ມາສເຕີ 7 ຕ້ອງລຶບຝັນຮ້າຍນັດວັດຄົມ ເອັສຣາ ອາທິດນີ້ໃຫ້ໄດ້ ບໍ່ດັ່ງນັ້ນການລຸ້ນແຊັມ ຈົບແນ່ນອນ - Laoedaily

ມາສເຕີ 7 ຕ້ອງລຶບຝັນຮ້າຍນັດວັດຄົມ ເອັສຣາ ອາທິດນີ້ໃຫ້ໄດ້ ບໍ່ດັ່ງນັ້ນການລຸ້ນແຊັມ ຈົບແນ່ນອນ

ຖືເປັນງານໜັກທີ່ສຸດສໍາລັບ ມາສເຕີ 7 ເອັຟຊີ ໃນເປບຊີ ລາວລີກ 1 ລະດູການນີ້ກໍວ່າໄດ້ ສໍາລັບນັດທ້າຍອາທິດນີ້ິ້ຕ້ອງພົບກັບ ເອັສຣາ ເອັຟຊີ ທີມທີ່ກໍາລັງມາແຮງສຸດໆ. ນັດນີ້ ມາສເຕີ 7 ເອັຟຊີ ຕ້ອງລຶບຝັນຮ້າຍໃຫ້ໄດ້ເພາະໃນຮອບຂາໄປຖືກ ເອັສຣາ ເອັຟຊີ ຕີສະເໝີທ້າຍເກມ ຈົນເຮັດໃຫ້ການລຸ້ນແຊັມກັບ ລາວໂຕໂຢຕ້າ ເອັຟຊີ ລໍາບາກ.

ມາສເຕີ 7 ເອັຟຊີ ປະສົບບັນຫາເລື່ອງນັກເຕະ ເນື່ອງຈາກນັກເຕະຕ່າງຊາດທີ່ລົງສະບຽນແມ່ນບໍ່ສາມາດເດີນທາງເຂົ້າມາປະເທດລາວໄດ້ ເນື່ອງຈາກສະພາບການລະບາດຂອງ ໂຄວິດ-19 ເຮັດໃຫ້ຮູບເກມຂອງ ມາສເຕີ 7 ເອັຟຊີ ມີບັນຫາ ເຖິງວ່າຈະເປັນທີມທີ່ຍິງປະຕູໄດ້ຫຼາຍທີ່ສຸດຈາກ 9 ນັດທີ່ຜ່ານມາຍິງໄດ້ 24 ປະຕູ ແຕ່ກໍກາຍເປັນທີມທີ່ມັກເສຍປະຕູກ່ອນຄູ່ແຂ່ງ ໂດຍເສຍໄປແລ້ວ 12 ປະຕູຈາກ 9 ນັດ ເຊິ່ງຊະນະໄດ້ 5 ແລະ ສະເໝີ 4 ນັດ ເຊິ່ງທຽບກັບ ແຊັມເກົ່າ ລາວໂຕໂຢຕ້າ ເອັຟຊີ ທີ່ເສຍພຽງພຽງ 4 ປະຕູ ແລະ ຍິງໄດ້ 23 ປະຕູ ໂດຍຊະນະໄດ້ 7 ແລະ ສະເໝີ 2 ນັດ ເຮັດໃຫ້ ມາສເຕີ 7 ເອັຟຊີ ຕ້ອງຕາມຫຼັງເຖິງ 4 ຄະແນນທັງທີ່ເຫຼືອການແຂ່ງຂັນພຽງ 3 ນັດ.

ແນ່ນອນວ່ານັດທ້າຍອາທິດນີ້ ມາສເຕີ 7 ເອັຟຊີ ຕ້ອງຊະນະໃຫ້ໄດ້ ເພື່ອຕໍ່ຍອດການລຸ້ນແຊັມ ເພາະຖ້າຫາກເສຍ ຫຼື ສະເໝີແມ່ນ ໂອກາດປ້ອງກັນແຊັມຂອງ ລາວໂຕໂຢຕ້າ ເອັຟຊີ ກໍຈະເປັ່ງປະກາຍທັນທີ. ທັງນີ້ ມາສເຕີ 7 ເອັຟຊີ ຕ້ອງເຮັດວຽກບ້ານໃຫ້ໜັກ ເພາະນັກເຕະຕົວສໍາຮອງແມ່ນຍັງທົດແທນກັນບໍ່ໄດ້ດີເທົ່າທີ່ຄວນສະແດງອອກໃນນັດຫຼ້າສຸດທີ່ພົບກັບ ກະຣູດາ ເອັຟຊີ ທີມຈາກລາວລີກ 2 ໃນບານເຕະຊີງຂັນ ສຕລ ເຫັນບັນຫາຫຼາຍໆຢ່າງ ໂດຍສະເພາະເກມຮັບມີບັນຫາຈົນຕ້ອງເສຍ 2 ປະຕູກ່ອນ, ກ່ອນທີ່ເຄິ່ງຫຼັງຈະປັບເກມເອົາຕົວຈິງລົງຈິ່ງສາມາດພິກຊະນະໄດ້ທ້າຍເກມ 4-3. ນອກນັ້ນ, ນັດນີ້ ມາສເຕີ 7 ເອັຟຊີ ຕ້ອງລຸ້ນເບິ່ງອາການບາດເຈັບຂອງ ມະໂນລົມ ເພັດພັກດີ ກອງກາງຄົນສໍາຄັນວ່າຈະລົງສະໜາມໄດ້ບໍ ສ່ວນຄົນອື່ນພ້ອມລົງ.

ສ່ວນ ເອັສຣາ ເອັຟຊີ ບອກເລີຍວ່າຍິ່ງຫຼິ້ນຍິ່ງໂດດເດັ່ນ ເຊິ່ງສະແດງອອກໃນນັດກ່ອນໜ້ານີ້ ເຖິງຈະເສຍໃຫ້ກັບ ແຊັມເກົ່າ ລາວໂຕໂຢຕ້າ ເອັຟຊີ 0-4 ແຕ່ເກມບໍໄດ້ເປັນຮອງສາມາດພັບເດີ່ນໃສ່ແຊັມເກົ່າໃນໄລຍະເຄິ່ງເວລາທີ 2 ເຊິ່ງເຫັນແລ້ວໜ້າປະທັບໃຈທີ່ສ້າງຄວາມໜັກໃຈໃຫ້ກັບແຊັມເກົ່າໄດ້ຕະຫຼອດເກມ ແຕ່ອັນທີ່ ເອັສຣາ ເອັຟຊີ ຍັງຂາດຫາຍຄືປະສົບການ ເພາະເປັນນັກເຕະໜ້າໃໝ່ຫຼາຍຄົນ ໂດຍມັນສະແດງໃຫ້ເຫັນຄື ເອັສຣາ ເອັຟຊີ ຈະມັກເສຍປະຕູໃນ 5 ນາທີທໍາອິດ ແລະ 5 ນາທີສຸດທ້າຍຂອງການແຂ່ງຂັນ ເພາະນັດທີ່ເສຍໃຫ້ກັບ ລາວໂຕໂຢຕ້າ ເອັຟຊີ 0-4 ແມ່ນເສຍປະຕູທໍາອິດໃນ 5 ນາທີທໍາອິດ ແລະ ເສຍ 3 ປະຕູໃນ 5 ນາທີສຸດທ້າຍທັງທີ່ເກມເໜືອກວ່າ.

ສໍາລັບທ້າຍອາທິດນີ້ແມ່ນແຂ່ງຂັນກັນ 3 ຄູ່ທີ່ສະໜາມກີລາແຫ່ງຊາດ ຫຼັກ 16 ໂດຍເລື່ອນມາແຂ່ງຂັນເວລາ 15:00 ໂມງທັງໝົດ ປະກອບມີມາສເຕີ 7 ເອັຟຊີ ຈະໄດ້ຫຼິ້ນໃນຖານະທີມນອກບ້ານພົບກັບ ເອັສຣາ ເອັຟຊີ ໃນວັນທີ 26 ກັນຍາ 2020 ທີ່ສະໜາມນອກ ເຊິ່ງເປັນນັດທີ່ສໍາຄັນທີ່ສຸດ ເພາະຖ້າບໍ່ຊະນະໄດ້ ຕ້ອງຍອມຮັບວ່າແຊັມຈະຕົກເປັນຂອງ ລາວໂຕໂຢຕ້າ ເອັຟຊີ ແນ່ນອນ ເພາະປັດຈຸບັນຫ່າງກັນເຖິງ 4 ຄະແນນ ຍັງເຫຼືອພຽງ 3 ນັດ, ສ່ວນອີກຄູ່ໜຶ່ງໃນວັນດັ່ງກ່າວ ຊ້າງນ້ອຍ ພົບກັບ ປກສ ເອັຟຊີ ທີ່ສະໜາມໃນ

ຂະນະທີ່ ລາວໂຕໂຢຕ້າ ເອັຟຊີ ນັດທ້າຍອາທິດນີ້ໜ້າຈະບໍ່ມີບັນຫາໃນການເກັບໄຊຊະນະໄດ້ ໂດຍຈະພົບກັບ ວຽງຈັນ ເອັຟທີ ທີມອັນດັບສຸດທ້າຍຂອງຕາຕະລາງຄະແນນລວມຈາກສະເໝີ 2 ແລະ ເສຍ 7 ນັດ ໃນວັນທີ 27 ກັນຍາ 2020 ເວລາ 16:00 ໂມງທີ່ສະໜາມໃນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ