ອັດຕາຄົວເຮືອນ ຊົມໃຊ້ໄຟຟ້າທົ່ວແຂວງສາລະວັນ ກວມເອົາ 95,63% - Laoedaily

ອັດຕາຄົວເຮືອນ ຊົມໃຊ້ໄຟຟ້າທົ່ວແຂວງສາລະວັນ ກວມເອົາ 95,63%

ໃນວັນທີ 25 ກັນຍາ 2020 ນີ້ ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະ ໄດ້ລົງຢ້ຽມຢາມ ແລະ ເຮັດວຽກຢູ່ທີ່ຫ້ອງປະຊຸມລັດວິສາຫະກິດໄຟຟ້າລາວ ສາຂາແຂວງສາລະວັນ ໂດຍມີພະນັກງານລັດຖະກອນພາຍໃນລັດວິສາຫະກິດໄຟຟ້າລາວ ສາຂາແຂວງສາລະວັນ.

ທ່ານ ສັງວານ ພົມມະແສງ ຮັກສາການຫົວໜ້າສາຂາລັດວິສາຫະກິດໄຟຟ້າລາວ ສາຂາແຂວງສາລະວັນ ໄດ້ລາຍງານການຈັດຕັ້ງປະຕິບັດວຽກງານໃນໄລຍະ 8 ເດືອນປີ 2020ໂດຍສັງເຂບວ່າ: ລັດວິສາຫະກິດໄຟຟ້າລາວ ສາຂາແຂວງສາລະວັນ ມີພະນັກງານທັງໝົດ 254 ຄົນ ( ຍິງ 64 ຄົນ ) ຢູ່ໃນ 8 ຕົວເມືອງທົ່ວແຂວງສາລະວັນແມ່ນໄດ້ຊົມໃຊ້ໄຟຟ້າ ມີ 553 ບ້ານ ກວມເອົາ 95,51% ຂອງຈຳນວນບ້ານທັງໝົດ ແລະ ມີ 70.054 ຫຼັງຄາເຮືອນ ກວມເອົາ 95,63%, ມີກຳລັງຊົມໃຊ້ສູງສຸດທົ່ວສາຂາ 29 ເມກາວັດ ຂອງວັນທີ 10 ເມສາ 2020 ແລະ ຕໍ່າສຸດ 3,03 ເມກາວັດ ໃນວັນທີ 29 ສິງຫາ 2020, ມີໄຟຕົກ – ໄຟມອດ 46 ຄັ້ງ.

ດ້ານພະລັງງານສົ່ງອອກ 74.563.455 ກິໂລວັດໂມງ, ພະລັງງານເກັບກູ້ 66.297.377 ກິໂລວັດໂມງ ແລະ ພະລັງງານຕົກເຮ່ຍ 8.266.078 ກິໂລວັດໂມງ ເທົ່າກັບ 11,09% ທຽບໃສ່ໄລຍະດຽວກັນໃນປີ 2019 ຫຼຸດລົງ 1,07%, ດ້ານລາຍຮັບທັງໝົດມີ 47,3 ຕື້ກວ່າກີບ ທຽບໃສ່ແຜນ 8 ເດືອນ ປີ 2020 ເທົ່າກັບ 97% ດ້ານລາຍຈ່າຍມີ 66,7 ຕື້ກວ່າກີບ ທຽບໃສ່ແຜນການ 8 ເດືອນປີ 2020 ເທົ່າກັບ 104%.

ສ່ວນທິດທາງຕໍ່ໜ້າສູ້ຊົນເຮັດໃຫ້ພະລັງງານຕົກເຮ່ຍໃຫ້ຢູ່ໃນເກນບໍ່ເກີນ 10% ຕາມແຜນອະນຸມັດຂອງໄຟຟ້າລາວ ວາງອອກ, ພ້ອມທັງສູ້ຊົນເກັບກູ້ໜີ້ສິນໃຫ້ໄດ້ 100% ຂຶ້ນໄປໂດຍຈະເນັ້ນໜັກໃນວຽກກວດກາ, ການຈົດຕົວເລກພະລັງງານໃນແຕ່ລະເດືອນ ພ້ອມທັງຈະສະໜອງໄຟເຂົ້າໂຮງງານແປ້ງມັນ 2 ແຫ່ງ ເຊິ່ງມີ ຄວາມຕ້ອງການໄຟຟ້າປະມານ 8,1 ເມກາວັດຕໍ່ເດືອນ ໂດຍຈະໄດ້ຊົມໃຊ້ໄຟປົກກະຕິໃນທ້າຍປີນີ້.

[ ຮູບ – ຂ່າວ: ສິດຕາ ເພັດວົງສາ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ