ສຳນັກຂ່າວຣອຍເຕີ ລາຍງານວ່າ: ປະທານາທິບໍດີ ວະລາດີເມຍ ປູຕິນ ຂອງຣັດເຊຍ ປະກາດວ່າຣັດເຊຍເປັນປະເທດທຳອິດຂອງໂລກທີ່ອະນຸມັດການຈົດທະບຽນວັກແຊັງຕ້ານໂຄວິດ – 19 ໂດຍຕັ້ງຊື່ວ່າ “ ສະປຸດນິກ V ( Sputnic V )” ເນື່ອງຈາກຄວາມສຳເລັດໃນການພັດທະນາວັກແຊັງຄັ້ງນີ້ ທຽບເທົ່າກັບຄວາມສຳເລັດຂອງຣັດເຊຍ ໃນຍຸກສະຫະພາບໂຊວຽດໃນການແຂ່ງຂັນດ້ານອະວະກາດກັບສະຫະລັດອາເມຣິກາ ເຊິ່ງສະຫະພາບໂຊວຽດສາມາດສົ່ງດາວທຽມ “ ສະປຸດນິກ ” ຂຶ້ນສູ່ວົງໂຄຈອນເປັນຄັ້ງທຳອິດຂອງໂລກ.
ວັກແຊັງດັ່ງກ່າວຖືກພັດທະນາໂດຍສະຖາບັນກາມາເລຢາ ຂອງຣັດເຊຍ ແລະ ຄາດວ່າຈະມີການຜະລິດເປັນຈຳນວນຫຼວງຫຼາຍໃນທ້າຍປີນີ້, ຂະນະທີ່ຫຼາຍປະເທດໄດ້ສະແດງເຈດຈຳນົງຊື້ວັກແຊັງດັ່ງກ່າວລວມແລ້ວປະມານ 1 ພັນລ້ານໂດສ ໂດຍຈະມີການຜະລິດໃນບຣາຊິນ, ສ່ວນການທົດລອງທາງຄລີນິກໄດ້ດຳເນີນຢູ່ຟີລິບປິນ ແລະ ສະຫະລັດອາຣັບເອເມເຣັດ.
ປະທານາທິບໍດີ ປູຕິນ ຢືນຢັນວ່າ: ວັກແຊັງດັ່ງກ່າວມີ ຄວາມປອດໄພ ແລະ ລູກສາວຂອງລາວກໍໄດ້ຮັບການສີດວັກແຊັງດັ່ງກ່າວແລ້ວ ໂດຍໄດ້ເຂົ້າເປັນອາສາສະໝັກຄົນໜຶ່ງໃນການທົດລອງວັກແຊັງດັ່ງກ່າວ.
