ຜາສາດຫີນ ຫຼື ເຮືອນຫີນ ເມືອງໄຊພູທອງ ແຂວງສະຫວັນນະເຂດ - Laoedaily

ຜາສາດຫີນ ຫຼື ເຮືອນຫີນ ເມືອງໄຊພູທອງ ແຂວງສະຫວັນນະເຂດ

ຜາສາດຫີນ ເປັນສະຖານທີ່ທ່ອງທ່ຽວທາງປະຫວັດສາດທີ່ໜ້າຄົ້ນຫາ ໂດຍຕາມການບອກເລົ່າປາກຕໍ່ປາກທີ່ສືບທອດກັນມາແຕ່ສະໄໝບູຮານ ແລະ ປຶ້ມນິທານທີ່ຕົກທອດມາແຕ່ປູ່ຍ່າຕາຍາຍ. ໃນນັ້ນ, ລຸງມະຫາກັນ ບ້ານເລົ່າໝາກຫູດ ເມືອງໄຊພູທອງ ທີ່ເປັນເຈົ້າກວານ – ເຈົ້າລ່າມ ຂອງເຮືອນຫີນບັນທຶກໄວ້ວ່າ: ຜາສາດຫີນແຫ່ງນີ້ສ້າງຂຶ້ນໃນປີ ຄ.ສ 557 ຫາ 700 ໂດຍຂຸນອັງຄະຣາດ ແລະ ອົມທະຣາດສອງອ້າຍນ້ອງ. ໃນສະໄໝອານາຈັກສີໂຄດຕະບູນຈະເລີນຮຸ່ງເຮືອງ ເພື່ອໃຊ້ເປັນສະຖານເຄົາລົບບູຊາໃນສາສະໜາພາມ.

ຜາສາດຫີນໄດ້ຮັບການປະຕິສັງຂອນເປັນ 3 ໄລຍະ ຄື: ໄລຍະທຳອິດສະໄໝຂອມເຮືອງອຳນາດ, ໄລຍະທີ 2 ສະໄໝເຈົ້າໄຊຍະເສດຖາທິລາດ ແຫ່ງອານາຈັກລາວລ້ານຊ້າງ ເປັນສະໄໝທີ່ສາສະໜາພຸດຈະເລີນຮຸ່ງເຮືອງ ແລະ ໄລຍະສຸດທ້າຍ ສະໄໝອານາຈັກລາວລ້ານຊ້າງເສຍເອກະລາດ.

ທຸກໆສ່ວນຂອງຜາສາດຫີນມີຂະໜາດແຕກຕ່າງກັນ ເຊິ່ງດ້ານທິດຕາເວັນອອກຂອງຜາສາດຫີນມີລານກວ້າງ 21ແມັດ ແລະ ຍາວ 24 ແມັດ; ດ້ານທິດຕາເວັນຕົກ ມີລານກວ້າງ 13,20 ແມັດ ແລະ ກວ້າງ 17,50 ແມັດ; ທິດເໜືອ ແລະ ທິດໃຕ້ຍາວ 85 ແມັດ. ສ່ວນບໍລິເວນທີ່ເປັນເຮືອນຍາວ 16,50 ແມັດ ນັບວ່າເປັນສະຖານທີ່ທ່ອງທ່ຽວທາງປະຫວັດສາດຂອງແຂວງສະຫວັນນະເຂດອີກແຫ່ງໜຶ່ງ ທີ່ຫຼາຍຄົນຢາກໄປທ່ຽວຊົມ ຄວາມງາມຂອງຜາສາດຫີນແຫ່ງນີ້ ເຊິ່ງໃນແຕ່ລະປີອົງການປົກຄອງເມືອງຮ່ວມກັບປະຊາຊົນບັນດາເຜົ່າພາຍໃນເມືອງ ໄດ້ຈັດງານບຸນນະມັດສະການຜາສາດຫີນຕາມຮີດຄອງປະເພນີໃນເດືອນ 4 ເພັງຂອງທຸກໆປີ.

( ເນື້ອໃນ – ຮູບ: ເດດອາລຸນ ແກ້ວວິໄລວົງ )

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ