ສຳນັກຂ່າວຣອຍເຕີ ລາຍງານເມື່ອວັນທີ 1 ກັນຍາໃຫ້ຮູ້ວ່າ: ເຟສບຸ໊ກປະກາດຈະຢຸດບໍລິການເນື້ອໃນຂ່າວຢູ່ປະເທດອົສຕຣາລີ ເທິງແພຼັດຟອມຂອງເຟສບຸ໊ກ ຫາກກົດໝາຍໃໝ່ບັງຄັບໃຫ້ ເຟສບຸ໊ກຕ້ອງຈ່າຍເງິນໃຫ້ກັບສື່ໃນອົສຕຣາລີ ເພື່ອເປັນຄ່າຕອບແທນທີ່ໃຊ້ເນື້ອໃນຂ່າວຂອງສື່ເຫຼົ່ານັ້ນ ເຊິ່ງອົສຕຣາລີຈະກາຍເປັນປະເທດທຳອິດທີ່ສື່ສັງຄົມອອນລາຍຢ່າງເຟສບຸ໊ກ ແລະ ກູເກິລ ຕ້ອງຈ່າຍເງິນໃຫ້ແກ່ສື່ທ້ອງຖິ່ນທີ່ເອົາເນື້ອໃນຂ່າວໄປລົງໃນເຟສບຸ໊ກ ແລະ ກູເກິລ.
ທັງນີ້, ເຟສບຸ໊ກມີແຜນຈະປິດກັ້ນການແບ່ງປັນຂ່າວສຳລັບບັນຊີຜູ້ໃຊ້ເຟສບຸ໊ກຊາວອົສຕຣາລີ ຫຼາຍກວ່າທີ່ຈະຈ່າຍເງິນຄ່າລິຂະສິດຂອງຂ່າວ ໂດຍ ທ່ານ ວີລ ອິສຕັນ ຜູ້ອຳນວຍການເຟສບຸ໊ກໃນອົສຕຣາລີ ກ່າວວ່າ: ຫາກຂໍ້ສະເໜີດັ່ງກ່າວກາຍເປັນກົດໝາຍ ເຟສບຸ໊ກຈຳເປັນຕ້ອງຢຸດໃຫ້ສື່ ແລະ ຜູ້ຄົນໃນອົສຕຣາລີແບ່ງປັນຂ່າວ ທັງຂ່າວທ້ອງຖິ່ນ ແລະ ຂ່າວຕ່າງປະເທດໃນ ເຟສບຸ໊ກ ແລະ ອິນສະຕາແກຣມ ພ້ອມລະບຸວ່ານີ້ບໍ່ແມ່ນທາງເລືອກທຳອິດ ແຕ່ເປັນທາງເລືອກສຸດທ້າຍຂອງເຟສບຸ໊ກທີ່ຈະປົກປ້ອງຜົນຮັບທີ່ຈະຕາມມາ ຫາກບໍ່ເຮັດຕາມລະບົບອາດສ້າງຄວາມເສຍຫາຍແກ່ເຟສ ບຸ໊ກໄດ້.