ຈໍາປາສັກ ຈັດງານຕະຫຼາດນັດຈໍາໜ່າຍສິນຄ້າຫັດຖະກໍາ - Laoedaily

ຈໍາປາສັກ ຈັດງານຕະຫຼາດນັດຈໍາໜ່າຍສິນຄ້າຫັດຖະກໍາ

ສະມາຄົມຫັດຖະກໍາແຂວງ, ສະພາການຄ້າ ແລະ ອຸດສາຫະກໍາ ຮ່ວມກັບ ພະແນກອຸດສາຫະກໍາ – ການຄ້າແຂວງຈໍາປາສັກ ໄດ້ຈັດງານຕະຫຼາດນັດວາງສະແດງ ແລະ ຈໍາໜ່າຍສິນຄ້າຫັດຖະກໍາ ເພື່ອສົ່ງເສີມຜູ້ຜະລິດ ແລະ ເປີດຕະຫຼາດຈໍາໜ່າຍສິນຄ້າ.

ງານຕະຫຼາດນັດວາງສະແດງ ແລະ ຈໍາໜ່າຍສິນຄ້າຫັດຖະກໍາຄັ້ງນີ້, ມີຮ້ານຄ້າຈາກບັນດາຫົວໜ່ວຍທຸລະກິດທີ່ເປັນສະມາຊິກສະມາຄົມຫັດຖະກໍາທັງໝົດ 54 ຮ້ານ, ຈະດໍາເນີນການຊື້ – ຂາຍ ນັບແຕ່ວັນທີ 29 ກັນຍາ ໄປຮອດວັນທີ 2 ຕຸລາ 2020 ຈຶ່ງຈະສໍາເລັດ. ພາຍໃນງານມີຮ້ານວາງສະແດງ ແລະ ຈໍາໜ່າຍສິນຄ້າຫຼັກໆແມ່ນເຄື່ອງຫັດຖະກໍາທີ່ຊາວແຂວງ ຈໍາປາສັກ ສາມາດຜະລິດໄດ້ ເຊັ່ນ: ປະເພດແຜ່ນແພ: ຜ້າຝ້າຍ, ຜ້າໃໝ, ເຄື່ອງເຟີນີເຈີ, ເຄື່ອງຫັດຖະກໍາເງິນທີ່ລະນຶກ, ເຄື່ອງປັ້ນດິນເຜົາ, ເຄື່ອງຈັກສານ ແລະ ອື່ນໆ.

ຈຸດປະສົງໃນການຈັດງານຄັ້ງນີ້ ເພື່ອສົ່ງເສີມການຜະລິດສິນຄ້າຫັດຖະກໍາໃຫ້ເພີ່ມຂຶ້ນທາງດ້ານປະລິມານ ແລະ ຄຸນນະພາບ, ຊອກຕະຫຼາດຈໍາໜ່າຍໃຫ້ກວ້າງຂວາງທັງພາຍໃນ ແລະ ຕ່າງປະເທດ ແລະ ເຮັດໃຫ້ຜູ້ຜະລິດ, ຈໍາໜ່າຍມີລາຍໄດ້ກະຕຸ້ນໃຫ້ເສດຖະກິດຂອງແຂວງສືບຕໍ່ຂະຫຍາຍຕົວທັງສ້າງເປັນຜົນງານ ແລະ ຂະບວນການຕ້ອນຮັບກອງປະຊຸມໃຫຍ່ຂອງອົງຄະນະພັກແຂວງ ຄັ້ງທີ VIII ທີ່ຈະໄຂຂຶ້ນໃນມໍ່ໆນີ້.

ພິທີເປີດຕະຫຼາດຈັດຂຶ້ນວັນທີ 29 ກັນຍາ 2020 ທີ່ສວນວັດທະນະທໍາບັນດາເຜົ່າຫຼັກ 7, ເຂົ້າຮ່ວມມີ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ຜູ້ປະກອບການທຸລະກິດຕາງໜ້າໃຫ້ 9 ເມືອງ, 1 ນະຄອນ ແລະ ບັນດາແຂວງພາກກາງ, ພາກໃຕ້ເຂົ້າຮ່ວມ.

( ຮູບ ແລະ ຂໍ້ມູນ: ເກດສະໜາ ແກ້ວສຸວັນນະແສງ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ