ສຳນັກຂ່າວຕ່າງປະເທດລາຍງານວ່າ: ກອງປະຊຸມສະມັດຊາໃຫຍ່ແຫ່ງສະຫະປະຊາຊາດຄັ້ງທີ 75 ເຊິ່ງເປັນກອງປະຊຸມແບບທາງໄກ ຈັດຂຶ້ນໃນວັນທີ 22 ກັນຍາຜ່ານມານີ້ ເຊິ່ງຜູ້ນຳໂລກໄດ້ສົ່ງຄລິບວິດີໂອຄຳປາໄສມາເປີດຢູ່ກອງປະຊຸມ.
ກອງປະຊຸມສຸດຍອດຜູ້ນຳໂລກຄັ້ງນີ້ ເລີ່ມຕົ້ນດ້ວຍຖະແຫຼງການຂອງ ທ່ານ ອັນໂຕນີໂອ ກູເຕເຣສ ເລຂາທິການ ສະຫະປະຊາຊາດ ເຊິ່ງກ່າວຢ້ຳວ່າພວກເຮົາຄວນເຮັດທຸກຢ່າງ ເພື່ອປ້ອງກັນບໍ່ໃຫ້ເກີດສົງຄາມເຢັນຂຶ້ນອີກຮອບໃໝ່ ແຕ່ບໍ່ໄດ້ລະບຸເຖິງສະຫະລັດ ຫຼື ຈີນ ແຕ່ຢ່າງໃດ.
ເລຂາທິການ ສປຊ ຍັງໄດ້ກ່າວເຖິງຄວາມຂັດແຍ່ງລະຫວ່າງສອງຊາດມະຫາອຳນາດດ້ານເສດຖະກິດທີ່ເຄັ່ງຕຶງຂຶ້ນນັບມື້. ໃນຂະນະທີ່ປະທານາທິບໍດີ ໂດນັລ ທຣຳ ຂອງສະຫະລັດອາເມຣິກາ ໄດ້ຕຳໜິ ສປ ຈີນ ກ່ຽວກັບການແຜ່ລະບາດຂອງພະຍາດໂຄວິດ – 19 ໂດຍຮຽກຮ້ອງໃຫ້ສະຫະປະຊາຊາດເອົາຜິດກັບຈີນ.
ໃນຂະນະທີ່ ທ່ານ ສີ ຈິ້ນຜິງ ປະທານປະເທດຈີນ ກ່າວວ່າ: ພວກເຮົາຈະຫຼຸດ ຄວາມແຕກໂຕນ ແລະ ແກ້ໄຂບັນຫາຄວາມຂັດແຍ່ງດ້ວຍການເຈລະຈາ ແລະ ຫາທາງພັດທະນາຮ່ວມກັນ. ນອກຈາກຜູ້ນຳຈີນ ແລະ ສະຫະລັດແລ້ວຍັງມີຜູ້ນຳອີກຫຼາຍປະເທດທີ່ກ່າວປາໄສຕໍ່ກອງປະຊຸມ ໂດຍປະທານາທິບໍດີ ວະລາດີເມຍ ປູຕິນ ຂອງຣັດເຊຍ ກ່າວວ່າ: ພວກເຮົາຕ້ອງຈັດກອງປະຊຸມທາງໄກໃຫ້ໄວທີ່ສຸດ ເພື່ອປຶກສາຫາລືກ່ຽວກັບການຮ່ວມມືເລື່ອງວັກແຊັງທົ່ວໂລກ ແລະ ການສົ່ງມອບວັກແຊັງເຫຼົ່ານັ້ນ.
