ຕະຫຼາດຫຼັກຊັບລາວ ມອບອຸປະກອນການສຶກສາໃຫ້ແກ່ນ້ອງນັກຮຽນປະຖົມສຶກສາສົມບູນອີ່ໄລ - Laoedaily

ຕະຫຼາດຫຼັກຊັບລາວ ມອບອຸປະກອນການສຶກສາໃຫ້ແກ່ນ້ອງນັກຮຽນປະຖົມສຶກສາສົມບູນອີ່ໄລ

ສຳນັກງານຄະນະກຳມະການຄຸ້ມຄອງຫຼັກຊັບ, ຕະຫຼາດຫຼັກຊັບລາວ, ບໍລິສັດຫຼັກຊັບ ແລະ ບໍລິສັດຈົດທະບຽນ ໄດ້ຮ່ວມໃຈກັນຈັດກິດຈະກໍາຊ່ວຍເຫຼືອສັງຄົມໃນໂຄງການຮ່ວມໃຈໃຫ້ອະນາຄົດນ້ອງ ຄັ້ງທີ 3 ເຊິ່ງໄດ້ມອບອຸປະກອນການສຶກສາໃຫ້ແກ່ນ້ອງນັກຮຽນ      ຢູ່ໂຮງຮຽນປະຖົມສຶກສາສົມບູນອີ່ໄລ ທີ່ຂຶ້ນກັບບ້ານອີ່ໄລ   ເມືອງນາຊາຍທອງ ນະຄອນຫຼວງວຽງຈັນ ເພື່ອເປັນການສ້າງຂະບວນການຄໍານັບຮັບຕ້ອນພິທີສະເຫຼີມສະຫຼອງວັນສ້າງຕັ້ງຕະຫຼາດທຶນລາວ ຄົບຮອບ 10 ປີ.

ອຸປະກອນການຮຽນທີ່ນໍາມາມອບໃນຄັ້ງນີ້ ປະກອບມີ: ປຶ້ມແບບຮຽນສຳລັບຊັ້ນປະຖົມ ແລະ ມັດທະຍົມສຶກສາ, ປຶ້ມຂຽນ, ປາກກາ, ສໍດຳ, ພັດລົມ, ໝໍ້ນ້ຳຮ້ອນ, ດອກໄຟຕ່າງໆ ແລະ ອຸປະກອນກີລາ ເຊັ່ນ: ຕານ່າງກະຕໍ້, ບານຕີ ແລະ ບານເຕະ. ນອກນັ້ນ, ຍັງໄດ້ມອບເຄື່ອງກີລາແກ່ນ້ອງໆນັກຮຽນຕື່ມອີກ.

ທ່ານ ວົງສີ ສະແຫວງສຸກ ຜູ້ອຳນວຍການໂຮງຮຽນປະຖົມສຶກສາສົມບູນອີ່ໄລ ເມືອງນາຊາຍທອງ ນະຄອນຫຼວງວຽງຈັນ ໄດ້ສະແດງຄວາມຂອບໃຈ, ດີໃຈ ແລະ ຮູ້ບຸນຄຸນມາຍັງກຸ່ມຕະຫຼາດທຶນລາວທີ່ໄດ້ກະຕຸກຊຸກຍູ້, ຊ່ວຍເຫຼືອ ແລະ ເຫັນເຖິງຄວາມສຳຄັນໃນການສະໜັບສະໜູນອຸປະກອນການສຶກສາ ແລະ ອຸະກອນກີລາຕ່າງໆໃຫ້ແກ່ທາງໂຮງຮຽນປະຖົມສຶກສາສົມບູນອີ່ໄລ ແຫ່ງນີ້.

ກິດຈະກຳດັ່ງກ່າວຈັດຂຶ້ນໃນວັນທີ 26 ກັນຍາ 2020 ຜ່ານມາ ຕາງໜ້າມອບໂດຍ ທ່ານ ທະນູສິດ ແສງມະນີພອນ ຮອງຫົວໜ້າພະແນກຈົດທະບຽນ ແລະ ເປີດເຜີຍຂໍ້ມູນ ແລະ ກ່າວຮັບໂດຍ ອາຈານ ວົງສີ ສະແຫວງສຸກ ຜູ້ອຳນວຍການໂຮງຮຽນປະຖົມສຶກສາສົມບູນອີ່ໄລ ພ້ອມດ້ວຍຄະນະພັດທະນາການສຶກສາຂັ້ນບ້ານ ແລະ ຄະນະບ້ານອີ່ໄລ.

ການຊ່ວຍເຫຼືອສັງຄົມໃນຄັ້ງນີ້ ຖືເປັນຂີດໝາຍອັນສຳຄັນຢ່າງໜຶ່ງໃນການສ້າງຄວາມສາມັກຄີພາຍໃນກຸ່ມຕະຫຼາດທຶນເອງ ແລະ ສ້າງຂະບວນການໃຫ້ຟົດຟື້ນ ເພື່ອຕ້ອນຮັບພິທີສະເຫຼີມສະຫຼອງວັນສ້າງຕັ້ງຕະຫຼາດທຶນລາວ ຄົບຮອບ 10 ປີ ຢ່າງສະຫງ່າງາມ.

[ ຂ່າວ – ຮູບ: ຕະຫຼາດຫຼັກຊັບລາວ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ