ໃນຕອນບ່າຍວັນທີ 25 ສິງຫາ 2020 ພະແນກການເງິນແຂວງອັດຕະປື ໄດ້ຈັດກອງປະຊຸມກະກຽມຄວາມພ້ອມໃນການລົງເກັບກໍາ ແລະ ສຳຫຼວດຖານລາຍຮັບງົບປະມານ ປະຈຳປີ 2020 ໂດຍການເຂົ້າຮ່ວມຂອງ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ມີຫົວໜ້າພະແນກການເງິນແຂວງ, ມີທ່ານເຈົ້າເມືອງ 5 ຕົວເມືອງເຂົ້າຮ່ວມ.
ທ່ານ ຄຳເຜີຍ ໂສມຖາວອນ ຫົວໜ້າພະແນກການເງິນ ແຂວງອັດຕະປື ໄດ້ຜ່ານບົດລາຍງານການຈັດຕັ້ງປະຕິບັດການເກັບກໍາ ແລະ ເດີນສຳຫຼວດຖານລາຍຮັບງົບປະມານໃນໄລຍະຜ່ານມາ ໂດຍຫຍໍ້ແຕ່ປີ 2017 – 2019 ເຊິ່ງໄດ້ຍົກໃຫ້ເຫັນສະພາບການເຄື່ອນໄຫວໃນໄລຍະຜ່ານມາ ໂດຍສະເພາະໄດ້ດຳເນີນເກັບກໍາ ແລະ ສຳຫຼວດຖານລາຍຮັບສ່ວຍສາອາກອນ, ພາສີ, ຊັບສິນ ເລັງໃສ່ບັນດາຫົວໜ່ວຍທຸລະກິດທີ່ມີການເຄື່ອນໄຫວຢູ່ພາຍໃນແຂວງນັບທັງບຸກຄົນ, ນິຕິບຸກຄົນ ແລະ ອົງການຈັດຕັ້ງລັດທີ່ມີຖານຂໍ້ມູນລາຍຮັບ ເພື່ອແນໃສ່ຍູ້ແຮງການຄຸ້ມຄອງຈັດເກັບລາຍຮັບງົບປະມານແຫ່ງລັດໃຫ້ຄົບຖ້ວນຖືກຕ້ອງຕາມລະບຽບກົດໝາຍ ບັນລຸຕາມແຜນການສະພາຮັບຮອງແຕ່ລະໄລຍະ, ສາມາດກຳໄດ້ຖານລາຍຮັບງົບປະມານທີ່ມີຄວາມຍືນຍົງຕົ້ນຕໍ ແລະ ຖານລາຍຮັບທີ່ເກີດຂຶ້ນຊົ່ວຄາວ ຫຼື ລັກສະນະບັງເອີນ.
ກອງປະຊຸມຄັ້ງນີ້ຍັງໄດ້ຜ່ານຂໍ້ຕົກລົງຂອງເຈົ້າແຂວງອັດຕະປື ວ່າດ້ວຍການແຕ່ງຕັ້ງຄະນະຊີ້ນໍາລວມ, ຄະນະຊີ້ນໍາວິຊາການ ແລະ ວິຊາການລົງກວດກາເກັບກໍາຂໍ້ມູນສຳຫຼວດຖານລາຍຮັບງົບປະມານ ປະຈຳປີ 2020 ແລະ ຜ່ານຮ່າງແຜນດຳເນີນງານເກັບກໍາຂໍ້ມູນ ແລະ ສຳຫຼວດຖານລາຍຮັບງົບປະມານ ປະຈຳປີ 2020.
