ປູກຢາງພາລາ ພາຄອບຄົວພົ້ນທຸກ - Laoedaily

ປູກຢາງພາລາ ພາຄອບຄົວພົ້ນທຸກ

ປະຕິບັດຕາມແນວທາງນະໂຍບາຍຂອງພັກ ກໍຄືການຊີ້ນຳໆພາຂອງອົງຄະນະພັກເມືອງໝື່ນ ແຂວງວຽງຈັນ ໃນການສ້າງເງື່ອນໄຂໃຫ້ພໍ່ແມ່ປະຊາຊົນໄດ້ສ້າງສາພັດທະນາເສດຖະກິດຕາມແລວເສດຖະກິດຂອງແຂວງ ແນໃສ່ສ້າງເມືອງໝື່ນໃຫ້ເປັນເມືອງພັດທະນາຮອບດ້ານ ໂດຍເນັ້ນໃສ່ການພັດທະນາວຽກງານໃນຂົງເຂດກະສິກຳ ຕິດພັນກັບການປູກໄມ້ອຸດສາຫະກຳເປັນສິນຄ້າຂອງປະຊົນ ເຊິ່ງໄລຍະຜ່ານມາ ພັກ ແລະ ລັດຖະບານ ໄດ້ເອົາໃຈໃສ່ຢ່າງຕັ້ງໜ້າສຸມທຶນຮອນໃສ່ວຽກງານຟື້ນຟູປ່າໄມ້ ເພື່ອທົດແທນປ່າໄມ້ທີ່ຖືກທໍາລາຍໃຫ້ກັບຄືນມີຄວາມອຸດົມສົມບູນ, ເອົາໃຈໃສ່ໃນການຊຸກຍູ້ສົ່ງເສີມ ຕິດຕາມຄຸ້ມຄອງ ແລະ ອໍານວຍຄວາມສະດວກໃຫ້ແກ່ບຸກຄົນ, ບໍລິສັດໃຫ້ມີສ່ວນຮ່ວມໃນການປູກໄມ້ ເຊິ່ງມີຫຼາຍຄອບຄົວຜະລິດເປັນສິນຄ້າທີ່ມີຜົນສໍາເລັດ.

ເປັນຕົ້ນແມ່ນຄອບຄົວຂອງ ທ່ານ ຈູເຈ່ຍຫາ ໜໍຕູ້ ອາຍຸ 46 ປີ ເປັນຄອບຄົວໜຶ່ງທີ່ມີມູນເຊື້ອ ຄວາມດຸໝັ່ນຂະຫຍັນພຽນ, ເຊື່ອໝັ້ນ ແລະ ເອກະພາບຕໍ່ແນວທາງນະໂຍບາຍຂອງພັກ ຢຶດຖືໃນອຸດົມຄະຕິເຕື່ອນໃຈຂອງພັກ – ລັດຖະບານທີ່ວ່າ ບຸກບືນກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນການເປັນກ້າວຍ່າງທີ່ສຳຄັນຂອງການດຳລົງຊີວິດ ແລະ ມີຄວາມມັກຮັກໃນອາຊີບກະສິກຳ ໂດຍທຸ່ມເທເຫື່ອແຮງ ແລະ ປະສົບການໃນຊີວິດຂອງຕົນ ຫັນມາປູກຢາງພາລາເປັນອາຊີບຕົ້ນຕໍ ຈົນສາມາດເຮັດໃຫ້ຄອບຄົວມີຄວາມອຸດົມສົມບູນກາຍເປັນຄອບຄົວພົ້ນທຸກ.

ທ່ານ ຈູເຈ່ຍຫາ ໜໍຕູ້ ໃຫ້ສຳພາດວ່າ: ຕົນເອງໄດ້ເກີດ ແລະ ເຕີບໃຫຍ່ຢູ່ບ້ານສັນຟານ ເມືອງໜອງແຮດ ແຂວງຊຽງ ຂວາງ ໄດ້ສ້າງຄອບຄົວ ກັບ ນາງ ຢົວຢ່າງ ປັດຈຸບັນອາຍຸ 42 ປີ ມີລູກນໍາກັນ 5 ຄົນ, ພາຍໃນຄອບຄົວມີສະມາຊິກທັງໝົດ 9 ຄົນ, ມີແຮງງານຕົ້ນຕໍ 5 ຄົນ, ພື້ນຖານປະສົບການຜ່ານມາ ໃນປີ 2006 ຕົນເອງໄດ້ຮັບການຝຶກອົບຮົມກ່ຽວກັບເຕັກນິກການປູກຢາງພາລາຢູ່  ແຂວງຫຼວງນໍ້າທາ. ຫຼັງຈາກນັ້ນ, ຈຶ່ງໄດ້ມາທົດລອງປູກຢູ່ບ້ານບໍພຽງ ເມືອງຫຼວງນໍ້າທາ ແຂວງຫຼວງນໍ້າທາ ຈໍານວນ 3.576 ເບ້ຍ.

ຕົກມາປີ 2008 ຕົນເອງ ແລະ ຄອບຄົວໄດ້ຍົກຍ້າຍມາຕັ້ງຖິ່ນຖານຢູ່ບ້ານນໍ້າແພດ ເມືອງໝື່ນ ແຂວງວຽງຈັນ ໂດຍຢຶດໝັ້ນອາຊີບເຮັດກະສິກໍາ ແລະ ປ່າໄມ້ ເປັນຕົ້ນຕໍຄືເກົ່າ ຈຶ່ງໄດ້ນໍາເອົາບົດຮຽນທີ່ເຄີຍປູກໄມ້ອຸດສາຫະກໍາມາກ່ອນນັ້ນມາທົດລອງ ແລະ ໝູນໃຊ້ເຮັດຕົວຈິງຢູ່ເມືອງໝື່ນ ໂດຍຕົນເອງ ແລະ ຄອບຄົວໄດ້ຕັດສິນໃຈຊື້ດິນນໍາປະຊາຊົນທີ່ມີເອກະສານຖືກຕ້ອງ ໃນເນື້ອທີ່ 12 ເຮັກຕາ ໃນລາຄາ 36 ລ້ານກີບ, ໄປພ້ອມກັບການວາງແຜນດ້ານລາຍຮັບ – ລາຍຈ່າຍລະອຽດ, ການນໍາໃຊ້ຕົ້ນທຶນ ເຊັ່ນ: ຊື້ແນວພັນ, ຄ່າແຮງງານຂຸດຂຸມ, ຄ່າແຮງງານບົວລະບັດຮັກສາ, ຢາກະຕຸ້ນຮາກ ແລະ ອື່ນໆ ໂດຍເລີ່ມຕົ້ນກ້າເບ້ຍປູກ ຈໍານວນ 4.000 ຕົ້ນ ມາຮອດປີ 2011 ໄດ້ປູກຕື່ມອີກ 2.000 ຕົ້ນ ລວມທັງໝົດມາຮອດປັດຈຸບັນ 6.000 ຕົ້ນ, ໄລຍະຫ່າງຂອງການປູກ 2,5 x 8 ແມັດ ມີເນື້ອທີ່ 12 ເຮັກຕາ.

ການບົວລະບັດຮັກສາໃນໄລຍະຕົ້ນຍັງນ້ອຍແມ່ນ ປີໜຶ່ງຕໍ່ 2 ເທື່ອ, ໃຊ້ເວລາປູກ 7 – 8 ປີ ກໍສາມາດປາດນໍ້າຢາງໄດ້. ຕົກມາຮອດປີ 2016 ຕົນເອງໄດ້ເລີ່ມປາດຢາງ 3.800 ຕົ້ນ, ຜົນຜະລິດສະເລ່ຍ 1 ຕົ້ນຕໍ່ 7 ກິໂລກຣາມ ສະເລ່ຍຂາຍໃນລາຄາ 1 ກິໂລກຣາມຕໍ່ 3.500 ກີບເປັນເງິນ 93,1 ລ້ານກີບ.

▶ ປີ 2017 ປາດນໍ້າຢາງໄດ້ 3.800 ຕົ້ນ ຜົນຜະລິດສະເລ່ຍ 1 ຕົ້ນຕໍ່ 8 ກິໂລກຣາມ ສະເລ່ຍຂາຍໃນລາຄາ 1 ກິໂລກຣາມຕໍ່ 4.500 ກີບ ເປັນເງິນ 136,8 ລ້ານກີບ.

▶ ປີ 2018 ເປັນຕົ້ນມາ ປາດນໍ້າຢາງໄດ້ຫຼາຍຕົ້ນເພີ່ມຂຶ້ນ ຂາຍໃນລາຄາ 1 ກິໂລ ກຣາມຕໍ່ 5.400 ກີບ ເປັນເງິນ 360 ລ້ານກີບ.

[ ເນື້ອໃນ-ພາບ: ນັກຂ່າວເມືອງໝື່ນ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ