ປິດໂຄງການຖານຂໍ້ມູນນິຕິກໍາຂະແໜງອຸດສາຫະກຳ ແລະ ການຄ້າ - Laoedaily

ປິດໂຄງການຖານຂໍ້ມູນນິຕິກໍາຂະແໜງອຸດສາຫະກຳ ແລະ ການຄ້າ

ຫ້ອງການກະຊວງອຸດສາຫະກຳ ແລະ ການຄ້າ ( ອຄ ) ຈັດພິທີປິດໂຄງການສ້າງຖານຂໍ້ມູນນິຕິກໍາຂະແໜງ ອຄ ພ້ອມທັງນໍາສະເໜີຜົນສໍາເລັດຕະຫຼອດໄລຍະການສ້າງ ແລະ ພັດທະນາ 3 ປີຜ່ານມາ ໂດຍສະເພາະການສ້າງຖານຂໍ້ມູນນິຕິກໍາຂອງກະຊວງ ໂດຍຜ່ານເວັບໄຊ https://law.moic.gov.la ເຊິ່ງມີຜູ້ເຂົ້າຢ້ຽມຊົມ 1,8 ລ້ານຄົນ.

ພິທີປິດໂຄງການຈັດຂຶ້ນໃນວັນທີ 30 ກັນຍາ 2020 ທີ່ໂຮງແຮມແລນມາກ ເປັນປະທານຂອງ ທ່ານ ນາງ ບານສະຕິ ເທບພະວົງ ຫົວໜ້າຫ້ອງການກະຊວງ ອຄ ມີພະນັກງານກ່ຽວຂ້ອງ ແລະ ເຈົ້າໜ້າທີ່ຈາກກະຊວງອ້ອມຂ້າງເຂົ້າຮ່ວມ.

ທ່ານ ນາງ ບານສະຕິ ເທບພະວົງ ກ່າວວ່າ: ໂຄງການສ້າງຖານຂໍ້ມູນນິຕິກໍາກະຊວງ ອຄ ສ້າງຕັ້ງມາແຕ່ປີ 2017 ໂດຍໄດ້ຮັບການຊ່ວຍເຫຼືອຈາກກອງທຶນຮ່ວມມືແມ່ນໍ້າຂອງ – ສ.ເກົາຫຼີ ( Mekong – ROK Cooperation Fund MKCF ) ເປົ້າໝາຍຫຼັກຂອງໂຄງການ ແມ່ນແນໃສ່ເຮັດໃຫ້ບັນດາກົດໝາຍຂອງຂະແໜງ ອຄ ສາມາດເຂົ້າເຖິງໄດ້ທົ່ວສັງຄົມ ໂດຍຜ່ານຂໍ້ມູນແບບເອເລັກໂຕຣນິກ ໂດຍສະເພາະແມ່ນບັນດາເຈົ້າໜ້າທີ່ ອຄ ໃນທົ່ວປະເທດ ສາມາດເຂົ້າເຖິງຂໍ້ມູນໄດ້ຢ່າງວ່ອງໄວ ແລະ ເປັນເອກະພາບ ພ້ອມທັງສ້າງຄວາມໂປ່ງໃສໃນຂະບວນການອອກນິຕິກໍາ ເພື່ອເພີ່ມຄວາມເຊື່ອໝັ້ນໃຫ້ພາກທຸລະກິດຫຼຸດຜ່ອນຕົ້ນທຶນ ແລະ ປາກົດການຫຍໍ້ທໍ້ໃນຂອດຈັດຕັ້ງປະຕິບັດ ອັນສໍາຄັນແມ່ນສອດຄ່ອງກັບທິດຊີ້ນໍາຂອງນາຍົກລັດຖະມົນຕີ ເລກທີ 02/ນຍ ວ່າດ້ວຍການປັບປຸງລະບຽບການ ແລະ ກົນໄກການປະສານງານໃນການດໍາເນີນທຸລະກິດຢູ່ ສປປ ລາວ.

ທ່ານ ນາງ ກິ່ງສະດອນ ເພັດດາວເຮືອງ ຮອງຫົວໜ້າຫ້ອງການກະຊວງ ອຄ ໄດ້ກ່າວວ່າ: ການຈັດຕັ້ງປະຕິບັດໃນໄລຍະ 3 ປີຜ່ານມາ ມີຜົນສໍາເລັດຫຼາຍດ້ານ ໂດຍສະເພາະສໍາເລັດການສ້າງເວັບໄຊຖານຂໍ້ມູນນິຕິກໍາຂອງຂະແໜງ ອຄ                    ( https://law.moic.gov.la ) ສໍາເລັດການແປນິຕິກໍາຈາກພາສາລາວເປັນພາສາອັງກິດ 79 ສະບັບ, ປະກອບເຄື່ອງຄອມພິວເຕີໃຫ້ ອຄ ເມືອງທົ່ວປະເທດ 45 ເມືອງເປົ້າໝາຍ. ນອກຈາກນີ້, ຍັງໄດ້ຝຶກອົບຮົມມີຜູ້ເຂົ້າຮ່ວມ 250 ກວ່າທ່ານ.

ປັດຈຸບັນ, ມີຜູ້ເຂົ້າຢ້ຽມຊົມເວັບໄຊທັງພາຍໃນ ແລະ ຕ່າງປະເທດ ຫຼາຍກວ່າ 1,8 ລ້ານຄົນ ແລະ ສືບຕໍ່ມີທ່າອ່ຽງເພີ່ມຂຶ້ນ, ກະຊວງ ອຄ ປັດຈຸບັນມີກົດໝາຍ ແລະ ນິຕິກໍາໃຕ້ກົດໝາຍທີ່ມີຜົນບັງຄັບໃຊ້ທົ່ວໄປ ພາຍໃຕ້ຄວາມຮັບຜິດຊອບຂອງຕົນຫຼາຍກວ່າ 200 ສະບັບ ເຊິ່ງລວມມີກົດໝາຍ 9 ສະບັບ, ດໍາລັດ 14 ສະບັບ ແລະ ຂໍ້ຕົກລົງ 77 ສະບັບ ແລະ ນິຕິກໍາອື່ນໆອີກຈໍານວນໜຶ່ງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ