ອຄ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ - Laoedaily

ອຄ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ

ກະຊວງອຸດສາຫະກຳ ແລະ ການຄ້າ ( ອຄ ) ໄດ້ຈັດພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ຊຸດທີ VIII ປີ 2020 ໃຫ້ສະມາຊິກພັກ – ພະນັກງານກະຊວງ ອຄ ຂຶ້ນໃນວັນທີ 21ກັນຍາ 2020 ທີ່ສະຖາບັນ   ຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ເຂັມມະນີ ພົນເສນາ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ອຄ, ທ່ານ ສະໜຸດທອງ ສົມພານິດ ຄະນະພັກ, ຮອງຫົວໜ້າສະຖາບັນການເມືອງການປົກຄອງແຫ່ງຊາດ, ມີສະມາຊິກພັກ ແລະ ພະນັກງານນັກຝຶກອົບຮົມຂອງກະຊວງເຂົ້າຮ່ວມ ທັງໝົດ 45 ທ່ານ.

ທ່ານ ດາວເພັດ ເມືອງພວນທອງ ຫົວໜ້າພະແນກ, ກົມຈັດຕັ້ງ ແລະ ພະນັກງານ ກະຊວງ ອຄ ໄດ້ຜ່ານຂໍ້ຕົກລົງ ແລະ ກ່າວຈຸດປະສົງໃນການຈັດຊຸດຝຶກອົບຮົມໃນຄັ້ງນີ້ ວ່າ:

  1. ເພື່ອຍົກລະດັບຄວາມຮູ້ທາງດ້ານທິດສະດີ, ຫຼັກການ ແລະ ພຶດຕິກຳ ໃຫ້ແກ່ຖັນແຖວສະມາຊິກພັກ – ພະນັກງານ.
  2. ເພື່ອໃຫ້ບັນດາສະຫາຍໄດ້ຄົ້ນຄວ້າທົບທວນ, ຕີລາຄາຄືນກ່ຽວກັບພຶດຕິກໍາໃນການໝູນໃຊ້ທິດສະດີເຂົ້າໃນການປະຕິບັດໜ້າທີ່ວຽກງານໃນໄລຍະຜ່ານມາ ມີຄວາມສອດຄ່ອງກົມກຽວ ແລະ ເໝາະສົມກັບສະພາບເງື່ອນໄຂ ແລະ ຈຸດພິເສດຂອງປະເທດເຮົາແນວໃດ, ດ້ານໃດຄວນໄດ້ຍົກສູງ ແລະ ປັບປຸງແກ້ໄຂ.
  3. ເພື່ອຍົກສູງຄວາມຮູ້ – ຄວາມສາມາດຂອງສະມາຊິກພັກ – ພະນັກງານໃຫ້ມີຄວາມໜັກແໜ້ນເຂັ້ມແຂງ ສາມາດປະຕິບັດພາລະບົດບາດເປັນເສນາທິການໃຫ້ແກ່ຄະນະພັກ – ຄະນະນຳຂັ້ນຂອງຕົນຢ່າງມີປະສິດທິຜົນສູງກວ່າເກົ່າ.

ທ່ານ ນາງ ເຂັມມະນີ ພົນເສນາ ກ່າວວ່າ: ຊຸດຝຶກອົບຮົມໃນຄັ້ງນີ້ເປັນເວທີ ແລະ ໂອກາດສຳຄັນທີ່ອາຈານສອນ ແລະ ຜູ້ເຂົ້າຮ່ວມຝຶກອົບຮົມຈະໄດ້ປຶກສາຫາລືສົນທະນາຮ່ວມກັນກ່ຽວກັບບັນຫາຕ່າງໆທາງດ້ານທິດສະດີ ແລະ ພຶດຕິກຳ, ເອົາທິດສະດີມາເຍືອງໃສ່ພຶດຕິກຳ ແລະ ເອົາພຶດຕິກຳມາປັບປຸງທິດສະດີໃຫ້ດີຂຶ້ນເລື້ອຍໆ.

ເພື່ອເຮັດໃຫ້ບັນລຸຈຸດປະສົງ, ລະດັບຄາດໝາຍ ສະເໜີໃຫ້ບັນດານັກຝຶກອົບຮົມທຸກຄົນ ຈົ່ງພ້ອມກັນເອົາໃຈໃສ່ກໍາແໜ້ນຈຸດປະສົງ, ລະດັບຄາດໝາຍ ແລະ ຄວາມສໍາຄັນຂອງການຄົ້ນຄວ້າຮ່ຳຮຽນເທື່ອນີ້, ຕັ້ງໜ້າຄົ້ນຄວ້າຮ່ຳຮຽນ, ກຳແໜ້ນບັນດາເນື້ອໃນຂອງຫຼັກສູດທັງໝົດນັບທັງພາກທິດສະດີ, ແນວທາງນະໂຍບາຍຂອງພັກ ເພື່ອຈໍາແນກໃຫ້ໄດ້ອັນຖືກ, ອັນຜິດ ແລະ ຊອກໃຫ້ເຫັນຈຸດທີ່ຈະຕ້ອງໄດ້ປັບປຸງແກ້ໄຂໃນຕໍ່ໜ້າ, ເອົາໃຈໃສ່ຄົ້ນຄວ້າເອກະສານແຕ່ລະບົດໃຫ້ລະອຽດເລິກເຊິ່ງ, ຊອກໃຫ້ເຫັນບັນດາບັນຫາທີ່ຕົນເອງສົນໃຈ ເພື່ອນໍາມາສົນທະນາແລກປ່ຽນຄໍາຄິດເຫັນນຳຄູ – ອາຈານ ແລະ ຮ່ຳຮຽນດ້ວຍຕົນເອງ, ຕ້ອງສົມທົບແໜ້ນລະຫວ່າງການຄົ້ນຄວ້າດ້ວຍຕົນເອງ, ຕັ້ງໃຈຟັງການອະທິບາຍຂອງຄູ – ອາຈານ ແລະ ແລກປ່ຽນຄຳຄິດເຫັນຢ່າງກວ້າງຂວາງກັບເພື່ອນສະຫາຍດ້ວຍກັນຢ່າງມີຫຼັກການ; ຄົ້ນຄວ້າແລກປ່ຽນບົດຮຽນເຊິ່ງກັນ ແລະ ກັນ, ໃຫ້ມີການເລືອກຕັ້ງຄະນະຫ້ອງຕາມຈຳນວນທີ່ເໝາະສົມເພື່ອນຳພາ, ຄວບຄຸມການເຄື່ອນໄຫວຕະຫຼອດໄລຍະການຝຶກອົບຮົມຮົມ ແລະ ໃຫ້ສຳເລັດຢ່າງມີປະສິດທິຜົນ ເພື່ອນຳເອົາບົດຮຽນໄປໝູນໃຊ້ເຂົ້າໃນການເຄື່ອນໄຫວວຽກງານຕົວຈິງ ກໍຄືການປະຕິບັດໜ້າທີ່ການເມືອງທີ່ການຈັດຕັ້ງມອບໝາຍໃຫ້ຢ່າງມີປະສິດທິຜົນກວ່າເກົ່າ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ