ອັດຕະປື ແນະນຳການສຳຫຼວດຖານລາຍຮັບງົບປະມານ ແລະ ການປະເມີນຫົວໜ່ວຍວິສາຫະກິດ - Laoedaily

ອັດຕະປື ແນະນຳການສຳຫຼວດຖານລາຍຮັບງົບປະມານ ແລະ ການປະເມີນຫົວໜ່ວຍວິສາຫະກິດ

ກົມສ່ວຍສາອາກອນ ກະຊວງການເງິນ ຮ່ວມກັບ ສ່ວຍສາອາກອນປະຈຳແຂວງອັດຕະປື ໄດ້ຈັດກອງປະຊຸມເຜີຍແຜ່, ແນະນຳກ່ຽວກັບວຽກງານເດີນສໍາຫຼວດຖານລາຍຮັບງົບປະມານ ແລະ ວິທີການປະເມີນຫົວໜ່ວຍວິສາຫະກິດ ຂຶ້ນໃນວັນທີ 28 ກັນຍາ 2020 ເຂົ້າຮ່ວມມີ ທ່ານ ຄໍາເຜີຍ ໂສມຖາວອນ ຫົວໜ້າພະແນກການເງິນ ແຂວງອັດຕະປື, ມີທ່ານ ທຳມະລົດ ຣາດຊະພົນ ຮອງຫົວໜ້າກົມສ່ວຍສາອາກອນ ກະຊວງການເງິນ.

ທ່ານ ທໍາມະລົດ ຣາດຊະພົນ ຮອງຫົວໜ້າກົມສ່ວຍສາອາກອນ ກ່າວມີຄໍາເຫັນວ່າ: ເພື່ອເປັນການຮັບປະກັນໃຫ້ແກ່ການຈັດຕັ້ງປະຕິບັດການກຳນົດເງື່ອນໄຂການຈັດແບ່ງຂະໜາດຂອງວິສາຫະກິດ ໃຫ້ເປັນເອກະພາບໃນຂອບເຂດທົ່ວປະເທດ ແລະ ສ້າງຄວາມສະດວກໃນການຄຸ້ມຄອງ, ກວດກາ ແລະ ຕິດຕາມການເກັບລາຍຮັບສ່ວຍສາອາກອນ ພ້ອມທັງຊຸກຍູ້ຫົວໜ່ວຍວິສາຫະກິດໃຫ້ເຂົ້າສູ່ລະບົບອາກອນມູນຄ່າເພີ່ມ ຫຼຸດຊ່ອງວ່າງການສວຍໃຊ້ໂອກາດຕ່າງໆ ແລະ ຫາງສຽງຂອງສັງຄົມໃຫ້ຫຼຸດລົງເທື່ອລະກ້າວ

ຕະຫຼອດຮອດຫົວໜ່ວຍວິສາຫະກິດຕ້ອງໄດ້ຮັບຮູ້ການຫັນເປັນທັນສະໄໝໃນການແຈ້ງ – ມອບພັນທະອາກອນ ແລະ ພັນທະອື່ນໆຜ່ານລະບົບທະນາຄານໃຫ້ຫຼາຍຂຶ້ນ ຮັບປະກັນໃຫ້ແກ່ການປະຕິບັດລາຍຮັບງົບປະມານ ໃນປີ 2020 ໃຫ້ບັນລຸ ແລະ ຄາດຄະເນແຜນການລາຍຮັບ ປະຈຳປີ 2021 ໃຫ້ມີຄວາມລະອຽດຊັດເຈນ, ທີ່ປະຊຸມບັນດາຜູ້ເຂົ້າຮ່ວມໄດ້ຮັບຟັງຄໍາແນະນໍາກ່ຽວກັບວຽກງານລົງສຳຫຼວດຖານລາຍຮັບງົບປະມານ ແລະ ການປະເມີນຫົວໜ່ວຍວິສາຫະກິດໃນການຈັດຕັ້ງປະຕິບັດການກຳນົດເງື່ອນໄຂການຈັດແບ່ງຂະໜາດຂອງວິສາຫະກິດ.

( ຮູບ – ຂໍ້ມູນ: ວັດທະນາ ຫຼວງອາໄພ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ