ຕັ້ງໜ່ວຍສະຫະພັນແມ່ຍິງຫ້ອງການຄະນະຄຸ້ມຄອງເຂດເສດຖະກິດພິເສດ ແຂວງຄຳມ່ວນ - Laoedaily

ຕັ້ງໜ່ວຍສະຫະພັນແມ່ຍິງຫ້ອງການຄະນະຄຸ້ມຄອງເຂດເສດຖະກິດພິເສດ ແຂວງຄຳມ່ວນ

ເຂດເສດຖະກິດພິເສດ ແຂວງ ຄຳມ່ວນ ໄດ້ຈັດພິທີປະກາດການຈັດຕັ້ງໜ່ວຍສະຫະພັນແມ່ຍິງຫ້ອງການຄະນະຄຸ້ມຄອງເຂດເສດຖະກິດພິເສດ ຂຶ້ນວັນທີ 5 ຕຸລາ 2020 ເປັນປະທານຂອງ ທ່ານ ດາວໄຫຼ ແກ້ວດວງດີ ຫົວໜ້າຄະນະຄຸ້ມຄອງເຂດເສດຖະກິດພິເສດ, ເຂົ້າຮ່ວມໂດຍ ທ່ານ ຈັນ ບຸບຜາລີວັນ ປະທານແນວລາວສ້າງຊາດແຂວງຄຳມ່ວນ.

ທ່ານ ນາງ ບຸນເລີດ ສູນທອນນະວົງ ຫົວໜ້າຂະແໜງຈັດຕັ້ງ – ກວດກາ ກໍໄດ້ຜ່ານຂໍ້ຕົກ ວ່າດ້ວຍການອະນຸມັດສ້າງຕັ້ງຄະນະໜ່ວຍສະຫະພັນແມ່ຍິງ ຫ້ອງການຄະນະຄຸ້ມຄອງເຂດເສດຖະກິດພິເສດແຂວງຄຳມ່ວນ ສະບັບເລກທີ 435/ສຍຂ ລົງວັນທີ 14 ກັນຍາ 2020 ແລະ ຂໍ້ຕົກລົງຂອງປະທານຄະນະບໍລິຫານງານສະຫະພັນແມ່ຍິງແຂວງ ວ່າດ້ວຍການອະນຸມັດແຕ່ງຕັ້ງບົ່ງຕົວເອົາຫົວໜ້າ, ຮອງຫົວໜ້າໜ່ວຍສະຫະພັນແມ່ຍິງຫ້ອງການຄະນະຄຸ້ມຄອງເຂດເສດຖະກິດພິເສດແຂວງຄຳມ່ວນ ສະບັບທີ 436/ສຍຂ ລົງວັນທີ 14 ກັນຍາ 2020 ໂດຍເຫັນດີແຕ່ງຕັ້ງ ທ່ານ ນາງ ອໍລະພັນ ຫຼວງປັດຊາ ເປັນຫົວໜ້າໜ່ວຍ, ທ່ານ ນາງ ມອນມະລີ ແສນແສງພົມ ເປັນຮອງຫົວໜ້າ, ທັງເປັນຜູ້ເຮັດວຽກງານກວດກາ

ທ່ານ ຈັນ ບຸບຜາລີວັນ ໄດ້ມີຄຳເຫັນໃຫ້ໜ່ວຍສະຫະພັນແມ່ຍິງຫ້ອງການຄະນະຄຸ້ມຄອງເຂດເສດຖະກິດພິເສດແຂວງ ຄຳມ່ວນ ເອົາໃຈໃສ່ສຶກສາອົບຮົມວຽກງານການເມືອງແນວຄິດ, ກໍ່ສ້າງພະນັກງານເພດຍິງໃຫ້ມີຄວາມເຂັ້ມແຂງ, ໃຫ້ມີ ຄວາມສາມັກຄີທັງພາຍໃນ ແລະ ພາຍນອກ ຊ່ວຍເຫຼືອເຊິ່ງກັນ ແລະ ກັນ, ເພີ່ມທະວີຄວາມສາມັກຄີປອງດອງຮັກສາຮີດຄອງປະເພນີອັນດີງາມຂອງຊາດ, ສຶກສາອົບຮົມປຸກລະດົມ ແລະ ຂົນຂວາຍມະຫາຊົນເຂົ້າໃນການປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມສີວິໄລ ຖືເອົາວຽກງານ 3 ດີຂອງແມ່ຍິງລາວວາງອອກ ເພື່ອເປັນບ່ອນອີງໃນການຈັດຕັ້ງປະຕິບັດໜ້າທີ່ວຽກງານ, ເຜີຍແຜ່ເຊື່ອມຊຶມກົດໝາຍ, ກົດລະບຽບນິຕິກຳຕ່າງໆ ແລະ ຊອກຮູ້ຮໍ່າຮຽນແບບແຜນເຮັດວຽກໃຫ້ມີຜົນສຳເລັດເປັນກ້າວໆ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ