ສຳນັກຂ່າວຕ່າງປະເທດລາຍງານວ່າ: ສູນແຜ່ນດິນໄຫວ ເມດີເຕີເຣນຽນ ເອີຣົບ ( EMSC ) ແຈ້ງວ່າ: ເກີດເຫດແຜ່ນດິນໄຫວຂະໜາດ 6,6 ຣິກເຕີ ໃນແຂວງຊາມາ ທາງພາກຕາເວັນອອກຂອງຟີລິບປິນ ເມື່ອວັນທີ 18 ສິງຫາຜ່ານມາ ໂດຍມີຈຸດສູນກາງຢູ່ໃນທະເລ ແລະ ເລິກລົງໄປໃຕ້ດິນປະມານ 30 ກິໂລແມັດ, ມີລາຍງານວ່າອາຄານບ້ານເຮືອນຂອງປະຊາຊົນທີ່ຢູ່ໃກ້ແຄມທະເລໄດ້ຮັບຄວາມເສຍຫາຍ.
ຂະນະທີ່ສຳນັກງານແຜ່ນດິນໄຫວຂອງຟີລິບປິນ ລາຍງານວ່າ: ເຫດການດັ່ງກ່າວບໍ່ໄດ້ເຮັດໃຫ້ເກີດມີຄວາມສ່ຽງທີ່ຈະເກີດຄື້ນຊຶນາມິ ແຕ່ອາດຈະເກີດແຮງສັ່ນສະເທືອນ ຫຼັງແຜ່ນດິນໄຫວ ຫຼື ອັບເຕີຊ໊ອກຕາມມາກໍເປັນໄດ້.
ສື່ທ້ອງຖິ່ນລາຍງານວ່າ: ແຜ່ນດິນໄຫວຄັ້ງນີ້ເຮັດໃຫ້ມີຜູ້ເສຍຊີວິດ 1 ຄົນ ແລະ ຍັງເຮັດໃຫ້ອາຄານບ້ານເຮືອນຂອງປະຊາຊົນທີ່ຕັ້ງຢູ່ບໍລິເວນແຄມຝັ່ງທະເລໄດ້ຮັບ ຄວາມເສຍຫາຍຈຳນວນໜຶ່ງ.
