ຕາມຄາດ!ສະຫາຍ ເລັດ ໄຊຍະພອນ ໄດ້ຮັບເລືອກເປັນເລຂາຄະນະບໍລິຫານງານພັກແຂວງອັດຕະປື ອີກສະໄໝ - Laoedaily

ຕາມຄາດ!ສະຫາຍ ເລັດ ໄຊຍະພອນ ໄດ້ຮັບເລືອກເປັນເລຂາຄະນະບໍລິຫານງານພັກແຂວງອັດຕະປື ອີກສະໄໝ

ກອງປະຊຸມໃຫຍ່ ຄັ້ງທີ XI ຂອງອົງຄະນະພັກ ແຂວງ ອັດຕະປື ຈັດຂຶ້ນໃນລະຫວ່າງວັນທີ 17-18 ກັນຍາ 2020 ໂດຍເປັນກຽດເຂົ້າຮ່ວມຂອງ ສະຫາຍ ໄຊສົມພອນ ພົມ ວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ.

ຕະຫລອດໄລຍະເວລາ 2 ວັນ ຜູ້ແທນສົມບູນ ໄດ້ຕີລາຄາ ແລະ ຮັບຮອງເອົາບົດລາຍງານການເມືອງຂອງກອງປະຊຸມທີ່ຍົກໃຫ້ເຫັນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ອົງຄະນະພັກແຂວງ ໃນໄລຍະ 5 ປີ ຜ່ານມາ ກໍຄື ແຜນພັດທະນາ ເສດຖະກິດ-ສັງຄົມ 5 ປີ ຄັ້້ງທີ IX ເຫັນໄດ້ວ່າ ເສດຖະກິດ-ສັງຄົມໄດ້ຮັບການພັດນາຢ່າງຕໍ່ເນື່ອງ GDP ເພີ່ມຂຶ້ນ 7,5% ຕໍ່ປີ, ສະເລ່ຍຕໍ່ຫົວຄົນບັນລຸໄດ້ 2.011 ໂດລາ, ທຽບໃສ່ປີ 2015 ເພີ່ມຂຶ້ນ 13,6% ພ້ອມນີ້ຍັງໄດ້ຮັບຮອງເອົາທິດທາງແຜນການພັດທະນາເສດຖະກິດ-ສັງຄົມ 5 ປີ 2020-2024 ຂອງຄະນະບໍລິ ຫານງານພັກແຂວງ ສະໄໝທີ XI ແລະ ຜ່ານບົດສໍາຫລວດການນໍາພາລວມ ຂອງຄະນະບໍລິຫານງານພັກແຂວງ ຊຸດເກົ່າ ຄືສະໄໝທີ X.

ກອງປະຊຸມ ໄດ້ດໍາເນີນການປ່ອນບັດເລືອກຕັ້ງເອົາຄະ ນະບໍລິຫານງານພັກ ແຂວງ ອັດຕະປື ຊຸດໃໝ່ ຈຳນວນ 33 ສະຫາຍ, ຍິງ 5 ສະຫາຍ ຈາກຜູ້ລົງສະຫມັກທັງຫມົດ 38 ສະຫາຍ, ຍິງ 5 ສະຫາຍ.

ກອງປະຊຸມຄັ້ງປະຖົມມະລືກຂອງຄະນະບໍລິຫານງານພັກແຂວງ ອັດຕະປື ຄັ້ງທີ XI ໄດ້ເລືອກຕັ້ງເອົາຄະນະປະຈຳພັກແຂວງ 11 ສະຫາຍ, ຍິງ 2 ສະຫາຍ ໂດຍໄດ້ເຫັນດີເປັນເອກະພາບເລືອກເອົາ ສະຫາຍ ເລັດ ໄຊຍະພອນ ເປັນເລຂາຄະນະບໍລິຫານງານພັກແຂວງຊຸດໃຫມ່ ສະຫາຍ ນາງ ມີນາພອນ ໄຊສົມພູ, ສະຫາຍ ບຸນຮຽນ ແກ້ວບົວພາດ ເປັນຮອງເລຂາຄະນະບໍລິຫານງານພັກແຂວງ ແລະ ໄດ້ເລືອກຕັ້ງເອົາ ສະຫາຍ ຄຳຫວັນ ຈັນທະໂຄດ ເປັນປະທານຄະນະກວດກາ, ສະຫາຍ ຈິດປະສົງ ສິງສະຫວັດ, ສະຫາຍ ມີໄຊ ສີສະເເຫວງສຸກ ແລະ ສະຫາຍ ວິໄລພອນ ເປັນຮອງປະທານຄະນະກວດກາ.

ພ້ອມນັ້ນ, ກອງປະຊຸມຍັງໄດ້ປ່ອນບັດເລືອກເອົາຜູ້ ແທນສົມບູນໄປເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງສູນກາງພັກ ທີ່ຈະຈັດຂຶ້ນໃນຕໍ່ໜ້າຈໍານວນ 16 ສະຫາຍແລະ ຜູ້ແທນສຳຮອງ 2 ສະຫາຍ.

Cr: ໄພບູນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ