ສຳນັກຂ່າວຕ່າງປະເທດລາຍງານວ່າ: ກອງກຳລັງຕິດອາວຸດຂອງກຸ່ມອັລ – ຊາບັບ ໄດ້ໃຊ້ປືນບຸກເຂົ້າຢຶດໂຮງແຮມອີລິດ ໃນນະຄອນຫຼວງໂມກາດີຊູ ຂອງປະເທດໂຊມາລີ ເມື່ອວັນທີ 16 ສິງຫາຜ່ານມາຕາມເວລາທ້ອງຖິ່ນ, ກ່ອນຈະຖືກເຈົ້າໜ້າທີ່ໜ່ວຍປະຕິບັດການພິເສດຂອງໂຊມາລີ ເຂົ້າໄປຢຶດຄືນໂຮງແຮມດັ່ງກ່າວ ແລະ ໄດ້ຍິງຕໍ່ສູ້ກັນຈົນເຮັດໃຫ້ຄົນຮ້າຍເສຍຊີວິດທັງໝົດ.
ລາຍງານລະບຸວ່າ: ກຸ່ມຄົນຮ້າຍໄດ້ໃຊ້ລະເບີດລົດໃຫຍ່ທີ່ຈອດຢູ່ໃກ້ໂຮງແຮມດັ່ງກ່າວ ກ່ອນຈະບຸກເຂົ້າໄປພາຍໃນໂຮງແຮມ ແລະ ຈັບຜູ້ຄົນທີ່ມາພັກຢູ່ໂຮງແຮມໄວ້ເປັນຕົວປະກັນ, ທາງການໂຊມາລີ ຕ້ອງໄດ້ສົ່ງເຈົ້າໜ້າທີ່ໜ່ວຍປະຕິບັດການພິເສດເຂົ້າໄປເພື່ອລະງັບເຫດການດັ່ງກ່າວ.
ຜູ້ເຫັນເຫດການລາຍງານວ່າ: ໄດ້ເກີດມີສຽງລະເບີດດັງສະນັ່ນຫວັ່ນໄຫວໄປທົ່ວບໍລິເວນໃກ້ຄຽງ, ກ່ອນເຈົ້າໜ້າທີ່ຈະປິດກັ້ນພື້ນທີ່ເກີດເຫດ ແລະ ຍິງຕໍ່ສູ້ກັບກຸ່ມຄົນຮ້າຍຢູ່ພາຍໃນໂຮງແຮມ. 4 ຊົ່ວໂມງຕໍ່ມາ ໂຄສົກລັດຖະບານໂຊມາລີ ອອກຖະແຫຼງການວ່າ: ເຫດການຢຶດໂຮງແຮມໄດ້ສະຫງົບລົງແລ້ວ ແລະ ເຈົ້າໜ້າທີ່ສາມາດຍິງຄົນຮ້າຍເສຍຊີວິດທັງໝົດ ແຕ່ບໍ່ຮູ້ວ່າຄົນຮ້າຍມີທັງໝົດຈັກຄົນກັນແທ້, ເຫດການຄັ້ງນີ້ມີຜູ້ເສຍຊີວິດຢ່າງໜ້ອຍ 10 ຄົນ, ໃນນັ້ນມີເຈົ້າໜ້າທີ່ຈາກກະຊວງປ້ອງກັນປະເທດ 1 ຄົນ, ໃນຂະນະທີ່ມີຜູ້ໄດ້ຮັບບາດເຈັບອີກຫຼາຍສິບຄົນ.
ໃນຂະນະທີ່ກຸ່ມຕິດອາວຸດ ອັລ – ຊາບັບໄດ້ໂພສຂໍ້ຄວາມຜ່ານສື່ອອນລາຍວ່າເປັນຜູ້ຢູ່ເບື້ອງຫຼັງເຫດການດັ່ງກ່າວ.
