມ້ ມອບເງິນ 1 ລ້ານກີບ, ພະແນກໂຍທາທິການ ແລະ ຂົນສົ່ງ ມອບໝີ່ 5 ແກັດ ມູນຄ່າ 1ລ້ານ 6ແສນກີບ ແລະ ດ່ານສາກົນແດນສະຫວັນ ມອບນ້ຳດື່ມ 105ແຟັກ ແລະ ໝີ່ 50ແກັດ ມູນຄ່າເກືອບ 7 ລ້ານກີບ.


ການໄປຢ້ຽມຢາມເບິ່ງສະພາບຜົນກະທົບໃນຄັ້ງນີ້ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນະເຂດ ພ້ອມຄະນະ ໄດ້ໄປເບິ່ງສະພາບນ້ຳທີ່ໄຫຼເຂົ້າຖ້ວມບ້ານເຮືອນຂອງປະຊາຊົນ ໂດຍສະເພາະແມ່ນຕາມລຳນ້ຳເຊໂປນ ແລະ ນ້ຳເຊບັ້ງຫຽງ, ໃນນັ້ນກໍໄດ້ໄປຢ້ຽມຢາມປະຊາຊົນບ້ານດົງສະຫວັນ, ບ້ານຫ້ວຍສານ ແລະບ້ານທີ່ຢູ່ໃນເທດສະບານເມືອງເຊໂປນ.


ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ໄດ້ໃຫ້ຮູ້ວ່າ: ນ້ຳໄດ້ໄຫຼເຂົ້າຖ້ວມເນື້ອທີ່ນາ ແລະ ບ້ານຂອງປະຊາຊົນຕາມແຄມນ້ຳເຊໂປນ ແລະ ນ້ຳເຊບັ້ງຫຽງ ແຕ່ວັນທີ 7 ຕຸລາ ໃນນັ້ນສ່ວນຫຼາຍແມ່ນເຂດບ້ານເຊໂປນເກົ່າ, ກະຕູບ, ຫ້ວຍສານ, ບ້ານເຟືອງ, ໂພນມ່ວງ ແລະ ບ້ານອື່ນໆ, ເຊິ່ງມາຮອດປະຈຸບັນນ້ຳກໍ່ໄດ້ບົກລົງແລ້ວ, ໃນນັ້ນແມ່ນໄດ້ຖ້ວມບ້ານຂອງປະຊາຊົນຈໍານວນ 25 ບ້ານ ມີ 1.274 ຫຼັງຄາ 1.172 ຄອບຄົວ ພົນລະເມືອງ 9.600 ກ່ວາຄົນ; ມີປະຊາຊົນ ຍ້າຍອອກຈາກບ້ານຈໍານວນ 7 ບ້ານ ມີ 574 ຄອບຄົວ ພົນລະເມືອງ 6.670 ຄົນ ເຮືອນຫັກເປ່ເພ 32 ຫຼັງ ຖ້ວມວັດ 4 ແຫ່ງ. ຖ້ວມເນື້ອທີ່ນາຂອງປະຊາຊົນກວມເອົາ 28 ບ້ານ ມີເນື້ອທີ່ນາ 1.505 ເຮັກຕາ ສວນປູກເຂົ້າ709 ເຮັກຕາ, ຖ້ວມສວນໄມ້ອຸດສະຫະກຳ 695 ເຮັກຕາ, ພືດຕ່າງໆ 10 ເຮັກຕາ, ໜອງປາ 294 ໜອງ, ລະບົບຊົນລະປະທານຖືກຖ້ວມ 4 ແຫ່ງ ປະຕູນ້ຳ 2 ແຫ່ງ, ສຸກສາລາ 4 ແຫ່ງ. ນອກນັ້ນກໍມິສວນກ້ວຍ ສວນມັນຕົ້ນຂອງປະຊາຊົນລຽບຕາມແຄມນ້ຳອີກ, ໃນນີ້ໄດ້ງົດໃຊ້ໄຟຟ້າ 22 ບ້ານ ແລະ ທາງຖືກຖ້ວມມີ 33 ຈຸດ ຕາມເສັ້ນທາງຕ່າງໆ. ສ່ວນຜົນເສຍຫາຍແມ່ນຈະມີການປະເມີນ ແລະ ແຈ້ງໃຫ້ຮູ້ຕາມພາຍຫຼັງ.


ຈາກນັ້ນທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນະເຂດ ກໍໄດ້ກ່າວຊົມເຊີຍຕໍ່ຄະນະພັກ-ອຳນາດການປົກຄອງຂັ້ນຕ່າງໆຂອງເມືອງ ທີ່ມີການກະກຽມຄວາມພ້ອມ ແລະວາງແຜນຮັບມືເພື່ອແກ້ໄຂຕໍ່ສະພາບການນ້ຳຖ້ວມໄດ້ດີ ພ້ອມນີ້ ທ່ານກໍ່ຍັງໄດ້ສອບຖາມເຖິງສະພາບການດຳລົງຊີວິດຂອງປະຊາຊົນທີ່ຍົກຍ້າຍອອກຈາກບ້ານເຮືອນ ວ່າມີຂໍ້ສະດວກ, ຂໍ້ຫຍຸ້ງຍາກຄືແນວໃດ? ຈາກນີ້ທ່ານຮອງເຈົ້າແຂວງ ກໍໄດ້ເນັ້ນໃຫ້ເມືອງສືບຕໍ່ຕິດຕາມ ແລະຊີ້ນຳຢ່າງໃກ້ຊິດຕິດແທດຕໍ່ຈຸດສ່ຽງຕ່າງໆ ທັງນີ້ກໍ່ເພື່ອຄວາມປອດໄພທັງຊີວິດ ແລະຊັບສິນຂອງປະຊາຊົນ ແລະເກັບກຳສະພາບຜົນເສຍຫາຍເພື່ອນຳສະເໜີຕໍ່ຄະນະກຳມະການຕ້ານໄພພິບັດຂັ້ນແຂວງໃຫ້ໄວ.


ໃນເວລາຕໍ່ມາ ທ່ານຮອງເຈົ້າແຂວງສະຫວັນະເຂດ ພ້ອມຄະນະ ກໍໄດ້ນໍາເອົາເຄື່ອງໄປມອບໃຫ້ອຳນາດການປົກຄອງເມືອງນອງ ເຊິ່ງເສັ້ນທາງເຂົ້າຫາເມືອງນອງກໍບໍ່ສາມາດເຂົ້າໄປໄດ້ ເນື່ອງຈາກວ່າ ສະພາບນ້ຳເຊໂປນ ໄດ້ຖ້ວມທາງເຂດບ້ານດົງສະຫວັນ ດັ່ງນັ້ນທາງອຳນາດການປົກຄອງເມືອງນອງຈຶ່ງໄດ້ມາຮັບເອົາຢູ່ເຂດດັ່ງກ່າວ ເຊິ່ງເຄື່ອງທີ່ນຳມາມອບມີຄະນະກຳມະການຕ້ານໄພພິບັດຂັ້ນແຂວງ ມອບໝີ່ 1ແກັດ ປາກະປ໋ອງ 10 ແກັດ ເຕັນ 10ດາງ ເຮືອລົມ 1 ລຳລວມມູນຄ່າ 23 ລ້ານກ່ວາກີບ, ຫົວໜ້າພະແນກອຸດສະຫະກຳ ແລະ ການຄ້າ ມອບໝີ່ 24ແກັດ, ປາກະປັອງ 2ແກັດໃຫຍ່, ເສື້ອກັນຝົນ 30 ຜືນ ລວມມູນຄ່າ 2 ລ້ານ6ແສນກ່ວາກີບ, ພະແນກກະສິກຳ ແລະ ປ່າໄມ້ ມອບເງິນ 1 ລ້ານກີບ ໂດຍທ່ານ ລຳແກ້ວ ແສງໜູທອງ ເຈົ້າເມືອງໆນອງ ພ້ອມຄະນະເປັນຜູ້ຮັບ.

ເມືອງນອງໄດ້ຮັບຜົນກະທົບສ່ວນຫຼາຍແມ່ນເຂດລຳນ້ຳເຊໂປນ ເຂດຈຸດສຸມແດນວິໄລ, ປະເລາະ-ອາສິງ ເຊິ່ງຝົນເລີ່ມຕົກແຕ່ວັນທີ6 ຕຸລາ 2020,ເຮັດໃຫ້ເສັ້ນທາງລະຫວ່າງເມືອງກັບເມືອງແລະບ້ານຕໍ່ບ້ານຖືກຕັດຂາດ,ຈຸດຫົວຂົວຖືກນ້ຳເຊາະເຈື່ອນເຊິ່ງພົບຄວາມຫຍຸ້ງຍາກໃນການສັນຈອນໄປມາເປັນຕົ້ນເສັ້ນທາງແຕ່ບ້ານດົງສະຫວັນເມືອງເຊໂປນຫາເມືອງນອງການສັນຈອນຕ້ອງໄດ້ໃຊ້ເຮືອຫຼືບັກເທົ່ານັ້ນຂ້າມ, ສ່ວນເສັ້ນທາງລະຫວ່າງບ້ານຕໍ່ບ້ານຂອງເມືອງນອງຖຶກຕັດຂາດຫຼາຍບ່ອນເຊັ່ນ: ເຂດຈຸດສຸມແກ້ງລີ້ນມີເສັ້ນທາງແຕ່ບ້ານໄກສອນ-ຕັງອະຫາບ້ານແກ້ງລີ້ນ,ແຕ່ຈຸດສຸມແກ້ງລີ້ນຫາບ້ານປະຈະຕຽນຈຸດນ້ຳຖ້ວມຂັງແມ່ນຂົວຈົມເຊສະໝູນປະຊາຊົນຕ້ອງໄດ້ໃຊ້ເຮືອຂ້າມ,ເຂດຈຸດສຸມປະເລາະ-ອາສີງເສັ້ນທາງຖືກຕັດຂາດໃນບໍລິເວນທີ່ເປັນຫ້ວຍແຕ່ບ້ານອາສີງຫາບ້ານແສນ,ໃນນັ້ນມີເສົາໄຟຟ້າຫັກໂຄ້ນລົງມາ2ຫຼັກ. ສ່ວນຜົນເສຍຫາຍຍັງຢູ່ໃນຂັ້ນຕອນປະເມີນ.

ແຫຼ່ງທີ່ມາ:ວິທະຍຸກະຈາຍສຽງ ສະຫວັນນະເຂດ
(Savannakhet Radio)

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ