ລະດັບນໍ້າເຊກອກເລີ່ມຫຼຸດລົງ ຂະນະທີ່ປະຊາຊົນຫຼາຍບ້ານໃນເມືອງວິລະບູລີ ຍັງເດືອດຮ້ອນຈາກເຫດນໍ້າຖ້ວມ - Laoedaily

ລະດັບນໍ້າເຊກອກເລີ່ມຫຼຸດລົງ ຂະນະທີ່ປະຊາຊົນຫຼາຍບ້ານໃນເມືອງວິລະບູລີ ຍັງເດືອດຮ້ອນຈາກເຫດນໍ້າຖ້ວມ

ເນື່ອງຈາກວ່າເມືອງວິລະບູລີ ແຂວງສະຫວັນນະເຂດ ໄດ້ຮັບອິດທິພົນຈາກພາຍຸໝູນເຂດຮ້ອນຈາກທະເລຈີນໃຕ້ ເຮັດໃຫ້ເກີດມີຝົນຕົກໜັກໃນໄລຍະ 2 ວັນທີ່ຜ່ານມາ ຈຶ່ງເຮັດໃຫ້ປະລິມານນໍ້າຕາມລໍາຫ້ວຍ ແລະ ລໍາເຊສາຍຕ່າງໆໄດ້ເພີ່ມຂຶ້ນຢ່າງໄວວາ ພ້ອມໄຫຼລົ້ນເຂົ້າຖ້ວມໄຮ່ນາຮົ້ວສວນ ແລະ ໜອງປາຂອງພໍ່ແມ່ປະຊາຊົນໃນຫຼາຍພື້ນທີ່ຂອງເມືອງວິລະບູລີ ເຮັດໃຫ້ເຂົ້ານາທີ່ພວມເກັບກ່ຽວໄດ້ຮັບຄວາມເສຍຫາຍ ຟ່ອນເຂົ້າໄຫຼໄປຕາມກະແສນໍ້າ ພ້ອມທັງໄຫຼຖ້ວມສາຍທາງຕ່າງໆເຮັດໃຫ້ການສັນຈອນໄປມາລະຫວ່າງບ້ານຫາບ້ານ, ບ້ານຫາເມືອງ ແລະ ເມືອງຫາເມືອງ ບໍ່ສາມາດໄປມາໄດ້ດ້ວຍລົດ ເສັ້ນທາງຫຼາຍຈຸດຖືກຕັດຂາດ.

ເມື່ອເຫັນໄດ້ຄືແນວນັ້ນ ທາງການນໍາຂັ້ນເມືອງກໍ່ໄດ້ຮີບຮ້ອນໃຈລົງຕິດຕາມເບິ່ງສະພາບການດັ່ງກ່າວຢ່າງຮີບດ່ວນ ໃນຕອນເຊົ້າຂອງວັນທີ 8 ຕຸລາ 2020 ຜ່ານມາ ເຊິ່ງນໍາໂດຍທ່ານ ຄໍາຜຸຍ ສີບຸນເຮືອງ ເຈົ້າເມືອງວິລະບູລີ ພ້ອມດ້ວຍຄະນະ ກໍ່ໄດ້ລົງຕິດຕາມເບິ່ງສະພາບການນໍ້າຖ້ວມໃນເບື້້ອງຕົ້ນຢູ່ເມືອງ ວິລະບູູລີ ໂດຍສະເພາະກໍ່ແມ່ນຕາມສາຍທາງ 28 ເອ ເຊັ່ນວ່າ: ຈຸດສາມຫຼ່ຽມທາງເຂົ້າບໍ່ຄໍາ, ຈຸດຫ້ວຍແຢງບໍລິສັດຄູນໄຊ, ຈຸດຫ້ວຍຄຽງທາງໄປບ້ານ ຫ້ວຍດ່າງ ແລະ ຈຸດຂົວຫ້ວຍຊວ້ານ ທັງນີ້ກໍ່ເພື່ອປະເມີນເບິ່ງລະດັບນໍ້າໃນແຕ່ລະຈຸດເພື່ອປະເມີນຄວາມສ່ຽງ ແລະ ກະກຽມຄວາມພ້ອມດ້ານຕ່າງໆເພື່ອໃຫ້ການຊ່ວຍເຫຼືອປະຊາຊົນ ທີ່ຢູ່ໃນພື້ນທີ່ໄພອັນຕະລາຍ ໃຫ້ຢູ່ໃນຈຸດທີ່ປອດໄພ ແລະ ໃນປະຈຸບັນນີ້ເສັ້ນທາງ 28 ເອ ອອກສູ່ເມືອງເຊໂປນແມ່ນບໍ່ສາມາດສັນຈອນໄປມາໄດ້ແລ້ວ.

ສໍາລັບຢູ່ເມືອງວິລະບູລີ ກໍ່ແມ່ນພື້ນທີ່ໜຶ່ງທີ່ຢູ່ໃນເຂດໄດ້ຮັບອິດທິພົນໜັກຈາກພາຍຸ ເຮັດໃຫ້ມີຝົນຕົກໜັກມາແຕ່ຕອນເຊົ້າຂອງວັນທີ 7 ຕຸລາ 2020 ທີ່ຜ່ານມາຈົນຮອດປັດຈຸບັນກໍ່ບໍ່ທັນຢຸດເຊົາ ຈຶ່ງເຮັດໃຫ້ລະດັບນໍ້າໃນສາຍນໍ້າຕ່າງໆເພີ່ມຂຶ້ນສູງ ເຊັ່ນວ່ານໍ້າເຊກອກ, ເຊນ້ອຍ, ເຊບາຍ, ນໍ້າຫ້ວຍຄຽງ, ນໍ້າຫ້ວຍຊວ້ານ ແລະ ສາຍນໍ້າອື່ນໆ ກໍ່ໄດ້ເພີ່ມຂຶ້ນຢ່າງໄວວາ ເຮັດໃຫ້ນໍ້າໄຫຼລົ້ນເຂົ້າທົ່ງນາຮົ້ວສວນພື້ນທີ່ທໍາການຜະລິດຂອງປະຊາຊົນ ເຮັດໃຫ້ມີຜົນເສຍຫາຍຫຼາຍສົມຄວນ ໂດຍສະເພາະເຂົ້ານາທີ່ຢູ່ໃນໄລຍະຂອງການເກັບກ່ຽວ ທີ່ຈົມຢູ່ພື້ນນໍ້າ ແລະ ໄຫຼຖ້ວມສາຍທາງຕ່າງໆ. ເຮັດໃຫ້ການສັນຈອນໄປມາຖືກຕັດຂາດເດີນທາງດ້ວຍລົດແມ່ນບໍ່ໄດ້ ແລະ ຄາດວ່າລະດັບນໍ້າຈະເພີ່ມຂຶ້ນເລື້້ອຍໆ.

ດ້ານລະດັບນໍ້າຫຼ້່ສຸດແທກໃນເວລາ 7:55 ຂອງວັນທີ 9 ຕຸລາ 2020 ໂດຍແທກໄດ້ຢູ່ທີ່ສູນວັດແທກຂອງບໍ່ຄໍາເຊໂປນ ແມ່ນ 9 ແມັດ. ແນວໃດກໍ່ຕາມ ຫາກຝົນຍັງສືບຕໍ່ຕົກໜັກແບບນີ້ ພວກເຮົາບໍ່ສາມາດຄາດການເຫດການທີ່ຈະເກີດຂຶ້ນຕໍ່ໜ້າໄດ້, ສະນັ້ນຈຶ່ງຂໍໃຫ້ພໍ່ແມ່ປະຊາຊົນທີ່ຢູ່ໃນເຂດພື້ນທີ່ສ່ຽງຈົ່ງໄດ້ມີຄວາມກຽມພ້ອມຢູ່ຕະຫຼອດເວລາ ແລະ ຄາດວ່າຝົນຈະຍັງຄົງສືບຕໍ່ຕົກຢູ່ໃນໄລຍະ 1-2 ວັນຂ້າງໜ້ານີ້ຕາມແຈ້ງການຂອງກົມອຸຕຸຍິຍົມ ແລະ ອຸທົກກະສາດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ