ການຂຶ້ນທະບຽນເລກໝາຍໂທລະສັບໃນລາວ ແມ່ນຕ້ອງໄດ້ເຮັດກັນຢ່າງສະເໝີພາບທັງບຸກຄົນ ແລະ ນິຕິບຸກຄົນ ລວມທັງການຈັດຕັ້ງຕ່າງໆທັງພາຍໃນ ແລະ ຕ່າງປະເທດທີ່ຕັ້ງຢູ່ລາວ.
ໃນບົດຄວາມຜ່ານມາ ເຮົາກໍໄດ້ສະເໜີໃຫ້ຮູ້ໄປແລ້ວກ່ຽວກັບການຂຶ້ນທະບຽນເລກໝາຍໂທລະສັບ ຫຼື ເວົ້າກັນຢ່າງງ່າຍໆກໍແມ່ນຂຶ້ນທະບຽນຊິມສຳ ລັບຜູ້ໃຊ້ທີ່ເປັນບຸກຄົນທົ່ວໄປ, ໃນບົດ ຄວາມນີ້ເຮົາຈະມານຳສະເໜີວິທີການສຳລັບນິຕິບຸກຄົນ ( ບໍລິສັດ ແລະ ການຈັດຕັ້ງຕ່າງໆ ).
- ຂຶ້ນທະບຽນໄດ້ຢູ່ໃສ?
ສຳລັບນິຕິບຸກຄົນ ແລະ ອົງການການຈັດຕັ້ງ ສາມາດຂຶ້ນທະບຽນໄດ້ທີ່ສຳນັກງານໃຫຍ່ ຫຼື ສາຂາຂອງຜູ້ໃຫ້ບໍລິການເທົ່ານັ້ນ ແລະ ບໍ່ສາມາດໄປຂຶ້ນທະບຽນນຳຕົວແທນຈຳໜ່າຍຊິມ ຫຼື ຜ່ານແອັບພລິເຄເຊິນ LaoKYC ຄືກັບຜູ້ໃຊ້ແບບບຸກຄົນທົ່ວໄປ. -
ເສຍຄ່າທຳນຽມ ຫຼື ຄ່າບໍລິການຫຍັງບໍ່?
ອີງຕາມຂໍ້ຕົກລົງຂອງກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ກຳນົດໄວ້ວ່າ: ການຂຶ້ນທະບຽນເລກໝາຍໂທລະສັບ ແມ່ນຮັບປະກັນບໍ່ເຮັດໃຫ້ເກີດລາຍຈ່າຍເພີ່ມຕື່ມໃດໆ ເຊິ່ງນີ້ໝາຍຄວາມວ່າບໍ່ໄດ້ເສຍເງິນຫຍັງ.
- ເອກະສານການຂຶ້ນທະບຽນມີຫຍັງແດ່?
ນິຕິບຸກຄົນຕ້ອງປະກອບເອກະສານດັ່ງນີ້:
- ໜັງສືມອບສິດຂຶ້ນທະບຽນໝາຍເລກໂທລະສັບຈາກຜູ້ອຳນວຍການບໍລິສັດ
- ສຳເນົາໃບທະບຽນວິສາຫະກິດ ແລະ ໃບທະບຽນອາກອນ
- ແຈ້ງລາຍການເລກໝາຍໂທລະສັບ ພ້ອມຂໍ້ມູນຜູ້ທີ່ຈະນຳໃຊ້ໃຫ້ຄົບຖ້ວນ ປະກອບມີ: ຊື່, ນາມສະກຸນ, ວັນເດືອນປີເກີດ, ທີ່ຢູ່ ແລະ ຮູບຖ່າຍຕົວຈິງ.
- ເອກະສານໃດໜຶ່ງຂອງອຳນວຍການບໍລິສັດທີ່ມອບສິດຂຶ້ນທະບຽນເລກໝາຍໂທລະສັບ ເຊັ່ນ: ບັດປະຈຳຕົວ, ສຳມະໂນຄົວ, ໜັງສືຜ່ານແດນ, ພ້ອມຮູບຖ່າຍຂອງຜູ້ອຳນວຍການຂະໜາດ 3×4.
- ເອກະສານອື່ນໆຕາມການກຳນົດຂອງກະຊວງໄປສະນີ, ໂທລະຄົມມະນາຄົມ ແລະ ການສື່ສານ.
- ອົງການຈັດຕັ້ງຕ້ອງປະກອບເອກະສານດັ່ງນີ້:
- ໜັງສືສະເໜີຢ່າງເປັນທາງການຈາກອົງການຈັດຕັ້ງ
- ແຈ້ງລາຍການເລກໝາຍໂທລະສັບ ພ້ອມຂໍ້ມູນຜູ້ທີ່ຈະນຳໃຊ້ໃຫ້ຄົບຖ້ວນ ປະກອບມີ: ຊື່, ນາມສະກຸນ, ວັນເດືອນປີເກີດ, ທີ່ຢູ່, ຮູບຖ່າຍຕົວຈິງ.
- ເອກະສານໃດໜຶ່ງຂອງຫົວໜ້າອົງການຈັດຕັ້ງທີ່ມອບສິດຂຶ້ນທະບຽນເລກໝາຍໂທລະສັບ ເຊັ່ນ: ບັດປະຈຳຕົວ, ສຳມະໂນຄົວ, ໜັງສືຜ່ານແດນ, ພ້ອມຮູບຖ່າຍຂອງຜູ້ອຳນວຍການຂະໜາດ 3×4.
- ເອກະສານອື່ນໆຕາມການກຳນົດຂອງກະຊວງໄປສະນີ, ໂທລະຄົມມະນາຄົມ ແລະ ການສື່ສານ.
- ທັງນີ້, ໃນເວລາໄປຂຶ້ນທະບຽນໃຫ້ຖືເອກະສານສະບັບແທ້ໄປນຳເພື່ອຢັ້ງຢືນ ແລະ ເອົາກັບຄືນເມື່ອຂຶ້ນທະບຽນສຳເລັດແລ້ວ ປະໄວ້ພຽງແຕ່ເອກະສານສະບັບສຳເນົາ.
- ຂຶ້ນທະບຽນໄດ້ຫຼາຍສໍ່າໃດ?
ສຳລັບນິຕິບຸກຄົນ ຫຼື ການຈັດຕັ້ງ ສາມາດຂຶ້ນທະບຽນເລກໝາຍໂທລະສັບໄດ້ບໍ່ເກີນ 50 ເລກໝາຍ; ກໍລະນີຂຶ້ນທະບຽນໃຫ້ບຸກຄົນໃນອົງການຈັດຕັ້ງຂອງຕົນເອງໃຊ້. ກໍລະນີ ຂຶ້ນທະບຽນເລກໝາຍ ເພື່ອນຳໃຊ້ໃນອຸປະກອນຂອງອົງການຈັດຕັ້ງຕົນເອງແມ່ນບໍ່ເກີນ 100 ເລກໝາຍ. ຖ້າຕ້ອງການຂຶ້ນທະບຽນຫຼາຍກວ່ານີ້ແມ່ນຕ້ອງສະເໜີຕໍ່ຂະແໜງການໄປສະນີ, ໂທລະຄົມມະນາຄົມ ແລະ ການສື່ສານເພີ່ມຕື່ມເພື່ອພິຈາລະນາ.
( ທີ່ມາ: http://laoofficialgazette.gov.la )
