ໃນອາທິດຜ່ານມານີ້ ທ່ານ ຄຳຈັນ ສີດາວົງ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງສະຫວັນນະເຂດ ພ້ອມຄະນະ ໄດ້ລົງຢ້ຽມຢາມຄອບຄົວຕົວແບບການລ້ຽງສັດເປັນສິນຄ້າ ທີ່ບ້ານແກ້ງແຮດ ເມືອງໄຊບູລີ ແຂວງສະຫວັນນະເຂດ. ທັງນີ້, ກໍເພື່ອເປັນການເກັບກຳຂໍ້ມູນ ແລະ ຊຸກຍູ້ສົ່ງເສີມການຜະລິດເປັນສິນຄ້າພາຍໃນເມືອງດັ່ງກ່າວ ໃຫ້ນັບມື້ຂະຫຍາຍຕົວດີກວ່າເກົ່າ.
ໂອກາດນີ້, ທ່ານ ນາງ ພອນທິບ ເຄນນະວົງ ຄອບຄົວຕົວແບບການລ້ຽງງົວ ເປັນສິນຄ້າບ້ານແກ້ງແຮດ ໄດ້ສຳພາດຕໍ່ນັກຂ່າວວ່າ: ໄດ້ເລີ່ມຕົ້ນໃນການລ້ຽງງົວ ນັບແຕ່ທ້າຍປີ 2019 ເປັນຕົ້ນມາ ໂດຍມີເປົ້າໝາຍການລ້ຽງເພື່ອການສົ່ງອອກໄປປະເທດຈີນ ທີ່ມີຄວາມຕ້ອງການສູງເຖິງ 150.000 ໂຕຕໍ່ປີ ເຊິ່ງປັດຈຸບັນແມ່ນເປັນໄລຍະຂອງການກະກຽມດ້ານອາຫານແກ່ສັດ ໂດຍສະເພາະແມ່ນຫຍ້າ ເພື່ອໃຫ້ພຽງພໍກັບຄວາມຕ້ອງການ ແລະ ສາມາດຮອງຮັບດ້ານອາຫານແກ່ສັດ ທີ່ພວກເຮົາຈະໄດ້ຂະຫຍາຍການລ້ຽງຕື່ມອີກໃນອະນາຄົດ. ໃນນີ້, ພວກເຮົາໄດ້ທຳການປູກຫຍ້າຢູ່ 2 ຊະນິດ ຄື: ຫຍ້າຈຸນສ້າວ ແລະ ຫຍ້າເນເປຍ. ສຳລັບຫຍ້າຈຸນສ້າວນີ້ ແມ່ນໄດ້ນຳເຂົ້າຈາກຈີນ ເຊິ່ງມີວິຊາການລົງມາແນະນຳ ແລະ ຕິດຕາມໃນການປູກ ເພື່ອໃຫ້ຖືກຕາມເຕັກນິກວິຊາການ ໂດຍຫຍ້າຊະນິດດັ່ງກ່າວແມ່ນເປັນຫຍ້າທີ່ໃຫ້ຜົນຜະລິດສູງກວ່າຫຍ້າເນເປຍຫຼາຍພໍສົມຄວນ; ປັດຈຸບັນໄດ້ທຳການປູກໄປແລ້ວໃນເນື້ອທີ່ທັງໝົດ 25 ເຮັກຕາ ຈາກເນື້ອທີ່ຂອງຟາມທັງໝົດ 78 ເຮັກຕາ, ປະກອບມີ 3 ຟາມ, ມີງົວທັງໝົດ 137 ໂຕ ເຊິ່ງເປັນງົວຊອດທີ່ເປັນພັນປະສົມລະຫວ່າງົວພັນ ແລະ ງົວລາດ ຫຼື ງົວພື້ນເມືອງ ເນື່ອງຈາກວ່າລ້ຽງງ່າຍກວ່າ, ພາຍໃນຟາມລວມມີແຮງງານຕົ້ນຕໍທັງໝົດ 8 ຄົນ ແລະ ໄດ້ຈ້າງເພີ່ມໃນໄລຍະທີ່ຕ້ອງການ ໂດຍສະເພາະໃນໄລຍະຂອງການປູກຫຍ້າ ສຳລັບການລ້ຽງງົວກໍໄດ້ທົດລອງລ້ຽງທັງແບບປ່ອຍແບບທຳມະຊາດ ແລະ ລ້ຽງແບບຂັງ ເພື່ອສຶກສາຮຽນຮູ້ວ່າແບບໃດຈະໄດ້ຮັບຜົນຜະລິດດີກວ່າກັນ, ທາງດ້ານເຕັກນິກວິຊາການໃນການລ້ຽງແມ່ນໄດ້ຮຽນຮູ້ຈາກປະສົບການຕົວຈິງ ແລະ ຄົ້ນຄວ້າຈາກອິນເຕີເນັດອີກສ່ວນໜຶ່ງ.
ຈາກນີ້, ກໍຍັງມີນັກສຶກສາຈາກວິທະຍາໄລກະສິກຳ – ປ່າໄມ້ ແຂວງສະຫວັນນະເຂດ ລົງມາຝຶກງານກັບຟາມພວກເຮົານຳອີກ ຕໍ່ກັບແຜນການໃນອະນາຄົດໄດ້ຕັ້ງເປົ້າໄວ້ວ່າ ອີກ 2 ປີຕໍ່ໜ້າ ຈະເລີ່ມການສົ່ງອອກງົວໄປປະເທດຈີນ. ນອກນີ້ພວກເຮົາຍັງມີແຜນຈະເປີດໃຫ້ນັກທ່ອງທ່ຽວເຂົ້າມາທ່ຽວຊົມພາຍໃນຟາມຕື່ມອີກ ເນື່ອງຈາກວ່າຟາມຂອງພວກເຮົາມີຄວາມອຸດົມສົມບູນ, ມີຫ້ວຍຮ່ອງ, ມີການປູກພືດ ແລະ ໄມ້ກິນໝາກປະເພດຕ່າງໆ ເຊິ່ງພວກເຮົາໄດ້ມີການຈັດສັນພື້ນທີ່ພາຍໃນຟາມຢ່າງເປັນລະບົບ, ມີຈຸດຊົມວິວທີ່ສາມາດເບິ່ງເຫັນທິວທັດພາຍໃນຟາມໄດ້ຢ່າງຊັດເຈນ. ພິເສດກໍມີຝູງເປັດນ້ຳຈຳນວນຫຼາຍຮ້ອຍໂຕ ທີ່ລົງມາຫາກິນພາຍໃນໜອງຂອງຟາມ ໂດຍພວກເຮົາໄດ້ອະນຸຮັກໄວ້ບໍ່ໃຫ້ຄົນໄປລົບກວນພວກມັນ.
ໂອກາດນີ້, ທ່ານ ຄຳຈັນ ສີດາວົງ ພ້ອມຄະນະ ກໍໄດ້ລົງຢ້ຽມຊົມຟາມງົວ, ສວນປູກຫຍ້າ ແລະ ຈຸດອື່ນໆຂອງຟາມ, ທ່ານກໍຍັງໄດ້ແນະນຳກ່ຽວກັບການປູກ – ການລ້ຽງຕື່ມອີກ.
