ເປີດນຳໃຊ້ສະຖານີວິທະຍຸ ເພື່ອການພັດທະນາເມືອງນາກາຍ - Laoedaily

ເປີດນຳໃຊ້ສະຖານີວິທະຍຸ ເພື່ອການພັດທະນາເມືອງນາກາຍ

ສະຖານີວິທະຍຸເພື່ອການພັດທະນາເມືອງນາກາຍ ຈະຮັບປະກັນໃຫ້ປະຊາຊົນຢູ່ເຂດຫ່າງໄກສອກຫຼີກໄດ້ເຂົ້າເຖິງຂໍ້ມູນ – ຂ່າວສານເພີ່ມຂຶ້ນໃນດ້ານຕ່າງໆ. ພ້ອມດຽວກັນນັ້ນ, ຊຸມຊົນຈະສາມາດມີສ່ວນຮ່ວມໃນການຕັດສິນໃຈ ເພື່ອພັດທະນາຊຸມຊົນກໍຄືຊ່ວຍປັບປຸງຄຸນນະພາບຊີວິດຂອງພວກເຂົາໃຫ້ດີຂຶ້ນ.

ໃນວັນທີ 25 ກັນຍາ 2020 ທີ່ເມືອງນາກາຍ ແຂວງຄຳມ່ວນ ໄດ້ມີພິທີເປີດການນຳໃຊ້ ແລະ ອອກອາກາດຂອງສະຖານີວິທະຍຸເພື່ອການພັດທະນາເມືອງນາກາຍຢ່າງເປັນທາງການ ໃຫ້ກຽດເຂົ້າຮ່ວມໃນພິທີດັ່ງກ່າວໂດຍ ທ່ານ    ໂອໄດ ສຸດາພອນ ເຈົ້າແຂວງ ຄຳມ່ວນ, ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງຖະຫຼງຂ່າວ ວັດທະນະທຳ ແລະ ທ່ອງທ່ຽວ           ( ຖວທ ), ທ່ານ ນາງ ຈິນຮາ ຄິມ ຕາງໜ້າຈາກອົງການສະຫະປະຊາຊາດ ເພື່ອການພັດທະນາປະຈຳລາວ ( ສປຊ ) ແລະ ທ່ານ ສະເຕຟານ ເລມາຊອນ ຜູ້ອຳນວຍການຝ່າຍເຕັກນິກ ແລະ ການຜະລິດ ບໍລິສັດໄຟຟ້ານ້ຳເທີນ 2 ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ສະຖານີວິທະຍຸດັ່ງກ່າວນີ້ໄດ້ຮັບການປັບປຸງ ແລະ ຍົກລະດັບກຳລັງສົ່ງຂຶ້ນເປັນ 1 ກິໂລວັດ ເຊິ່ງແມ່ນການຮ່ວມມືລະຫວ່າງອົງການ ສປຊ ແລະ ກະຊວງ ຖວທ ເຊິ່ງແມ່ນໂຄງການສົ່ງເສີມການມີສ່ວນຮ່ວມຂອງປະຊາຊົນຜ່ານວິທະຍຸຊຸມຊົນ ( ສສປວ ) ເປັນຜູ້ຈັດຕັ້ງປະຕິບັດ ແລະ ພາຍໃຕ້ການຊີ້ນຳກວດກາຈາກກົມສື່ມວນຊົນ ກະຊວງ ຖວທ.

ສະຖານີວິທະຍຸ ເພື່ອການພັດທະນາເມືອງນາກາຍ ໄດ້ຮັບທຶນສະໜັບສະໜູນຈາກອົງການ ສປຊ ແລະ ບໍລິສັດໄຟຟ້ານ້ຳເທີນ 2 ເປັນມູນຄ່າລວມທັງໝົດ 200.000 ໂດລາສະຫະລັດ. ໃນນີ້, ບໍລິສັດໄຟຟ້ານໍ້າເທີນ 2 ຈຳກັດ ປະກອບສ່ວນ 60% ແລະ ອົງການ ສປຊ 40%; ໂຄງການດັ່ງກ່າວແມ່ນມີໄລຍະເວລາ 3 ປີ ເລີ່ມຕັ້ງແຕ່ເດືອນກັນຍາປີ 2019 ຫາເດືອນສິງຫາ ປີ 2022.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ