6 ເດືອນຕົ້ນປີ ກອງຄຸ້ມຄອງພາສີ IV ເກັບລາຍຮັບໄດ້ 46,39% - Laoedaily

6 ເດືອນຕົ້ນປີ ກອງຄຸ້ມຄອງພາສີ IV ເກັບລາຍຮັບໄດ້ 46,39%

ປີ 2020 ກອງຄຸ້ມຄອງພາສີ IV ແຂວງຊຽງຂວາງ ໄດ້ຮັບຕົວເລກເກັບລາຍຮັບໃນແຜນການເບື້ອງຕົ້ນທັງໝົດ 94,50 ຕື້ກີບ, ແຜນດັດແກ້ 89,05 ຕື້ກີບ. ຜ່ານການຈັດຕັ້ງປະຕິບັດວຽກງານຕົວຈິງໃນ 6 ເດືອນຕົ້ນປີ 2020 ປະຕິບັດໄດ້ 41,31 ຕື້ ກວ່າກີບ ເທົ່າກັບ 43,72% ຂອງແຜນການປີ ເທົ່າກັບ 46,39% ຂອງແຜນດັດແກ້.

ພາບປະກອບຂ່າວເທົ່ານັ້ນ

ທ່ານ ບຸນມີ ສີພາວອນ ຫົວ ໜ້າກອງຄຸ້ມຄອງພາສີ IV ແຂວງຊຽງຂວາງ ໄດ້ລາຍງານຕໍ່ຄະນະວິຊາການຂອງກະຊວງການເງິນ ລົງເຄື່ອນໄຫວຊຸກຍູ້, ຕິດຕາມ – ກວດກາການຈັດຕັ້ງປະຕິບັດວຽກງານງົບປະມານ 6 ເດືອນຕົ້ນປີ ແລະ ແຜນດັດແກ້ 6 ເດືອນທ້າຍປີ 2020 ນຳໂດຍ ທ່ານ ຈອມສະຫວັນ ວົງໄຊ ຫົວໜ້າຂະແໜງກວດກາ ແລະ ສືບສວນ, ພະແນກສືບສວນ – ສອບສວນ ແລະ ປາບປາມການລັກລອບໜີພາສີ ແລະ ທ່ານ ແສງປະເສີດ ແພງຍະລາດ ວິຊາການກົມພາສີ ພ້ອມດ້ວຍ ທ່ານ ກ້ອນແກ້ວ ເທບພະວົງ ຫົວໜ້າດ່ານພາສີສາກົນນໍ້າກັ່ນ ພ້ອມດ້ວຍພະນັກງານຫຼັກແຫຼ່ງຂະແໜງພາສີເຂົ້າຮ່ວມ.

ເວົ້າສະເພາະການເກັບລາຍຮັບກອງຄຸ້ມຄອງພາສີ IV ແຂວງ ຊຽງຂວາງ ໄດ້ຮັບຕົວເລກແຜນການເບື້ອງຕົ້ນທັງໝົດ 94,50 ຕື້ກີບ, ແຜນດັດແກ້ 89,05 ຕື້ກີບ,ຜ່ານການຈັດຕັ້ງປະຕິບັດວຽກງານໃນ 6 ເດືອນຕົ້ນປີ 2020 ສາມາດຈັດເກັບລາຍຮັບເຂົ້າງົບປະມານໄດ້ 41,31 ຕື້ກວ່າກີບ ເທົ່າກັບ 43,72% ຂອງແຜນການປີ ເທົ່າກັບ 46,39% ຂອງແຜນດັດແກ້.

ຫຼັງຈາກນັ້ນ, ຄະນະທີມງານຈາກກົມພາສີ ໄດ້ກວດກາຂັ້ນຕອນ ແລະ ເອກະສານແກ້ໄຂການເສຍພາສີລົດນຳເຂົ້າບໍ່ຖືກຕ້ອງຕາມແຈ້ງການເລກທີ 1984/ກງ ຈຳນວນ 35 ຄັນ ເຫັນວ່າຖືກຕ້ອງ ແລະ ສອດຄ່ອງຕາມລະບຽບການ, ໄດ້ສົມທົບກັບກອງຄຸ້ມຄອງພາສີ IV ລົງກວດກາສາງນໍ້າມັນເຊື້ອໄຟຂອງ 2 ບໍລິສັດ ຄື: ລັດວິສາຫະກິດນໍ້າມັນເຊື້ອໄຟລາວ ແລະ ບໍລິສັດ ເປໂທຣລີແມ໋ກລາວ.

ພາບປະກອບຂ່າວເທົ່ານັ້ນ

ພ້ອມນັ້ນ, ຄະນະທີມກົມພາສີຍັງໄດ້ແນະນຳບັນດາໜ້າວຽກ ຄື: ການຂຸດຄົ້ນແຫຼ່ງລາຍຮັບທີ່ບົ່ມຊ້ອນ ໂດຍສະເພາະແມ່ນເລັ່ງແກ້ໄຂພາຫະນະນຳເຂົ້າບໍ່ຖືກຕ້ອງທີ່ຈັບກຸມໄດ້ ຈຳນວນ 5 ຄັນ ແລະ ລົດນຳເຂົ້າບໍ່ຖືກຕ້ອງທີ່ມີບັນຊີຂອງ ປກສ ແຂວງ ຈຳນວນ 106 ຄັນ, ຫ້ອງວ່າການປົກຄອງແຂວງ ຈຳນວນ 34 ຄັນ ໃຫ້ສຳເລັດ, ການຄຸ້ມຄອງການນຳເຂົ້າສິນຄ້າປະເພດນໍ້າມັນເຊື້ອໄຟທີ່ເສຍພາສີເຂົ້າມາໃຫ້ຖືກຕ້ອງຕາມລະບຽບການ, ການຄຸ້ມຄອງການນຳເຂົ້າສິນຄ້າ, ເຄື່ອງຂອງບັນດາໂຄງການຕ່າງໆທີ່ໄດ້ຮັບນະໂຍບາຍສົ່ງເສີມການລົງທຶນ ເປັນຕົ້ນແມ່ນການປະສານງານກັນລະຫວ່າງຕົ້ນທາງກັບປາຍທາງ ແລະ ໃຫ້ສົມທົບກັບຂະແໜງອາກອນໃນການກວດກາສິນຄ້າລົງສາງປາຍທາງ.

( ເນື້ອໃນ – ຮູບ: ອາພັດສະລາ )[ ຂ່າວ: ສົມສະຫວິນ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ